تۇركىستان وبلىسى – اگرارلىق الەۋەتى جوعارى ءوڭىر بولعاندىقتان ەگىن القاپتارىن تۇراقتى سۋارۋ, سۋ رەسۋرستارىن ءتيىمدى پايدالانۋ مەن زاماناۋي تەحنولوگيالاردى ەنگىزۋ وتە ماڭىزدى. وسى ورايدا جۇزەگە اسىرىلا باستاعان جوبا سۋ قويمالارىن تولىقتىرۋ دەڭگەيىن ارتتىرۋعا, ەلىمىزدىڭ وڭتۇستىگىندەگى اۋىل شارۋاشىلىعى اۋماقتارىن سۋ رەسۋرستارىمەن قامتاماسىز ەتۋگە باعىتتالعان. سونداي-اق وبلىستاعى جالپى كولەمى 911 مىڭ گەكتاردان اساتىن ەگىستىك جەرلەرگە اسەر ەتەتىن قۇرعاقشىلىق پەن سۋ تاپشىلىعىنىڭ سالدارىن ازايتۋعا ارنالعان. رەسپۋبليكاداعى
سۋارمالى جەرلەردىڭ تورتتەن ءبىر بولىگى, ياعني 575 مىڭ گەكتار جەر – تۇركىستان وبلىسىنا تيەسىلى. سوندىقتان سۋ رەسۋرستارىن ءتيىمدى پايدالانۋ – ءوڭىر ءۇشىن ستراتەگيالىق ماڭىزدى مىندەت.
جوبانى ىسكە قوسۋ راسىمىنە قاتىسقان پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆتىڭ مالىمدەۋىنشە, قازاقستان كليماتتىق ورنىقتىلىقتىڭ جاڭا جۇيەسىن قالىپتاستىرۋعا باعىتتالعان پراكتيكالىق قادام جاساپ جاتىر. ء«بىز ءۇشىن بۇل – عىلىمعا, حالىقارالىق سەرىكتەستىككە جانە تسيفرلىق تەحنولوگيالارعا نەگىزدەلگەن زاماناۋي كليماتتىق ينفراقۇرىلىمدى قالىپتاستىرۋدىڭ باستاۋى. جوبا الەمدىك جەتەكشى ساراپشىلارمەن بىرلەسە جۇزەگە اسىرىلۋدا جانە تەحنولوگيالار ترانسفەرى مەن وتاندىق مامانداردى دايارلاۋدىڭ نەگىزىن قالايدى», دەدى ج.ماديەۆ. وسى ورايدا تۇركىستان وبلىسىنىڭ ماماندارىن اۋا رايىن موديفيكاتسيالاۋ تەحنولوگيالارىنا وقىتۋدى ىنتىماقتاستىق اياسىندا ءباا ۇلتتىق مەتەورولوگيا ورتالىعىنىڭ ماماندارى جۇرگىزىپ جاتقانىن ايتا كەتەلىك. ولاردىڭ قاتارىندا مەتەورولوگتەر, ۇشقىشتار, ينجەنەرلەر مەن سالالىق ماماندار بار. سونىمەن قاتار تەحنولوگيانى ەلىمىزدىڭ باسقا وڭىرلەرىندە كەڭەيتۋ مۇمكىندىگى قاراستىرىلىپ, وتاندىق كليماتتىق تەحنولوگيالاردى قالىپتاستىرۋدىڭ ىرگەلى نەگىزى قالانىپ وتىر.
سالتاناتتى راسىمدە تۇركىستان وبلىسىنىڭ اكىمى نۇرالحان كوشەروۆ جوبانىڭ ماڭىزىنا توقتالدى. «مەملەكەت باسشىسى قاسىم-جومارت توقاەۆ سۋ قاۋىپسىزدىگى مەن اۋىل شارۋاشىلىعىن دامىتۋ ماسەلەسىنە ءاردايىم كوڭىل ءبولىپ كەلەدى. وسى تۇرعىدا تۇركىستان وبلىسىنىڭ ماڭىزى ەرەكشە. جاھاندىق كليماتتىڭ وزگەرۋى وڭتۇستىك وڭىرلەرگە ءوز اسەرىن تيگىزىپ وتىر. ءبىز بۇل ماسەلەنى شەشۋ ءۇشىن سۋ ۇنەمدەۋ تەحنولوگيالارىن قارقىندى ەنگىزىپ جاتىرمىز. كەيىنگى ءۇش جىلدا 114 مىڭ گەكتار جەردى زاماناۋي جۇيەگە كوشىردىك. الداعى بەس جىلدا قوسىمشا 250 مىڭ گەكتارعا جەتكىزۋدى جوسپارلاپ وتىرمىز. بۇگىنگى ۇسىنىلىپ وتىرعان جاساندى جاڭبىر جاۋعىزۋ تەحنولوگياسى – بولاشاققا باعىتتالعان بىرەگەي جوبا. قازىردىڭ وزىندە ناقتى ىستەر اتقارىلدى. شاھارعا 4 توننا يننوۆاتسيالىق رەاگەنت جەتكىزىلدى. ارنايى اۋە كەمەسى العاشقى تەحنيكالىق ۇشۋ ساپارىن ءساتتى ورىندادى. جاساندى جاڭبىر جاۋعىزۋ ارقىلى القاپتاردى سۋمەن قامتاماسىز ەتىپ, جايىلىمداردىڭ ونىمدىلىگىن ارتتىرامىز», دەدى وبلىس اكىمى.
