فوتو: ۇكىمەتتىڭ ءباسپاسوز قىزمەتى
قاراجات الداعى جىلىتۋ ماۋسىمىنىڭ تۇراقتى ءوتۋىن قامتاماسىز ەتۋ ءۇشىن سەمەي قالاسىنداعى جىلۋمەن قامتۋ نىساندارىن جوندەۋگە باعىتتالادى.
«سەمەي قالاسىندا 340 مىڭعا جۋىق حالىق تۇرادى. ورتالىقتاندىرىلعان جىلۋمەن جابدىقتاۋ جۇيەسى 70 مىڭنان استام تۇتىنۋشىنى, سونىڭ ىشىندە كوپقاباتتى جانە جەكە تۇرعىن ۇيلەردى, سونداي-اق الەۋمەتتىك ينفراقۇرىلىم نىساندارىن جىلۋمەن قامتاماسىز ەتەدى. قالاداعى سىرتقى جىلۋ جەلىلەرىنىڭ جالپى ۇزىندىعى – 325,5 شاقىرىم. جەلىلەردىڭ توزۋ دەڭگەيى 58,2% نەمەسە 189 شاقىرىم, بۇل ينفراقۇرىلىمدى كەزەڭ-كەزەڭىمەن جوندەۋ جانە جاڭعىرتۋ جۇمىستارىن جالعاستىرۋ قاجەت ەكەنىن كورسەتەدى», دەپ حابارلادى ۇكىمەتتىڭ ءباسپاسوز قىزمەتى.
كەيىنگى جىلدارى قالادا 54 شاقىرىم جىلۋ جەلىلىلەرىن اۋىستىرۋ, كۇردەلى جوندەۋ, رەكونسترۋكتسيالاۋ جۇمىستارى جۇرگىزىلدى. ناتيجەسىندە توزۋ دەڭگەيى 75%-دان 58%-عا دەيىن تومەندەدى.
2025-2026 جىلدارداعى جىلىتۋ ماۋسىمىنا دايىندىق اياسىندا سەمەي قالاسىنداعى جىلۋمەن قامتۋ نىساندارىندا ءبىرىنشى كەزەكتەگى جوندەۋ جۇمىستارى جۇرگىزىلدى. بۇل رەتتە قاجەتتى قارجىلاندىرۋدىڭ 70%-ى ۇكىمەت رەزەرۆى ەسەبىنەن قامتاماسىز ەتىلدى.
بولىنگەن قارجى 2026-2027 جىلدارداعى جىلىتۋ ماۋسىمىنا دايىندىق شەڭبەرىندە جىلۋ جەلىلەرىنىڭ ەڭ ماڭىزدى ۋچاسكەلەرىن جاڭارتۋدى جالعاستىرۋعا مۇمكىندىك بەرەدى. سونىمەن قاتار بۇل سەمەيدەگى جىلۋمەن جابدىقتاۋ جۇيەسىنىڭ سەنىمدىلىگىن ارتتىرىپ, قىسقى جۇكتەمە كەزىندە جۇيەنىڭ تۇراقتى جۇمىس ىستەۋىن قامتاماسىز ەتەدى.
