بۇل – ءاز ناۋرىزدىڭ ءسانىن كەلتىرگەن سالتاناتتىڭ ءبىرى عانا ەمەس, كۇي ارقىلى ۇلتتىڭ ىشكى الەمىن جەتكىزگەن رۋحاني كەش بولدى. ساحنادا شىرقالعان ءاربىر تۋىندى – كوكتەمنىڭ لەبى, دالانىڭ تىنىسى, قازاقى بولمىستىڭ ءۇنى ىسپەتتى. كەشكە جينالعان جۇرتتىڭ قۇرامى دا سوعان ساي. ءوڭىردىڭ زيالى قاۋىمى, مادەنيەت سالاسىنىڭ وكىلدەرى, ونەرگە جانى جاقىن كورەرمەن ءبىر زالدا توعىستى.
كەش سەكەن تۇرىسبەكتىڭ «مالگاجدار» كۇيىمەن, «بيبىگۇل» قازاق حالىق اسپاپتار وركەسترىنىڭ ورىنداۋىندا اشىلدى. مۇكەيدىڭ «قوسباسقان قوڭىرى», جانتورەنىڭ «شالقىماسى», مالعاجدار اۋباكىروۆتىڭ «تالاس» كۇيلەرى ورىندالدى. ساحنا تورىندە سازسىرنايىن سىزىلتىپ ءمولدىر قيسامەدينوۆا «كەلشى ايىم» شىعارماسىن جەكە ورىنداۋدا جەتكىزدى. ال وركەستردىڭ سۇيەمەلدەۋىمەن ورىندالعان «ارۋ انا», « ۇلى دالا», «جولاۋشى» كۇيلەرى ۇلتتىق سارىننىڭ كەڭ تىنىسىن اشىپ, كورەرمەنگە كۇيدىڭ كوركەم كەڭىستىگىن اشتى. بۇدان سوڭ كەش قوناعى, مادەنيەت سالاسىنىڭ ۇزدىگى بيبىگۇل قيلىمحان ورىنداعان «اسىل انا», «قوڭىر قاز», «كوكتەمىم مەنىڭ, كوكتەمىم» اندەرى شالقىدى. اقىن نەسىپبەك ايت ۇلى مەن يران-عايىپتىڭ سوزدەرىنە جازىلعان بۇل تۋىندىلاردا اناعا دەگەن قۇرمەت, تابيعاتتىڭ جاڭعىرۋى, ادام جانىنداعى نازىك سەزىمدەر استاسىپ جاتتى. سونىمەن قاتار ايدان باۋىرجان ۇلى, تاڭات مۇقاشەۆ ءان شىرقادى. سەكەن تۇرىسبەكتىڭ ورىنداۋىنداعى «اقشاۋلى», «سەكەننىڭ قوڭىرى», «دارابوز», «كوڭىل تولقىنى» كۇيلەرى كورەرمەندى ەرەكشە كۇيگە بولەدى. اياۋلىم قۋانىشبەكوۆامەن بىرگە ورىندالعان «اقجاۋىن» كۇيى ايرىقشا شىقتى. كەش سوڭىندا شىرقالعان «ەركە قۇسىم» ءانى مەن تاتتىمبەتتىڭ «سارجايلاۋ» كۇيى كونتسەرتتىڭ مازمۇنىن تۇيىندەپ, ۇلتتىق ونەردىڭ ماڭگىلىك تىنىسىن تاعى ءبىر مارتە ايقىنداپ بەردى.
«ناۋرىز مەرەكەسى دەپ جۇرتقا شۋاقتى كۇندەر سىيلاعان بولدىق. كوكتەمنىڭ كوڭىل كۇيىن بەرۋگە تىرىستىق. كونتسەرتتىك باعدارلامانى دا سوعان قاراي ىڭعايلادىق. كەش كوڭىلدەن شىقتى دەپ ويلايمىن. ءبىزدىڭ سەمەيدىڭ كورەرمەنى بولەك. تالعام, تانىم دا باسقا», دەيدى كۇيشى.
سەمەي