ماماندار حالىقارالىق باعالاۋلارعا سايكەس, جاساندى جاڭبىر شاقىرۋ تەحنولوگيالارى تابيعي دەڭگەيمەن سالىستىرعاندا جاۋىن-شاشىن كولەمىن 10–20%-عا دەيىن ارتتىرا الاتىنىن ايتىپ وتىر. الەۋەتتى ەكونوميكالىق تيىمدىلىك جىلىنا 35 ملرد تەڭگەگە دەيىن باعالانادى. مۇنداي تەحنولوگيالار قىتاي, اقش, ءباا, فرانتسيا جانە ساۋد ارابياسىندا بەلسەندى تۇردە قولدانىلىپ كەلەدى. جوبا سۋعا سۇرانىسى جوعارى اۋدانداردا, ەڭ الدىمەن اۋىل شارۋاشىلىعى اۋماقتارىندا جەرگىلىكتى دەڭگەيدە جۇزەگە اسىرىلادى. جۇمىس جۇرگىزىلەتىن ايماقتاردى تاڭداۋ مەتەورولوگيالىق قىزمەت ماماندارى مەن پروفيلدىك مەملەكەتتىك ورگانداردىڭ قاتىسۋىمەن اۋا رايى جاعدايىن, ەكولوگيالىق احۋالدى جانە سۋعا قاجەتتىلىكتى ەسكەرە وتىرىپ جۇرگىزىلەدى. تەحنولوگيانىڭ اسەر ەتۋ اۋماعى جەرگىلىكتى سيپاتقا يە جانە راديۋسى 5 شاقىرىمنان اسپايدى, سونداي-اق اۋقىمدى اۋا رايى قۇبىلىستارىن قالىپتاستىرۋمەن بايلانىستى ەمەس. جۇمىستى جۇرگىزۋ ءۇشىن حالىقارالىق تاجىريبەدە قولدانىلاتىن تۇز نەگىزىندەگى رەاگەنتتەر پايدالانىلادى.
ەكولوگيا جانە تابيعي رەسۋرستار مينيسترلىگىنىڭ مالىمەتىنە قاراعاندا, جاۋىن-شاشىن تاپشىلىعى ورتالىقتا جانە وڭتۇستىك-باتىستا, ياعني ۇلىتاۋ, اقتوبە وبلىستارى, قوستاناي وبلىسىنىڭ وڭتۇستىگى, تۇركىستان وبلىسىنىڭ سولتۇستىگى جانە باتىس قازاقستان ءوڭىرىنىڭ وڭتۇستىك-شىعىسىندا بولۋى مۇمكىن. اتالعان جوبانىڭ جۇزەگە اسىرىلا باستاعانىنان حاباردار بولعان ءوڭىر تۇرعىندارى اۋا رايىن موديفيكاتسيالاۋ جانە جاۋىن-شاشىندى جاساندى تۇردە كوبەيتۋ سالاسىندا كوپجىلدىق تاجىريبەسى بار ءباا ۇلتتىق مەتەورولوگيا ورتالىعىمەن حالىقارالىق ىنتىماقتاستىق اياسىندا جۇزەگە اسىرىلىپ جاتقان جۇمىستىڭ وڭ ناتيجە بەرەتىنىنەن ءۇمىتتى.
ايتا كەتەلىك, الداعى ۆەگەتاتسيا كەزەڭىندە وبلىستىڭ ماقتاارال جانە جەتىساي اۋداندارى ديقاندارىنىڭ قاجەتتىلىگى ءۇشىن مەملەكەتارالىق «دوستىق» كانالى ارقىلى سۋ بەرۋ جوسپارلانىپ وتىر.
تۇركىستان وبلىسى
