پرەمەر-مينيستر ولجاس بەكتەنوۆ مەملەكەت باسشىسىنىڭ بىلتىر قاراشا ايىنداعى ۆاشينگتونعا ساپارى ەلدەر اراسىنداعى ەكونوميكالىق ارىپتەستىكتىڭ اۋقىمىن ايقىن كورسەتكەنىن اتاپ ءوتتى. جالپى سوماسى 17 ملرد دوللار بولاتىن قول قويىلعان 29 كەلىسىم ەكونوميكالىق بايلانىستاردىڭ كەڭەيۋىنە ەلەۋلى سەرپىن بەردى. قازاقستان ۇكىمەتى قول جەتكىزىلگەن ۋاعدالاستىقتاردى جۇزەگە اسىرۋعا باسىمدىق بەرەدى.
«قازاقستان-امەريكا ىنتىماقتاستىعى بۇگىندە قارقىندى دامىپ كەلەدى. ونىڭ نەگىزىندە ستراتەگيالىق كوزقاراسى ءبىزدىڭ بىرلەسكەن جۇمىسىمىزعا پراكتيكالىق سيپات بەرەتىن مەملەكەتتەرىمىزدىڭ كوشباسشىلارى اراسىنداعى بەرىك قارىم-قاتىناس جاتىر. ءبىز جوعارى ساياسي دەڭگەيدەگى تىعىز ديالوگ ەكى ەل اراسىنداعى ساۋدا-ەكونوميكالىق بايلانىس-تاردى تەرەڭدەتۋ ءۇشىن ودان ءارى قولايلى جاعداي تۋعىزادى دەپ سەنەمىز», دەدى و.بەكتەنوۆ.
ءوز كەزەگىندە اقش ەلشىسى دە ءوزارا ىنتىماقتاستىقتىڭ جاڭا دەڭگەيگە كوتەرىلگەنىن اتاپ ءوتتى.
ء«بىزدىڭ ەلدەر اراسىندا بۇرىن-سوڭدى بولماعان قاتىناس قالىپتاستى. قازاقستان پرەزيدەنتى قاسىم-جومارت توقاەۆ اقش پرەزيدەنتى دونالد ترامپتىڭ بەيبىتشىلىك كەڭەسى جانە يبراھيم كەلىسىمدەرى جونىندەگى باستاماسىنا قاتىستى ناقتى ۇستانىمىن ءبىلدىردى. مۇنىڭ بارلىعى دا – تاريحي ءارى سەرپىندى باستامالار. قولداۋ كورسەتكەنى ءۇشىن امەريكا قۇراما شتاتتارى مەن پرەزيدەنت ترامپ قازاقستانعا العىس بىلدىرەدى», دەدى د.ستاففت.
بىلتىر ەكى ەل اراسىنداعى تاۋار اينالىمى 3,19 ملرد دوللارعا جەتتى, ال بيىل قاڭتار-اقپان ايلارىندا 487,4 ملن دوللاردى قۇرادى. كەزدەسۋدە اقش-تىڭ ەلىمىزدىڭ ەكونوميكاسىنداعى نەگىزگى ستراتەگيالىق ينۆەستورلاردىڭ ءبىرى رەتىندەگى ماڭىزى اتاپ ءوتىلدى. قازىر ەلىمىزدە امەريكالىقتاردىڭ قاتىسۋىمەن 600-دەن استام كومپانيا تابىستى جۇمىس ىستەپ جاتىر. وتاندىق نارىقتا «Chevron», «ExxonMobil», «Amazon», «Citi», «Wabtec», «John Deere», «Boeing», «Oracle», «PepsiCo», «Mars» سياقتى كومپانيالاردىڭ بولۋى ەكىجاقتى ساۋدا-ەكونوميكالىق ىنتىماقتاستىقتىڭ جوعارى الەۋەتىن كورسەتەدى.
كەزدەسۋ بارىسىندا مەملەكەتتىك باسقارۋ جۇيەسىن ودان ءارى رەفورمالاۋ مەن جاڭارتۋعا نەگىز بولعان جاڭا كونستيتۋتسيانىڭ ەرەجەلەرىن جۇزەگە اسىرۋعا دا نازار اۋدارىلدى. پرەمەر-مينيستر ولجاس بەكتەنوۆ اتا زاڭىمىز ساياسي تۇراقتىلىقتى نىعايتىپ, مەملەكەت پەن قوعامنىڭ ۇدەمەلى دامۋى ءۇشىن بەرىك نەگىز قۇراتىنىن ايتتى.
كەزدەسۋ قورىتىندىسىندا تاراپتار ساۋدا-ەكونوميكالىق ارىپتەستىكتى ودان ءارى نىعايتۋعا, سونداي-اق باسىم باعىتتاردا بىرلەسكەن جوبالاردى جۇزەگە اسىرۋعا بەيىلدى ەكەنىن راستادى.
