سۋرەتتەردى تۇسىرگەن: يۋري بەككەر
ەكسپوزيتسيا كورەرمەندى ەرەكشە كوركەم كەڭىستىككە جەتەلەيدى. سۋرەتشىنىڭ تۋىندىلارى ىشكى اۋەنگە, ۋاقىت ديناميكاسىنا جانە ەموتسيالىق قۋاتقا تولى. مۇندا ءتۇس, فاكتۋرا مەن ىرعاق ءوزارا ۇيلەسىم تاۋىپ, كوپقاباتتى كوركەم «سيمفونياعا» اينالعان.
قازاقستاننىڭ ەڭبەك سىڭىرگەن مادەنيەت قايراتكەرى بەيسەبەك اقاناەۆ سۋرەتشىنىڭ شىعارماشىلىعىنا جوعارى باعا بەرىپ, ونىڭ كارتينالارى ىشكى ءمان مەن مۋزىكالىق ۇيلەسىمگە قۇرىلعان تۇتاس ەنەرگەتيكالىق الەم قالىپتاستىراتىنىن اتاپ ءوتتى.
كورمەدە ۇسىنىلعان جۇمىستار اۆتوردىڭ شىعارماشىلىق باعىتىن ايقىن تانىتادى. اكادەميالىق ءداستۇردىڭ شەڭبەرىنەن شىعىپ, ونەر يەسى ابستراكتىلى كەسكىندەمە ءتىلىن تاڭداعان. ونىڭ ەڭبەكتەرىندە ءپىشىن مەن ءتۇس, ىرعاق پەن فاكتۋرا ءوزارا ارەكەتتەسىپ, كۇردەلى ءارى اسەرلى كومپوزيتسيالار تۇزگەن. بۇل تۋىندىلار كورەرمەنگە ەموتسيونالدىق اسەر بەرەتىن, تەرەڭ ماعىناعا يە كوركەم قۇرىلىمدار رەتىندە قابىلداندى.
سەزىنىپ كورۋگە بولاتىن فوتوكورمە: الماتىلىقتار «سۋ استىنداعى ءومىردى» تاماشالادى
سۋرەتشىنىڭ شىعارماشىلىعىندا ناتيۋرمورت جانرى دا جاڭا قىرىنان كورىندى. ءداستۇرلى «تىنىش» جانر بۇل جولى ءپوزيتيۆتى ەنەرگيا مەن كوركەم مەديتاتسيا كەڭىستىگىنە اينالعان. جارىق پەن ۇيلەسىمگە قۇرىلعان بۇل جۇمىستار ارت-تەراپيالىق سيپاتىمەن ەرەكشەلەنىپ, قازىرگى زاماننىڭ فيلوسوفيالىق استارىن اشۋعا مۇمكىندىك بەرەدى.
كورمە بارىسىندا مادينا مۇحتاروۆا ءوز كوزقاراسىمەن ءبولىسىپ: «ونەر شەكاراسى جوق شەكسىز الەم. ول ادامدى ىزگىلىككە باستايدى. ونىڭ ورتاق ءتىلى – مەيىرىم, تازالىق», دەپ اتاپ ءوتتى. بۇل پىكىر كورمەنىڭ يدەيالىق وزەگىن ايقىنداي ءتۇستى.
ونەرتانۋشى ءارى كورمە كۋراتورى ماريا جۇماعۇلوۆا سۋرەتشىنىڭ زاماناۋي ونەر كەڭىستىگىندەگى ورنىن ەرەكشە اتاپ ءوتىپ, ونىڭ ابستراكتىلى كەسكىندەمە ارقىلى ءپىشىن, ءتۇس جانە ىرعاقتىڭ ۇيلەسىمدى قۇرىلىمدارىن باتىل قالىپتاستىرا العانىن جەتكىزدى.
جالپى, «ۋاقىتپەن استاسقان جول» كورمەسى مادينا مۇحتاروۆانىڭ كوركەمدىك ىزدەنىسىن, ۋاقىت پەن كەڭىستىك تۋرالى پايىمىن جانە زاماناۋي ونەردەگى وزىندىك قولتاڭباسىن ايقىنداعان مازمۇندى مادەني ءىس-شارا رەتىندە ءوتتى. كورمە كەلۋشىلەرگە تەرەڭ اسەر قالدىرىپ, ءار كورەرمەندى وي مەن سەزىمنىڭ ەرەكشە الەمىنە جەتەلەدى.
