فوتو: اشىق دەرەككوز
ۆيتسە-ءمينيستردىڭ ايتۋىنشا, ەۆاكۋاتسيالاۋ كەزىندە مەملەكەت ءۇشىن باستى باسىمدىق شىعىن كولەمى ەمەس, ازاماتتاردىڭ قاۋىپسىزدىگى مەن ولاردى قاۋىپتى ايماقتان جەدەل شىعارۋ بولعان.
«سول ساتتە ەشكىم شىعىن كولەمى نەمەسە باعاسى تۋرالى ويلاعان جوق, نەگىزگى مىندەت – ادامداردى امان-ەسەن جەتكىزۋ بولدى. اۋە كومپانيالارى جەدەل ىسكە كىرىستى. ەۆاكۋاتسيانىڭ قۇنىن ەسەپتەۋ باستى ماقسات ەمەس ەدى. بارلىعىمىز ازاماتتاردى قاۋىپسىز جەرگە الىپ شىعۋ ءۇشىن جۇمىلدىق», دەپ ءتۇسىندىردى تالعات لاستاەۆ.
مينيسترلىك وكىلى اۋە كومپانيالارى مەن جاۋاپتى ورگاندار اتقارىلعان جۇمىستىڭ ناقتى قۇنىن ەسەپتەپ جاتقانىن, بارلىق دەرەكتەر تولىق جيناقتالعان سوڭ تسيفرلاردىڭ كوپشىلىككە جاريالاناتىنىن جەتكىزدى. سونىمەن قاتار ول وتاندىق جانە شەتەلدىك اۋە كومپانيالارىنا, اۋەجاي قىزمەتكەرلەرىنە قيىن كەزەڭدە كورسەتكەن كاسىبيلىگى مەن جەدەلدىگى ءۇشىن ريزاشىلىعىن ءبىلدىردى.
تاياۋ شىعىس ايماعىنان 10 000-نان استام وتانداسىمىز قايتارىلدى
ايماقتاعى تۇراقسىزدىققا بايلانىستى قازاقستاندىق اۋە تاسىمالداۋشىلارى تاياۋ شىعىس باعىتىنداعى رەيستەردى ۋاقىتشا توقتاتتى. قازىرگى ۋاقىتتا قاتار مەن ساۋد ارابياسىنا ۇشاتىن ۇشاقتار دا رەيسكە شىعىپ جاتقان جوق. دەسە دە, كەيبىر شەتەلدىك كومپانيالار, اتاپ ايتقاندا FlyDubai, ۇشۋدى جالعاستىرعان. بىراق اۋە كەڭىستىگىندەگى قاۋىپ سەيىلمەگەندىكتەن, دۋباي اۋەجايىنىڭ ءوزى جۇمىسىن ءجيى توقتاتۋعا ءماجبۇر بولىپ وتىر.
ۆيتسە-مينيستر ۇشۋ قاۋىپسىزدىگى مەن ايماقتاعى جالپى جاعداي كۇندەلىكتى سارالانىپ وتىراتىنىن, الداعى شەشىمدەر تەك قاۋىپ-قاتەردى جان-جاقتى باعالاعاننان كەيىن عانا قابىلداناتىنىن قاداپ ايتتى. ەستەرىڭىزگە سالا كەتەيىك, بۇعان دەيىن Air Astana اۋە كومپانياسى ناۋرىز ايىنىڭ سوڭىنا دەيىن دۋبايعا رەيستەرىن توقتاتقانىن حابارلاعان بولاتىن.
ەسكە سالا كەتەيىك, يزرايل 28 اقپاندا تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي قالعان. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
