قازاقستانداعى جالپى پايدالانىمداعى كولىك جولدارى جەلىسىنىڭ جالپى ۇزىندىعى شامامەن 96 مىڭ شاقىرىمدى قۇرايدى. ونىڭ 25 مىڭ شاقىرىمى رەسپۋبليكالىق ماڭىزى بار جولدارعا, ال 71 مىڭ شاقىرىمى جەرگىلىكتى ماڭىزى بار جولدارعا تيەسىلى. ءىرى ينفراقۇرىلىمدىق جوبالاردى ىسكە اسىرۋ جاڭا كولىك دالىزدەرىن قالىپتاستىرۋعا, وڭىرلەردىڭ بايلانىسىن ارتتىرۋعا جانە جول جەلىسىنىڭ ساپاسىن ەداۋىر جاقسارتۋعا مۇمكىندىك بەردى.
كولىك مينيسترلىگىنىڭ مالىمەتىنشە, 2019 جىلى جەرگىلىكتى ماڭىزى بار اۆتوموبيل جولدارىنىڭ نورماتيۆتىك جاعدايداعى ۇلەسى 68 پايىزدى قۇراسا, بۇگىندە بۇل كورسەتكىش 91 پايىزعا جەتتى. رەسپۋبليكالىق ماڭىزى بار جولدار بويىنشا نورماتيۆتىك جاعدايداعى جولداردىڭ ۇلەسى 85 پايىزدان 94 پايىزعا دەيىن ءوستى.
«نەگىزگى جوبالاردىڭ ءبىرى – ەلىمىزدىڭ ءىرى قالالارى استانا مەن الماتى اراسىنداعى كولىك قاتىناسىن قامتاماسىز ەتەتىن «قاراعاندى – الماتى» اۆتوجولىن رەكونسترۋكتسيالاۋ بولدى. جوبا اياسىندا تراسسانىڭ جەكەلەگەن ۋچاسكەلەرى كەڭەيتىلىپ, كوپىرلەر مەن جول وتپەلەرى جاڭعىرتىلىپ, جاڭا كولىك ايرىقتارى سالىندى», دەپ جازدى مينيسترلىك.
سونىمەن قاتار «تالدىقورعان – وسكەمەن» اۆتوجولىندا رەكونسترۋكتسيا جۇرگىزىلىپ, زاماناۋي اسفالتبەتونجامىلعىسى توسەلىپ, جول ينفراقۇرىلىمى جاڭارتىلدى.
وتكەن جىلى قىتايمەن مەملەكەتتىك شەكاراعا شىعۋدى قامتاماسىز ەتەتىن جانە شىعىس باعىتىنىڭ ترانزيتتىك الەۋەتىن كۇشەيتەتىن «قالباتاۋ – مايقاپشاعاي» تراسساسىن رەكونسترۋكتسيالاۋ اياقتالدى.
وسى جىلدار ىشىندە ىسكە اسىرىلعان ءىرى جوبالار قاتارىندا «قوستاناي – دەنيسوۆكا», «اقتوبە – قاندىاعاش –اتىراۋ» اۆتوجولدارىن, سونداي-اق «استانا –پاۆلودار», «اقتاۋ – جەتىباي», «مەركى – بۋرىلبايتال», «اتىراۋ – استراحان» تاسجولدارىنىڭ رەكونسترۋكتسياسى دا بار. بۇل جولدار وڭىرارالىق قاتىناستى دامىتۋدا جانە ەل ىشىندەگى ەكونوميكالىق بايلانىستاردى نىعايتۋدا ماڭىزدى ءرول اتقارادى.
جەكەلەگەن ماڭىزدى جوبا رەتىندە «ۇشارال – دوستىق» اۆتوموبيل جولىن جاڭعىرتۋدى اتاۋعا بولادى. جوبانى ىسكە اسىرۋ جول قوزعالىسىنىڭ قاۋىپسىزدىگىن ارتتىرۋعا جانە قازاقستان-قىتاي شەكاراسىنداعى لوگيستيكالىق توراپپەن كولىك بايلانىسىن جاقسارتۋعا مۇمكىندىك بەردى.
قىزىلوردا وبلىسىنىڭ اۋماعىندا «قىزىلوردا –جەزقازعان» اۆتوجولى رەكونسترۋكتسيالاندى. كوپتەگەن جىلدار بويى وسى تراسسانىڭ جاي-كۇيى جۇرگىزۋشىلەر مەن جولاۋشىلار تاراپىنان سىنعا ۇشىراپ كەلدى. قازىرگى ۋاقىتتا جولدىڭ ۇلىتاۋ وبلىسى اۋماعىنداعى ۋچاسكەلەرىن رەكونسترۋكتسيالاۋ جالعاسۋدا.
«ۇزىناعاش – وتار» جوباسى اياقتالدى, سونىڭ ارقاسىندا الماتى مەن شىمكەنت اراسىنداعى كولىك ءدالىزىنىڭ نەگىزگى ۋچاسكەلەرىنىڭ بىرىندە ءتورت جولاقتى قوزعالىس قالىپتاستى.
سونىمەن قاتار, قازاقستانداعى ەڭ ءىرى بۇقتىرما سۋ قويماسى ارقىلى وتەتىن كوپىر جانە شاقپاق-بابا اسۋىنداعى اۆتوموبيل توننەلى پايدالانۋعا بەرىلدى.
