اقتوبە وبلىسىنىڭ پروكۋراتۋراسى پوليتسيا دەپارتامەنتى جانە ەكونوميكالىق تەرگەپ-تەكسەرۋ دەپارتامەنتىمەن بىرلەسىپ, ينتەرنەت الاڭدارى ارقىلى پسيحوتروپتىق زاتتاردى تاراتۋمەن اينالىسقان ۇيىمداسقان قىلمىستىق توپتىڭ قىزمەتىن توقتاتتى. تەرگەۋ بارىسىندا قىلمىستىق سحەما جۇيەلى تۇردە قۇرىلعانى انىقتالدى. ول «Telegram» مەسسەندجەرى ارقىلى «كونتاكتىسىز ساتۋ» تاسىلىمەن جۇزەگە اسقان.
قىلمىسكەرلەر تاپسىرىستاردى قاشىقتان قابىلداپ, تولەمدەردى «دروپپەرلەر» دەپ اتالاتىن تۇلعالاردىڭ بانكتىك كارتالارى ارقىلى جۇرگىزىپ وتىرعان. بۇل ءتاسىل ولاردىڭ ۇزاق ۋاقىت بويى زاڭسىز ارەكەتتەرىن جاسىرۋىنا مۇمكىندىك بەرگەن.
اكەسى ۇلىنا ەسىرتكى جاساۋدى ۇيرەتكەن: اقمولا وبلىسىندا ءىرى زەرتحانا جويىلدى
جەدەل-تەرگەۋ شارالارى مەن قارجى قوزعالىسىن تالداۋ ناتيجەسىندە توپ مۇشەلەرى قاراعاندى, سولتۇستىك قازاقستان, اقمولا جانە اقتوبە وبلىستارىندا, سونداي-اق استانا قالاسىندا انىقتالىپ, ۇستالدى. بارلىعى التى ادامنان تۇراتىن ۇيىمداسقان قىلمىستىق توپ اشكەرەلەندى. زاڭسىز اينالىمنان 10 كيلوگرامنان استام پسيحوتروپتىق زات تاركىلەندى.
اتالعان دەرەك بويىنشا وتكەن جىلدىڭ قىركۇيەگىندە اقتوبە وبلىسىنىڭ ارنايى پروكۋرورلارى «Qymyz shop» ينتەرنەت-دۇكەنى ارقىلى ەسىرتكى تاراتقان توپقا قاتىستى تەرگەۋدى اياقتاپ, ءىستى سوتقا جولداعان ەدى. 2026 جىلعى 17 ناۋرىزدا اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇكىم شىعارىپ, توپتىڭ التى مۇشەسىن كىنالى دەپ تانىدى. ولارعا 15 جىلدان 17 جىلعا دەيىن باس بوستاندىعىنان ايىرۋ جازاسى تاعايىندالدى.
سەمەيدە جي كومەگىمەن جالعان سۋرەت جاساعان تۇرعىن جاۋاپقا تارتىلدى
قۇقىق قورعاۋ ورگاندارىنىڭ مالىمەتىنشە, جىل باسىنان بەرى وڭىردە ەسىرتكى قىلمىسىنا قارسى كۇرەس جۇيەلى تۇردە جۇرگىزىلىپ كەلەدى. ماسەلەن, ەرىكتىلەر مەن كوللەدج ستۋدەنتتەرىنىڭ قاتىسۋىمەن ينتەرنەت-ەسىرتكى دۇكەندەرىن جارنامالايتىن 20-دان استام گراففيتي انىقتالىپ, جويىلدى. وسى دەرەكتەر بويىنشا ەكى سوتقا دەيىنگى تەرگەپ-تەكسەرۋ باستالدى.
