تىزبەنى جاڭارتۋ مەملەكەت باسشىسىنىڭ 2024 جىلعى 2 قىركۇيەكتەگى قازاقستان حالقىنا جولداۋىندا ايتىلعان تاپسىرماسىن ورىنداۋ ماقساتىندا جۇرگىزىلدى. قۇجاتتا ەلدىڭ باسقا مونوقالالارىن دامىتۋ ءۇشىن ساران قالاسىنىڭ ەكونوميكاسىن ءارتاراپتاندىرۋدىڭ تابىستى تاجىريبەسىن تاراتۋ مىندەتى قويىلعان ەدى.
وسى جۇمىس شەڭبەرىندە ۇلتتىق ەكونوميكا مينيسترلىگى مونوقالالاردىڭ الەۋمەتتىك-ەكونوميكالىق دامۋىنا ونەركاسىپ ءوندىرىسىنىڭ سەرپىنى, ينۆەستيتسيالىق بەلسەندىلىك, كاسىپكەرلىكتى دامىتۋ, جۇمىسپەن قامتۋ قۇرىلىمى جانە ەكونوميكانىڭ ورنىقتىلىعىنىڭ باسقا دا پارامەترلەرى سەكىلدى 78 نەگىزگى كورسەتكىش بويىنشا كەشەندى تالداۋ جۇرگىزدى.
تالداۋ ناتيجەسى بويىنشا, ەكىباستۇز ەكونوميكانى ءارتاراپتاندىرۋدىڭ تۇراقتى ءۇردىسىن, دامۋدىڭ ءمونوپروفيلدى مودەلىنەن بىرتىندەپ شىعۋ مەجەسىنە جەتكەن. قالا ەكونوميكاسىندا سالالىق قۇرىلىم, ونەركاسىپ تۇراقتى ءوسىپ, جوعارى ينۆەستيتسيالىق بەلسەندىلىك بايقالعان.
ەكىباستۇز گرەس-3 ستانتسياسى سالىنادى: ەلدىڭ ەلەكتر ەنەرگيا ءوندىرىسى ۇلعايادى
«بۇگىنگى تاڭدا ەكىباستۇز ەلىمىزدىڭ ەنەرگەتيكا جانە مەتاللۋرگيا سالاسىندا شەشۋشى ءرول اتقاراتىن ماڭىزدى ونەركاسىپ ورتالىعى بولىپ وتىر. 2025 جىلعى قورىتىندى بويىنشا قالاداعى ونەركاسىپ ءوندىرىسىنىڭ كولەمى 1 629,4 ملرد تەڭگەگە جەتكەن. بۇل 2024 جىلعى سايكەس كەزەڭمەن سالىستىرعاندا 28,1%-عا ارتىق. نەگىزگى كاپيتالعا سالىنعان ينۆەستيتسيا 429,8 ملرد تەڭگەگە جەتىپ, وتكەن جىلعى كورسەتكىشپەن سالىستىرعاندا 1,2 ەسە وسكەن. حالىقتى جۇمىسپەن قامتۋ ەكونوميكانىڭ بىرنەشە سەكتورى اراسىندا بولىنگەن. بۇل ءبىر قالا قۇراۋشى كاسىپورىنعا تاۋەلدىلىكتىڭ تومەندەۋىن جانە مونوفۋنكتسيونالدىلىق بەلگىنىڭ جوعالۋىن كورسەتەدى. وسىعان بايلانىستى, وڭ الەۋمەتتىك-ەكونوميكالىق كورسەتكىشتەردى ەسكەرە وتىرىپ, ەكىباستۇزدى مونوقالالار تىزبەسىنەن شىعارۋ تۋرالى شەشىم قابىلداندى», دەلىنگەن مينيسترلىك تاراتقان حابارلامادا.
جاڭارتىلعان بۇيرىقپەن 19 مونوقالانىڭ تىزبەسى بەكىتىلدى: اباي, اقساي, اقسۋ, التاي, بالقاش, جاڭاوزەن, جىتىقارا, ليساكوۆسك, قاراجال, كەنتاۋ, قۇلسارى, كۋرچاتوۆ, ريددەر, رۋدنىي, ساتباەۆ, ستەپنوگورسك, تەمىرتاۋ, شاحتينسك جانە حرومتاۋ. وسىلايشا, ەلدەگى مونوقالا سانى 20-دان 19-عا قىسقاردى.
