سۋرەت: primeminister.kz
فورۋم اياسىندا كولىك-لوگيستيكالىق بايلانىستاردى كەڭەيتۋ, ينۆەستيتسيالىق ىنتىماقتاستىقتى كۇشەيتۋ مەن بىرلەسكەن ونەركاسىپتىك جوبالاردى دامىتۋ ماسەلەلەرى تالقىلاندى. سونداي-اق قىتايدىڭ حاينان پروۆينتسياسىمەن وڭىرارالىق ارىپتەستىكتى تەرەڭدەتۋ جولدارى قاراستىرىلدى. اۋقىمدى جيىنعا سينگاپۋر پرەمەر-ءمينيسترى لوۋرەنس ۆونگ, ازەربايجان ميللي ءماجىلىسىنىڭ توراعاسى ساگيبا گافاروۆا, شري-لانكا پارلامەنتىنىڭ سپيكەرى دجاگات ۆيكراماراتنە مەن الەمنىڭ 60-تان استام ەلىنەن كەلگەن جوعارى دەڭگەيدەگى وكىلدەر قاتىستى.
ماڭىزدى ءىس-شارا اياسىندا رومان سكليار بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى چجاو لەتسزيمەن ارنايى كەزدەسىپ, پىكىر الماستى. چجاو لەتسزي قىتاي تاراپى ەلىمىزبەن ماڭگىلىك جان-جاقتى ستراتەگيالىق ارىپتەستىكتىڭ جوعارى سەنىمگە نەگىزدەلگەن قاتىناستارىنا ايرىقشا ءمان بەرەتىنىنە توقتالدى. بۇعان قوسا, ەلىمىزدە جۇرگىزىلىپ جاتقان رەفورمالار مەن مەملەكەت باسشىسى قاسىم-جومارت توقاەۆتىڭ ەلدىڭ ودان ءارى وركەندەۋىنە باعىتتالعان باستامالارىنا قولداۋ ءبىلدىردى.
فورۋمدى بواو ازيا فورۋمىنىڭ ديرەكتورلار كەڭەسىنىڭ توراعاسى پان گي مۋن اشىپ, جاھاندىق گەوساياسي شيەلەنىس, قارۋلى قاقتىعىستاردىڭ كوبەيۋى مەن ورنىقتى دامۋعا تونگەن قاۋىپتەر جاعدايىندا حالىقارالىق قوعامداستىق كۇش-جىگەرىن بىرىكتىرۋدىڭ ماڭىزى تۋرالى ايتتى. ءوزارا سەنىمدى نىعايتۋ, وڭىرلىك ينتەگراتسيانى تەرەڭدەتۋ مەن الەمدىك ەكونوميكانىڭ اشىقتىعىن ساقتاۋ ماسەلەلەرىنە باسىمدىق بەرىلدى.
«جوعارى دەڭگەيدەگى ديالوگ: جاھاندىق بەلگىسىزدىك جاعدايىنا ايقىندىق ەنگىزۋ» سەسسياسىندا ءسوز سويلەگەن رومان سكليار ەلىمىز اشىق ەكونوميكا قاعيداتىنا بەرىك ەكەنىن جەتكىزدى. ول حالىقارالىق ىنتىماقتاستىقتى كۇشەيتۋ, كولىك-لوگيستيكالىق دالىزدەردى دامىتۋ مەن ازيا مەن ەۋروپا اراسىنداعى سەنىمدى ترانزيتتىك حاب رەتىندەگى ەلدىڭ ءرولىن ارتتىرۋ ماسەلەلەرىنە توقتالدى. بۇعان قوسا جاھاندىق ەكونوميكالىق سىن-قاتەرلەرگە بىرلەسىپ جاۋاپ ىزدەۋ قاجەتتىگىنە نازار اۋداردى.
جۇمىس ساپارى بارىسىندا رومان سكليار حاينان پروۆينتسياسى حالىق ۇكىمەتىنىڭ توراعاسى ليۋ سياومينمەن كەزدەستى. كەزدەسۋدە ساۋدا-ەكونوميكالىق جانە ينۆەستيتسيالىق بايلانىستاردى كەڭەيتۋ, تۋريزم مەن مادەني-گۋمانيتارلىق ىنتىماقتاستىقتى دامىتۋ, تىكەلەي اۋە قاتىناسىن جولعا قويۋ مەن وڭىرارالىق ىقپالداستىقتى ارتتىرۋ ماسەلەلەرى تالقىلاندى. رومان سكليار ەلىمىز يندۋستريالىق ايماقتار مەن كولىك-لوگيستيكالىق ينفراقۇرىلىمدى دامىتۋ باعىتىنداعى بىرلەسكەن جوبالاردى جۇزەگە اسىرۋعا قولايلى جاعداي جاساپ وتىرعانىن ايتتى.
ءوز كەزەگىندە ليۋ سياومين حاينان پروۆينتسياسى قازاقستانمەن ءوزارا ءىس-قيمىلدى كەڭەيتۋگە مۇددەلى ەكەنىن جەتكىزىپ, وڭىرلەر اراسىنداعى بايلانىستى نىعايتۋعا دايىن ەكەنىن ءبىلدىردى.
ساپار اياسىندا رومان سكليار جەتەكشى قىتاي كومپانيالارىنىڭ باسشىلارىمەن كەزدەسىپ, مۇناي-گاز, مۇناي-حيميا مەن كومىر حيمياسى, مەتاللۋرگيا, ماشينا جاساۋ سالالارىنداعى ينۆەستيتسيالىق ىنتىماقتاستىقتىڭ كەلەشەگىن تالقىلادى. تاراپتار جۇزەگە اسىرىلىپ جاتقان جوبالاردىڭ جاي-كۇيىن قاراستىرىپ, وندىرىستىك كووپەراتسيانى كەڭەيتۋ مۇمكىندىكتەرىن سارالادى.
رومان سكليار جاڭا كونستيتۋتسيالىق وزگەرىستەر ينۆەستيتسيالىق ارىپتەستىكتى جانداندىرۋعا ءارى بىرلەسكەن ءىرى جوبالاردى ىسكە اسىرۋعا قوسىمشا مۇمكىندىك بەرەتىنىن اتاپ ءوتتى. ول ۇكىمەت بىرلەسكەن باستامالاردى قولداۋعا ءارى ولاردىڭ ءتيىمدى جۇزەگە اسۋىنا قاجەتتى جاعداي جاساۋعا دايىن ەكەنىن جەتكىزدى.
كەزدەسۋ قورىتىندىسىندا قىتايلىق كومپانيالار وندىرىستىك ءارى تەحنولوگيالىق كووپەراتسيانى كەڭەيتۋگە, سونداي-اق قازاقستان اۋماعىندا ءونىم ءوندىرۋدى جەرگىلىكتەندىرۋ دەڭگەيىن ارتتىرۋعا نيەتتى ەكەنىن راستادى.
