ال بالا تۋعاندا بەرىلەتىن جاردەماقىنى 2026 جىلدىڭ باسىنان باستاپ رەسپۋبليكالىق بيۋدجەتتەن بارلىعى 10,1 ملرد تەڭگە سوماعا 50,9 مىڭ ادام قامتىلدى, ونىڭ ىشىندە اقپان ايىندا 4,5 ملرد تەڭگە سوماسىنا 22,4 مىڭ ادام الدى. بۇل جاردەماقىعا بالا تۋعان, اسىراپ العان, سونداي-اق قامقورلىققا العان بالالارى بار ەلىمىزدىڭ ازاماتتارى, قانداستار, سونداي-اق قازاقستاندا تۇراقتى تۇراتىن شەتەلدىكتەر ۇمىتكەر بولا الادى.
بالاعا كۇتىم جاسايتىن ادام مىندەتتى الەۋمەتتىك ساقتاندىرۋ جۇيەسىنە قاتىسۋشى بولىپ تابىلماعان جاعدايدا تۋعان, اسىراپ العان, سونداي-اق قورعانشىلىققا العان بالالارى بار, ەگەر ولار باسقا اتا-انانىڭ وتباسىندا ەسكەرىلمەسە, وگەي بالالارى بار ادامداردىڭ (وتباسىلاردىڭ) بالا كۇتىمىنە بايلانىستى جاردەماقى الۋعا قۇقىعى بار. ەسەپتى كەزەڭدە 1,5 جاسقا تولعانعا دەيىن بالا كۇتىمى بويىنشا جاردەماقىمەن 8,3 ملرد تەڭگە سوماسىندا ورتا ەسەپپەن 129,8 مىڭ ادام قامتىلدى, ونىڭ ىشىندە اقپان ايىندا 4,2 ملرد تەڭگە سوماسىنا 129,5 مىڭ ادام الدى.
بالا تۋىنا جانە بالا كۇتىمىنە ارنالعان مەملەكەتتىك جاردەماقىلاردىڭ مولشەرى رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەكىتىلگەن ايلىق ەسەپتىك كورسەتكىشكە (بۇدان ءارى – اەك) بايلانىستى بەلگىلەنەدى. 2026 جىلدىڭ باسىنان باستاپ مەملەكەتتىك جاردەماقىلاردىڭ مولشەرى 10%-عا يندەكستەلگەن.
بالا تۋىنا ارنالعان جاردەماقى مولشەرى:
- ءبىرىنشى, ەكىنشى, ءۇشىنشى بالاعا – 38,0 اەك نەمەسە 164 350 تەڭگە;
- ءتورتىنشى جانە ودان كەيىنگى بالالارعا – 63,0 اەك نەمەسە 272 475 تەڭگە.
بالا 1,5 جاسقا تولعانعا دەيىن ونىڭ كۇتىمىنە بايلانىستى تولەنەتىن جاردەماقى اي سايىن كەلەسىدەي مولشەردە تولەنەدى:
- ءبىرىنشى بالاعا – 5,76 اەك نەمەسە 24 912 تەڭگە;
- ەكىنشى بالاعا – 6,81 اەك نەمەسە 29 454 تەڭگە;
- ءۇشىنشى بالاعا – 7,85 اەك نەمەسە 33 952 تەڭگە;
- ءتورتىنشى جانە ودان كەيىنگى بالالارعا – 8,90 اەك نەمەسە 38 493 تەڭگە.
بۇدان باسقا جۇمىس ىستەيتىن ازاماتتارعا جۇكتىلىككە جانە بوسانۋعا, جاڭا تۋعان بالانى (بالالاردى) اسىراپ الۋعا بايلانىستى كىرىسىنەن ايىرىلعان جاعدايدا ماسق-تان تولەنەتىن الەۋمەتتىك تولەم جۇكتىلىگى جانە بوسانۋى بويىنشا بەرىلگەن دەمالىستىڭ بارلىق كۇندەرىنە تاعايىندالادى. تولەم مولشەرى جۇكتىلىگى جانە بوسانۋى بويىنشا ۋاقىتشا ەڭبەككە جارامسىزدىق پاراعى بەرىلگەنگە دەيىنگى سوڭعى 12 اي ىشىندە ماسق-عا الەۋمەتتىك اۋدارىمدار جۇرگىزىلگەن ورتاشا ايلىق كىرىسكە جانە ەڭبەككە جارامسىزدىق كۇندەرىنىڭ سانىنا بايلانىستى بولادى.
اتالعان بىرجولعى تولەمدى جىل باسىنان بەرى جالپى سوماسى 29,7 ملرد تەڭگەگە 30,8 مىڭ ادام الدى, ونىڭ ىشىندە اقپان ايىندا 12,9 ملرد تەڭگە سوماسىنا 13,8 مىڭ ادام الدى. ەسەپتى كەزەڭدە تاعايىندالعان تولەمنىڭ ورتاشا مولشەرى 1 158 107 تەڭگەنى قۇرادى.
8 ناۋرىز قارساڭىندا كوپبالالى انالارعا بەرىلەتىن جاردەماقى مولشەرى قانداي؟
سونداي-اق ماسق-دان بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى كىرىسىنەن ايىرىلۋ جاعدايى بويىنشا اي سايىنعى الەۋمەتتىك تولەم مىندەتتى الەۋمەتتىك ساقتاندىرۋ جۇيەسىنە قاتىسۋشىعا بالانىڭ تۋعان كۇنىنەن باستاپ تاعايىندالادى. تولەمنىڭ مولشەرى سوڭعى 2 جىلدا ماسق-عا الەۋمەتتىك اۋدارىمدار جۇرگىزىلگەن ورتاشا ايلىق كىرىستىڭ 40%-ن قۇرايدى. ەكى جانە ودان دا كوپ بالا تۋعان جاعدايدا تولەم ءار بالاعا جەكە تاعايىندالادى.
بالا كۇتىمىنە بايلانىستى جاردەماقى: قاڭتار ايىندا قانشا تەڭگە تولەندى؟
2026 جىلدىڭ 2 ايىندا بۇل تولەم 385,9 مىڭ ادامعا تاعايىندالدى, جالپى تولەمنىڭ سوماسى 64,1 ملرد تەڭگەنى قۇرادى. ونىڭ ىشىندە تولەم اقپان ايىندا 14 مىڭ الۋشىعا تاعايىندالدى, تولەمنىڭ سوماسى اقپان ايىندا 2,4 ملرد تەڭگەنى قۇرادى. ەسەپتى كەزەڭدە تولەمنىڭ اي سايىنعى ورتاشا مولشەرى – 78 394 تەڭگە.
