كوپ جاعدايدا ازاماتتار بۇل ءىستى كەيىنگە قالدىرىپ, ناقتى مەرزىمدەر مەن تالاپتاردى ەسكەرمەيدى. سونىڭ سالدارىنان تۋىستار اراسىندا داۋ تۋىنداپ, ءىس سوتقا دەيىن جەتىپ, ءتىپتى مۇرادان ايىرىلىپ قالۋ جاعدايلارى كەزدەسەدى.
زاڭدى تۇردە مۇراگەرلىك مۇرا قالدىرۋشىنىڭ ادامنىڭ قايتىس بولعان كۇنىنەن باستالادى. وسى ساتتەن باستاپ مۇراگەرلەرگە ءوز قۇقىقتارىن راسىمدەۋ ءۇشىن 6 اي ۋاقىت بەرىلەدى. ەگەر وسى مەرزىم ىشىندە نوتاريۋسقا جۇگىنبەسە, مۇراگەر مۇرادان ايىرىلىپ قالۋى مۇمكىن. مۇنداي جاعدايدا مەرزىمدى تەك سوت ارقىلى, دالەلدى سەبەپتەر بولعاندا عانا قالپىنا كەلتىرۋگە بولادى.
مۇرانى راسىمدەۋ نوتاريۋس ارقىلى جۇزەگە اسادى. نوتاريۋس مۇراگەرلىك ءىستى اشىپ, وسيەتتىڭ بار-جوعىن انىقتايدى, مۇراگەرلەردى بەلگىلەيدى, قاجەتتى قۇجاتتاردى قابىلدايدى جانە مۇراگەرلىك قۇقىق تۋرالى كۋالىك بەرەدى. قۇجاتتاردىڭ قاتارىندا مۇراگەردىڭ جەكە كۋالىگى, قايتىس بولۋ تۋرالى كۋالىك, تۋىستىقتى دالەلدەيتىن قۇجاتتار, مارقۇمنىڭ سوڭعى تۇرعىلىقتى جەرى تۋرالى انىقتاما, سونداي-اق م ۇلىككە قاتىستى قۇجاتتار بولۋى ءتيىس. قاجەت بولعان جاعدايدا نوتاريۋس قوسىمشا قۇجاتتاردى دا تالاپ ەتۋى مۇمكىن.
ادىلەت دەپارتامەنتىنىڭ تۇسىندىرمەسى: سوت اكتىلەرىن قايتا قاراۋ تۋرالى ازاماتتار نەنى ءبىلۋى كەرەك؟
مۇرا ەكى جولمەن راسىمدەلەدى: وسيەت بويىنشا نەمەسە زاڭ بويىنشا. ەگەر وسيەت بولسا, م ۇلىك مارقۇمنىڭ ەركىنە سايكەس بولىنەدى. دەگەنمەن, كەيبىر ساناتتاعى ادامدار, اتاپ ايتقاندا كامەلەتكە تولماعان نەمەسە ەڭبەككە جارامسىز بالالار, ەڭبەككە جارامسىز اتا-انالار مەن جۇبايى مىندەتتى ۇلەسكە يە بولادى. ال وسيەت بولماعان جاعدايدا, مۇرا زاڭدا بەلگىلەنگەن كەزەكتىلىك بويىنشا بولىنەدى: الدىمەن جۇبايى, بالالارى مەن اتا-اناسى, ال ولار بولماعان جاعدايدا باسقا تۋىستارعا وتەدى.
تاجىريبەدە ازاماتتار ءجيى جىبەرەتىن قاتەلىكتەر دە بار. سونىڭ ءبىرى – «م ۇلىكتى پايدالانىپ جۇرسەك, ول اۆتوماتتى تۇردە بىزدىكى» دەگەن قاتە تۇسىنىك. شىن مانىندە, نوتاريۋستىڭ راسىمدەۋىنسىز مەنشىك قۇقىعى زاڭدى تۇردە بەكىتىلمەيدى. سونداي-اق كەيبىر ادامدار مۇرا قۇرامىنداعى م ۇلىكتى جاسىرۋعا تىرىسادى. بۇل ءوز كەزەگىندە تۋىستار اراسىنداعى جانجالعا جانە سوت داۋلارىنا اكەلۋى مۇمكىن. تاعى ءبىر كەڭ تاراعان قاتەلىك – نوتاريۋسقا كەش جۇگىنۋ. كوپشىلىك «كەيىن راسىمدەيمىن» دەپ ءجۇرىپ, زاڭدا بەلگىلەنگەن 6 ايلىق مەرزىمدى وتكىزىپ الادى.
ەگەر مۇرانى قابىلداۋ مەرزىمى ءوتىپ كەتسە, ماسەلەنى ەكى جولمەن شەشۋگە بولادى. ءبىرىنشىسى – باسقا مۇراگەرلەردىڭ كەلىسىمى ارقىلى, ەكىنشىسى – سوتقا جۇگىنۋ ارقىلى مەرزىمدى قالپىنا كەلتىرۋ. الايدا سوت پروتسەسى قوسىمشا ۋاقىت پەن شىعىندى تالاپ ەتەتىنىن ەسكەرگەن ءجون.
مۇراگەرلىككە قاتىستى تاعى ءبىر ماڭىزدى جايت – مارقۇمنىڭ قارىزدارى. مۇراگەرلەر تەك م ۇلىكتى عانا ەمەس, سونىمەن قاتار ونىڭ مىندەتتەمەلەرىن دە قابىلداۋى مۇمكىن. ولاردىڭ قاتارىنا بانكتىك نەسيەلەر, سالىقتار جانە كوممۋنالدىق قارىزدار جاتادى. دەگەنمەن, مۇراگەرلەر قارىز بويىنشا تەك العان م ۇلىكتىڭ قۇنى شەگىندە عانا جاۋاپ بەرەدى. ەگەر قارىز كولەمى م ۇلىكتەن اسىپ كەتسە, ارتىق بولىگى وندىرىلمەيدى. ال اليمەنت نەمەسە ايىپپۇل سياقتى جەكە مىندەتتەمەلەر مۇراگەرلەرگە وتپەيدى.
سوندىقتان مۇرانى راسىمدەۋ بارىسىندا ازاماتتارعا نوتاريۋسقا ۋاقىتىندا جۇگىنۋ, بارلىق قاجەتتى قۇجاتتاردى جيناۋ, م ۇلىك تۋرالى تولىق ءارى شىنايى اقپارات بەرۋ, سونداي-اق مارقۇمنىڭ قارىزدارى جونىندە الدىن الا مالىمەت الۋ ۇسىنىلادى. قاجەت بولعان جاعدايدا مامانداردىڭ كەڭەسىنە جۇگىنگەن ءجون. مۇرانى راسىمدەۋ – جاي عانا فورمالدى ءراسىم ەمەس, ول مۇراگەرلەردىڭ قۇقىقتارىن قورعاۋعا باعىتتالعان ماڭىزدى زاڭدى پروتسەسس. ۋاقتىلى جانە دۇرىس ارەكەت ەتۋ ارتىق داۋ-داماي مەن سوت ماسەلەلەرىنەن ساقتايدى.
