اۋىل شارۋاشىلىعى ونىمدەرىن ءوندىرۋ كولەمىنىڭ ارتۋى, زاماناۋي اگروتەحنولوگيالاردىڭ ەنگىزىلۋى جانە سالانى جۇيەلى مەملەكەتتىك قولداۋ ەكسپورت كولەمىن كەڭەيتۋگە جانە جاڭا نارىقتاردى يگەرۋگە مۇمكىندىك بەرىپ وتىر.
كوكتەمگى ەگىس جانە ەگىن جيناۋ جۇمىستارىن مەملەكەتتىك قولداۋ, قولايلى اۋا رايى جاعدايلارى جانە زاماناۋي تەحنولوگيالاردى قولدانۋدىڭ ارقاسىندا قازاقستان ەكى جىل قاتارىنان رەكوردتىق استىق ءونىمىن جينادى.
اۋىل شارۋاشىلىعى مينيسترلىگىنىڭ مالىمەتىنشە, بىلتىر ورتاشا ونىمدىلىك گەكتارىنا 16,3 تسەنتنەردى قۇراعان جاعدايدا 25,9 ميلليون توننا استىق جينالدى, ونىڭ 19,3 ميلليون تونناسى بيداي.
ءوندىرىس كولەمىنىڭ ءوسۋى ەكسپورت كولەمىنىڭ ارتۋىمەن قاتار ءجۇرىپ كەلەدى.
«2024-2025 ساۋدا ماۋسىمىنىڭ قورىتىندىسىنا سۇيەنسەك, استىق پەن ۇننىڭ استىق بالاماسىنداعى ەكسپورتى 15,3 ميلليون توننانى قۇراپ, الدىڭعى جىلمەن سالىستىرعاندا 60 پايىزعا ارتتى.
بيىلعى ساۋدا جىلىندا جاڭا ءونىم استىعىن جەتكىزۋ كولەمى 8,5 ميلليون تونناعا جەتتى, بۇل 2024 جىلدىڭ وسى كەزەڭىندەگى كورسەتكىشتەن 14 پايىزعا جوعارى», دەلىنگەن حابارلامادا.
قازاقستان استىعى قاشاندا ورتالىق ازيا ەلدەرى – وزبەكستان, تاجىكستان, قىرعىزستان جانە اۋعانستان نارىقتارىندا جوعارى سۇرانىسقا يە.
سونىمەن قاتار ەلىمىز ەكسپورت گەوگرافياسىن دا كەڭەيتىپ كەلەدى. ماسەلەن, استىق ۆەتنامعا, بىرىككەن اراب امىرلىكتەرىنە, سولتۇستىك افريكا ەلدەرىنە ەكسپورتتالىپ, يرانعا, ازەربايجانعا جانە گرۋزياعا جەتكىزىلىمدەر قايتا جانداندى.
ەۋروپا نارىقتارىنا نەگىزىنەن Durum جانە Hi-Pro سۇرىپتى جوعارى ساپالى بيداي ەكسپورتتالادى.
بىلتىر قىتايعا مال ازىقتىق ۇن جەتكىزۋ كولەمى 2,9 ميلليون توننانى قۇراپ, 2023 جىلمەن سالىستىرعاندا 2,4 ەسە ارتتى.
2024 جىلى قازاقستان بيداي ەكسپورتى بويىنشا الەمدە 10-ورىن, ال ارپا ەكسپورتى بويىنشا 9-ورىن يەلەندى.
استىقپەن قاتار ەلىمىز الەمدىك ۇن نارىعىندا جەتەكشى ورىندارىن ساقتاپ كەلەدى. ءوندىرىس كولەمى 3 ميلليون توننادان اسادى, ال ەكسپورت كولەمى 1,8 ميلليون تونناعا جەتىپ, 2024 جىلمەن سالىستىرعاندا 1,2 پايىزعا ءوستى.
ۇننىڭ نەگىزگى وتكىزۋ نارىقتارى – ورتالىق ازيا ەلدەرى, اۋعانستان, رەسەي جانە قىتاي.
مەملەكەت ەكسپورتتىق باستامالاردى قولداۋعا ايرىقشا نازار اۋدارادى.
استىقتى سىرتقا تاسىمالداۋ شىعىندارىن وتەۋ تەتىگىنىڭ مەرزىمى 2026 جىلعى 1 قىركۇيەككە دەيىن ۇزارتىلدى. بۇل جەتكىزىلىم كولەمىنىڭ قارقىنىن ساقتاۋعا جانە وتاندىق ءونىمنىڭ حالىقارالىق نارىقتاعى ورنىن نىعايتۋعا مۇمكىندىك بەرەدى.
اۋىل شارۋاشىلىعى ءونىمىن قايتا وڭدەۋ ۇلەسى جىل سوڭىنا دەيىن 70%-عا جەتەدى
بۇگىنگى تاڭدا قازاقستاننىڭ اۋىل شارۋاشىلىعى ونىمدەرى الەمنىڭ 72-دەن استام ەلىنە جەتكىزىلەدى. ەكسپورتتىڭ نەگىزگى باعىتتارى – ورتالىق ازيا ەلدەرى, ەۋرازيالىق ەكونوميكالىق وداق ەلدەرى, ەۋروپا وداعى ەلدەرى, اۋعانستان, تۇركيا جانە قىتاي.
سوڭعى بەس جىلدا اگروونەركاسىپ كەشەنى ونىمدەرىنىڭ ەكسپورتى 1,8 ەسە ءوسىپ, 3,8 ميللياردتان 7 ميلليارد اقش دوللارىنا جەتتى. وتكەن جىلى ەكسپورت كولەمى 36,9 پايىزعا ءوسىپ, 7 ميلليارد اقش دوللارىن قۇرادى. اگروونەركاسىپ كەشەنى ەكسپورتىنىڭ جالپى كولەمىندە وڭدەلگەن ءونىمنىڭ ۇلەسى 51,4 پايىزعا جەتتى.
ايتا كەتەيىك, بۇعان دەيىن سوڭعى 7 جىلدا قازاقستانداعى اۋىل شارۋاشىلىعى ءونىمىنىڭ جالپى كولەمى ەكى ەسەگە جۋىق ءوسىپ, 2019 جىلعى 5,2 ترلن تەڭگەدەن 2025 جىلى 9,8 ترلن تەڭگەگە جەتكەنىن حابارلاعان ەدىك.
