تاڭەرتەڭنەن باستاپ تۇرعىندار بەلسەندىلىك تانىتىپ, ءوز تاڭداۋلارىن جاساپ جاتىر. ۋچاسكەلەردە قاۋىپسىزدىك شارالارى قاتاڭ ساقتالعان. رەفەرەندۋم كوميسسياسىنىڭ مۇشەلەرى داۋىس بەرۋ ءتارتىبىن ءتۇسىندىرىپ جاتىر.
رەفەرەندۋمعا ءوز تاڭداۋىن جاساۋعا كەلگەن ەلوردا تۇرعىنى ءاشىم ابدىراحمەتوۆ جاڭا كونستيتۋتسيا جوباسىمەن تولىق تانىسىپ شىققانىن ايتتى.
«مەن ەلدىڭ بولاشاعى ءۇشىن كوپ ەڭبەك سىڭىرگەن اداممىن. قازىر 74 جاسقا كەلسەم دە ەل ءومىرى ءۇشىن ماڭىزدى شارالاردان تىس قالعان ەمەسپىن. ءبىز اعا ۇرپاق تاۋەلسىزدىكتىڭ قادىرىن ءبىر كىسىدەي بىلەمىز. قازىردىڭ وزىندە دۇنيەجۇزىندە ءتۇرلى سوعىس ءورتى تۇتانىپ جاتقانىن ەستىپ وتىرمىز. وسىنداي كەزدە ەلىمىزدىڭ تىنىشتىعىنا, تۇراقتىلىعىنا شۇكىرشىلىك ەتەمىز. جاستارىمىزدىڭ بولاشاعى بۇدان دا جارقىن بولارىنا سەنەمىن. بۇگىن رەفەرەندۋمعا كەلىپ ازاماتتىق ۇستانىمىمدى ءبىلدىرىپ, ءوز تاڭداۋىمدى جاسادىم. بۇل مەنىڭ ارداگەر رەتىندە ەل دامۋىنا قوسقان ۇلەسىم دەپ بىلەمىن», دەيدى ول.
رەفەرەندۋم ۋچاسكەسىنە وتباسىمەن كەلىپ داۋىس بەرىپ جاتقان ازاماتتار دا جەتەرلىك. سونىڭ ءبىرى ۆيتالي يزاكوۆتىڭ وتباسى.
الماتىنىڭ ناۋرىزباي اۋدانىنداعى رەفەرەندۋم ۋچاسكەسىنە باتىرلار كەلدى
«بۇگىن رەفەرەندۋمعا ارنايى كەلىپ, ءوز داۋىسىمدى بەردىم. ءار ازامات ەلدىڭ بولاشاعىنا بەيجاي قاراماۋى كەرەك دەپ ويلايمىن. سوندىقتان وسىنداي ماڭىزدى شەشىم قابىلداناتىن كەزدە حالىقتىڭ پىكىرىن ءبىلدىرۋى وتە ماڭىزدى. تاڭەرتەڭنەن باستاپ سايلاۋ ۋچاسكەسىنە كەلىپ جاتقان ادامداردىڭ قاراسى دا كوپ ەكەن. بۇل – تۇرعىنداردىڭ بەلسەندىلىگىن كورسەتەدى. مەن دە ءوز ازاماتتىق مىندەتىمدى ورىنداپ, تاڭداۋىمدى جاسادىم. جۇبايىممەن, ەكى ۇلىممەن بىرگە كەلدىم. ويتكەنى, بالالارىمنىڭ رەفەرەندۋمنىڭ ماڭىزىن ساناسىنا سىڭىرە بەرگەندەرىن قالادىم», دەيدى وتاعاسى ۆيتالي يزاك.
جالپى №316 رەفەرەندۋم ۋچاسكەسىنە 2603, ال №317 رەفەرەندۋم ۋچاسكەسىنە 2680 سايلاۋشى تىركەلگەن. داۋىس بەرۋ ەلىمىزدىڭ بارلىق وڭىرلەرىندە تاڭعى ساعات 07:00-دەن باستالىپ, كەشكى 20:00-گە دەيىن جالعاسادى.
