ءابجان ءابىلتاي – قارا ءسوزدى كيە تۇتقان قالامگەر. ونىڭ سانالى عۇمىرىنىڭ ءبىراز بولىگى تۋعان ەلى تورعاي جەرىندە ءوتتى. ۇزاق جىل اۋداندىق, وبلىستىق باسىلىمداردا قىزمەت ىستەپ, جۋرناليستيكادا قولتاڭباسىن قالدىردى. الايدا ءابجان اعانى ەل ارقالى اقىن دەپ بىلەدى. بۇعان دەيىن بىرنەشە جىر جيناعى جارىق كورگەن. اقىن پوەزياسىندا ورلىك پەن رۋح ەركىندىگى ايقىن كورىنىپ تۇرادى. سونداي-اق ونىڭ شىعارماشىلىعىنا ادەبيەتتەگى اعا بۋىن وكىلدەرى مەن سىنشىلار جوعارى باعا بەرگەن.
قالامگەردىڭ تاعى ءبىر قىرى – اۋدارماشىلىعى. بۇل سالادا دا ءونىمدى ەڭبەك ەتتى. «مادەني مۇرا» باعدارلاماسى اياسىندا ە.زوليا, ن.گوگول, ي.برودسكي سياقتى ادەبيەت كلاسسيكتەرىنىڭ تۋىندىلارىن تارجىمەلەدى. الەمگە ايگىلى س.ەسەنين, ە.ەۆتۋشەنكو, ر.روجدەستۆەنسكي, ا.ۆوزنەسەنسكي, ك.ناسرۋللو, گ.سافيەۆا سەكىلدى ايتۋلى اقىنداردىڭ ولەڭدەرىن قازاقشا سويلەتتى. سونىمەن بىرگە ءبىراز جىل مەملەكەتتىك قىزمەت سالاسىندا دا تەر توگىپ, قازاق ءتىلىنىڭ تەرمينولوگيالىق سوزدىگىن جەتىلدىرۋ مەن اۋدارما ءىسىن دامىتۋعا اتسالىستى.
ادەبي كەشتى جازۋشىلار وداعى استانا قالالىق فيليالىنىڭ ديرەكتورى, اقىن باۋىرجان باباجان ۇلى جۇرگىزدى. جيىن قۇتتىقتاۋلارمەن باستالدى. الدىمەن استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ مەملەكەت باسشىسىنىڭ قۇتتىقتاۋىن وقىپ بەردى. ودان كەيىن جازۋشىلار وداعىنىڭ توراعاسى مەرەكە قۇلكەنوۆتىڭ لەبىزى مەن سىي-سياپاتى دا تاپسىرىلدى.
جيىندا ەلوردالىق قالامگەرلەر دارىندى تۇلعانىڭ اقىندىعى, اۋدارماشىلىعى, ازاماتتىعى تۋرالى سالماقتى ءسوز ءوربىتتى. ماسەلەن, جازۋشى ءمادي ايىمبەتوۆ كەش يەسىنىڭ اۋدارماشىلىق ەڭبەگىنە توقتالدى.
«مەملەكەتتىك قىزمەتتە ءجۇرىپ, شىعارماشىلىقپەن اينالىسۋ وڭاي ەمەس. بىراق ءابجان – وسى قيىندىقتان جول تابا بىلگەن قالامگەر. ونىڭ اقىندىعى تۋرالى ءسوز باسقا. ال اۋدارماشىلىق ونەرىنە ۇنەمى ءتانتىمىن. ايتالىق, اتاقتى اقىن ي.برودسكيدىڭ پوەزياسىن كەرەمەت اۋدارعان. قۇددى, اقىن ولەڭدەرى ءابجاننىڭ ءوز تۋىندىسى سەكىلدى. قازاقى ناقىشتى يىرىمگە باي. سونداي-اق ول زاڭ سالاسىنىڭ تەرمينولوگياسىن قالىپتاسىرۋعا دا مول ۇلەس قوستى», دەدى ول. ال كورنەكتى اقىن سەرىك تۇرعىنبەك ۇلى ءابجاننىڭ بولمىسى مەن پوەزياسىندا ماعجانعا ۇقساس قاسيەتتەر كوپ ەكەنىن تىلگە تيەك ەتتى. جازۋشى-جۋرناليست قايسار ءالىم ءوز ءسوزىن قالامگەردىڭ ۇلى باباسى, تورعاي اقىندىق مەكتەبىنىڭ ءىرى وكىلى سەيداحمەت بەيسەن ۇلىنان باستادى.
«احمەت بايتۇرسىن ۇلى «ادەبيەت تانىتقىش» اتتى زەرتتەۋىندە سەيداحمەتتىڭ ولەڭدەرىنە تالداۋ جاساعان. بۇل – اقىن پوەزياسىنىڭ مىقتىلىعىن ايعاقتايتىن مىسال. ءابجان – سەيداحمەت اقىننىڭ شوبەرەسى. ونىڭ ولەڭدەرىندە دە باباسىنان دارىعان وتكىرلىك, كەمەلدىلىك, پاراساتتىلىق تۇنىپ تۇر», دەدى. ءىس-شارا بارىسىندا باسقا دا ازاماتتار ءسوز الىپ, جىلى پىكىرلەرىن ءبىلدىردى. ءان ايتىلىپ, كۇي تارتىلدى. كەش سوڭىندا اقىن جاڭا ولەڭدەرىن وقىپ, جيىنعا كەلگەن قاۋىمعا ريزاشىلىعىن جەتكىزدى.
