پرەزيدەنت سوڭعى جىلدارى قازاقستاندا الەمنىڭ جەتەكشى جوعارى وقۋ ورىندارىنىڭ فيليالدارىن اشۋ باعىتىندا جۇيەلى جۇمىس جۇرگىزىلگەنىن اتاپ ءوتتى. بۇل باستاما جاستاردىڭ ەل ىشىندە ساپالى ءبىلىم الۋىنا جول اشىپ, حالىقارالىق ستاندارتتاردى ەنگىزۋگە مۇمكىندىك بەرگەن. قازىرگى تاڭدا ەلىمىزدە 33 شەتەلدىك ۋنيۆەرسيتەت فيليالى جۇمىس ىستەيدى. ولاردىڭ قاتارىندا ماسكەۋ ينجەنەرلىك فيزيكا ينستيتۋتى, اريزونا ۋنيۆەرسيتەتى, سوربوننا, لوتارينگيا ۋنيۆەرسيتەتى, كارديفف ۋنيۆەرسيتەتى, دە مونتفورت ۋنيۆەرسيتەتى, بەيجىڭ ءتىل جانە مادەنيەت ۋنيۆەرسيتەتى سياقتى بەدەلدى وقۋ ورىندارى بار.
پرەزيدەنت: تسيفرلاندىرۋ مەن جاساندى ينتەللەكتىنىڭ دامۋىنا باسا ءمان بەرۋىمىز كەرەك
الايدا مەملەكەت باسشىسى بۇل جۇمىستىڭ تەك سانمەن شەكتەلمەۋى كەرەكتىگىن ەسكەرتتى.
«بىزگە ەسەپ ءۇشىن اشىلعان, ۇلتتىق عىلىمدى دامىتۋعا قاۋقارسىز فيليالداردىڭ قاجەتى جوق. باستى نازار ساندا ەمەس, ساپادا بولۋعا ءتيىس. قازاقستاندا جۇمىس ىستەيتىن ءار فيليال جوعارى ءبىلىم سالاسىنداعى باسەكەنى ارتتىرۋعا ىقپال ەتۋى كەرەك», دەدى پرەزيدەنت.
سونداي-اق قاسىم-جومارت توقاەۆ مەملەكەتتىك گرانتتاردى ءبولۋ ماسەلەسىنە توقتالىپ, شەتەلدىك فيليالدار مەن وتاندىق ۋنيۆەرسيتەتتەر اراسىنداعى قارجىلاندىرۋ ايىرماشىلىعىن قايتا قاراۋ قاجەتتىگىن ايتتى. ۇكىمەت دەرەگىنە سايكەس, ءبىر ستۋدەنتكە شەتەلدىك فيليالداردا بولىنەتىن گرانت كولەمى ۇلتتىق ۋنيۆەرسيتەتتەرگە قاراعاندا بەس ەسە كوپ. پرەزيدەنت مۇنداي جاعدايدا ءادىل باسەكەلەستىك قالىپتاستىرۋ قيىن ەكەنىن اتاپ ءوتىپ, ءتيىستى تالداۋ جۇرگىزۋدى تاپسىردى.
كەزدەسۋدە مەملەكەت باسشىسى تەحنيكالىق جانە ينجەنەرلىك ماماندار دايارلاۋ ماسەلەسىنە ەرەكشە ءمان بەردى. ونىڭ ايتۋىنشا, ەلدە گۋمانيتارلىق باعىتتاعى ماماندار سانى شامادان تىس كوبەيگەن.
«ۇلتتىڭ مەنتاليتەتىن وزگەرتۋىمىز كەرەك. ول ءۇشىن عىلىم مەن تەحنولوگياعا مويىن بۇرۋ قاجەت. قازاقستاندا سانا رەۆوليۋتسياسىن جاساۋىمىز كەرەك دەپ ويلايمىن», دەدى پرەزيدەنت.
وسى تۇرعىدا ۋنيۆەرسيتەتتەردىڭ ءرولى ايرىقشا ەكەنى اتاپ ءوتىلدى. جوعارى وقۋ ورىندارى ەل بولاشاعى ءۇشىن جاۋاپكەرشىلىك الاتىن, ءبىلىمدى ءارى پاراساتتى جاڭا بۋىندى قالىپتاستىرۋى ءتيىس. پرەزيدەنت ءبىلىمدى تەك الەۋمەتتىك قىزمەت ەمەس, ماڭىزدى وندىرىستىك كۇش رەتىندە قاراستىرۋ قاجەتتىگىن جەتكىزدى.
توقاەۆ: عىلىمي ازىرلەمەلەردەن اۋىز تولتىرىپ ايتارلىق ەكونوميكالىق اسەر ازىرگە جوق
مەملەكەت باسشىسى بيىلعى جىلدى «تسيفرلاندىرۋ جانە جاساندى ينتەللەكت جىلى» دەپ جاريالاعانىن ەسكە سالىپ, عىلىم مەن تەحنولوگيانى دامىتۋ باعىتىندا ناقتى قادامدار جاسالاتىنىن ايتتى. سونىڭ ءبىرى – جاساندى ينتەللەكت ۋنيۆەرسيتەتىن اشۋ. بۇل وقۋ ورنى العاشقى ستۋدەنتتەرى مەن ماگيسترانتتارىن بيىل قابىلداۋدى جوسپارلاپ وتىر.
«ىرگەلى عىلىمسىز جاساندى ينتەللەكتىنى دامىتۋ مۇمكىن ەمەس. الگوريتمدەر مەن كۇردەلى ينجەنەرلىك ونىمدەر, ەڭ الدىمەن, دامىعان عىلىمي جانە ۋنيۆەرسيتەتتىك ورتادا پايدا بولادى. سول سەبەپتى وسى باعىتقا ايرىقشا كوڭىل بولەمىز», دەدى قاسىم-جومارت توقاەۆ.
ەسكە سالا كەتەيىك, بۇگىن پرەزيدەنت قاسىم-جومارت توقاەۆ الماتى قالاسىنا جۇمىس ساپارى اياسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي الەۋەتىمەن تانىستى.
