پرەمەر-مينيستر ديرەكتورلار كەڭەسىنىڭ مۇشەلەرىن جانە شاقىرىلعانداردى قازاقستاننىڭ جاڭا كونستيتۋتسياسىنىڭ قابىلدانۋىمەن قۇتتىقتاپ, وقيعانىڭ تاريحي ماڭىزىن اتاپ ءوتتى.
«قازاقستان ءوزىنىڭ ساياسي, الەۋمەتتىك-ەكونوميكالىق جانە قوعامدىق دامۋىنىڭ جاڭا كەزەڭىنە اياق باستى. ءبىزدىڭ بارلىعىمىزدى ەلىمىزدىڭ اتا زاڭىندا ورنىققان قاعيداتتاردى, نورمالار مەن پوستۋلاتتاردى جۇزەگە اسىرۋ بويىنشا جۇمىستار كۇتىپ تۇر», دەدى ولجاس بەكتەنوۆ.
ولجاس بەكتەنوۆ: جاڭا كونستيتۋتسيا مەملەكەت پەن قوعامنىڭ ورنىقتى دامۋىنا بەرىك نەگىز بولادى
«بايتەرەك» ۇيح باسقارما توراعاسى رۋستام قاراعويشيننىڭ مالىمەتىنشە, 2025 جىلى ەنشىلەس ۇيىمدار ارقىلى ەكونوميكانىڭ شيكىزاتتىق ەمەس سالالارىن قارجىلاندىرۋ كولەمى 8 ترلن تەڭگەنى قۇرادى, بۇل الدىڭعى جىلعى دەڭگەيدەن 96%-عا جوعارى. 7,1 ترلن تەڭگە سوماسىنداعى قولداۋ شامامەن 75 مىڭعا كومپانيا مەن ۇيىمدارعا كورسەتىلدى. حولدينگتىڭ كومەگىنە يە بولعان كاسىپورىنداردىڭ ەكسپورت كولەمى 1,9 ترلن تەڭگەگە جەتتى, بۇل 2024 جىلعى كورسەتكىشتەن ەكى ەسە كوپ.
جيىندا اگروونەركاسىپ كەشەنىن قولداۋعا باسا نازار اۋدارىلدى. 2025 جىلى اوك-ءتى قارجىلاندىرۋ 1,4 ترلن تەڭگەنى قۇراپ, وتكەن جىلمەن سالىستىرعاندا 31%-عا ارتتى. حولدينگتىڭ كومەگىمەن 11,5 مىڭنان استام اۋىل شارۋاشىلىعى تەحنيكاسى ساتىپ الىندى. حولدينگ قىزمەتىنىڭ ناتيجەسىندە 10 مىڭنان استام جاڭا جۇمىس ورنى اشىلدى.
مەملەكەت باسشىسىنىڭ اقمولا وبلىسىنداعى ەگىن جيناۋ ناۋقانى ماسەلەلەرى جونىندەگى جيىندا بەرگەن تاپسىرماسىن ورىنداۋ شەڭبەرىندە 2026 جىلعى ەگىس ناۋقانىن ەرتە قارجىلاندىرۋ بويىنشا جۇمىس جالعاسىپ جاتىر. ديرەكتورلار كەڭەسى «اگرارلىق نەسيە كورپوراتسياسى» ارقىلى كوكتەمگى دالا جانە ەگىن جيناۋ جۇمىستارىن قارجىلاندىرۋ ءۇشىن 300 ملرد تەڭگەگە دەيىن وبليگاتسيالار شىعارۋدى ماقۇلدادى. سونداي-اق وتاندىق وندىرىستەگى اۋىل شارۋاشىلىعى تەحنيكاسىنىڭ ليزينگىن 150 ملرد تەڭگەگە دەيىن قارجىلاندىرۋ قازاگروقارجى ارقىلى جانە الەۋمەتتىك وسال توپتار مەن كەزەكتە تۇرعان ازاماتتار ءۇشىن 100 ملرد تەڭگەگە دەيىن يپوتەكالىق نەسيەلەۋدى «وتباسى بانك» ارقىلى جۇزەگە اسىرۋ ماقۇلداندى.
2026 جىلى «بايتەرەك» حولدينگى ەكونوميكا سالالارىن قولداۋعا 8 ترلن تەڭگەگە دەيىن باعىتتاۋدى جوسپارلاپ وتىر. باسىم باعىتتاردىڭ قاتارىندا ونەركاسىپ پەن ينفراقۇرىلىمدى قارجىلاندىرۋ, اگروسەكتوردى قولداۋ, ەكسپورتتى دامىتۋ جانە حالىقتى قولجەتىمدى تۇرعىن ۇيمەن قامتاماسىز ەتۋ بار.
پرەمەر-مينيستر ولجاس بەكتەنوۆ ەكونوميكانىڭ ناقتى سەكتورىن قولداۋدى ودان ءارى كۇشەيتۋدىڭ, شيكىزاتتىق ەمەس سالالاردى دامىتۋدىڭ جانە حولدينگ قۇرالدارىنىڭ تيىمدىلىگىن قامتاماسىز ەتۋدىڭ ماڭىزدىلىعىن اتاپ ءوتتى. جيىن قورىتىندىسى بويىنشا 2025 جىلعى IV توقسانعا ارنالعان تاۋەكەلدەر بويىنشا كونسوليداتسيالىق ەسەپ, كورپوراتيۆتىك باسقارۋدى جەتىلدىرۋ ءىس-شارالارى جوسپارىن ورىنداۋ ناتيجەلەرى جانە 2025 جىلعا ارنالعان ديرەكتورلار كەڭەسىنىڭ قىزمەتىن باعالاۋ ناتيجەلەرى دە ماقۇلداندى.