سوڭعى جىلدارداعى ەڭ ءىرى ينفراقۇرىلىمدىق جوبالاردىڭ ءبىرى – 2023 جىلى پايدالانۋعا بەرىلگەن ۇلكەن الماتى اينالما اۆتوموبيل جولى ء(ۇاااج) بولدى. جولدىڭ كوپشىلىك ۋچاسكەلەرىندە التى جولاق, ال جەكەلەگەن بولىكتەرىندە ءتورت جولاقتى قوزعالىس بار. جوبا اياسىندا جەتى كولىك ايرىعى, ونداعان كوپىرلەر مەن جول وتپەلەرى سالىندى. بۇل قۇرىلىس مەملەكەت پەن جەكە سەكتور ارىپتەستىگى اياسىندا جۇزەگە اسىرىلىپ, ورتالىق ازياداعى اۋقىمى جاعىنان ەڭ ءىرى ينفراقۇرىلىمدىق جوبالاردىڭ قاتارىنا قوسىلدى.ء ۇاااج ترانزيتتىك قاتىناستى الماتى قالاسىنىڭ سىرتىنا شىعارۋعا مۇمكىندىك بەرىپ, قالانىڭ كوشە-جول جەلىسىنە تۇسەتىن جۇكتەمەنى ايتارلىقتاي تومەندەتتى.
بۇدان باسقا, مەملەكەت باسشىسىنىڭ باستاماسى بويىنشا رەسپۋبليكالىق ماڭىزى بار اۆتوموبيل جولدارىن ورتاشا جوندەۋدىڭ اۋقىمدى باعدارلاماسى ىسكە اسىرىلىپ جاتىر. جوبا اياسىندا جالپى ۇزىندىعى شامامەن 10 مىڭ شاقىرىم جول قامتىلماق. جۇمىستار ەلدىڭ نەگىزگى باعىتتارىندا, ونىڭ ىشىندە «جەزقازعان – پەتروپاۆل», «قاراعاندى – قارقارالى», «قوستاناي – مامليۋتكا», سونداي-اق «وسكەمەن – سەمەي» تاسجولدارىندا جۇرگىزىلۋدە.
ايىپپۇل ارقالاپ جۇرمەڭىز: الماتى – استانا تاسجولىندا جاڭا كامەرالار ىسكە قوسىلدى
بيىل ورتاشا جوندەۋمەن شامامەن 5 مىڭ شاقىرىم جولدى قامتۋ جوسپارلانىپ وتىر, ال جىل سوڭىنا دەيىن جاڭارتىلعان تراسسالاردىڭ شامامەن 2 مىڭ شاقىرىمىن پايدالانۋعا بەرۋ كوزدەلگەن.
ينفراقۇرىلىمدىق جوبالاردى جۇزەگە اسىرۋدىڭ ارقاسىندا ستراتەگيالىق كولىك دالىزدەرى قالىپتاسىپ, جاڭارتىلدى. بۇل دالىزدەر ەلىمىزدىڭ وڭىرلەرى اراسىنداعى جىلدام ءارى قاۋىپسىز بايلانىستى ورناتادى, سونداي-اق قازاقستاننىڭ حالىقارالىق كولىك مارشرۋتتارىنىڭ ينتەگراتسياسىن قامتاماسىز ەتەدى. قازىرگى ۋاقىتتا قازاقستان اۋماعى ارقىلى جالپى ۇزىندىعى شامامەن 13 مىڭ شاقىرىم بولاتىن سەگىز حالىقارالىق اۆتوموبيل كولىك ءدالىزى وتەدى.
كوپتەگەن جىلدار بويى قارجىلاندىرۋ تاپشىلىعى بولعان جەرگىلىكتى جول جەلىسىن دامىتۋعا ەرەكشە نازار اۋدارىلۋدا. ىسكە اسىرىلىپ جاتقان جوبالار قاتارىندا «قاراعاندى – ۇشتوبە – قۇرىلىس» جولى, قىزىلوردا قالاسى اۋەجايىنا كىرەبەرىس جول, امانگەلدى اۋىلىنا كىرەبەرىس جانە باسقا دا بىرقاتار نىساندار بار.
پرەزيدەنت: 2025 جىلى 1500 شاقىرىم تەمىر جول سالىنىپ, جوندەۋدەن ءوتتى
رەسپۋبليكالىق جانە جەرگىلىكتى ماڭىزى بار جولداردى سالۋ جانە جوندەۋ قازىردىڭ وزىندە ايتارلىقتاي ەكونوميكالىق تيىمدىلىك بەرىپ وتىر. بيزنەستىڭ كولىكتىك شىعىندارى ازايىپ, جۇك تاسىمالى جىلدامداپ, وڭىرارالىق ساۋدا دامىپ, شاعىن جانە ورتا بيزنەس ءوسىپ, ايماقتاردىڭ ينۆەستيتسيالىق الەۋەتى وسۋدە. زاماناۋي اۆتوجول جەلىسى حالىقتىڭ موبيلدىلىگىن, ىشكى نارىقتىڭ دامۋىن جانە ەلدىڭ ترانزيتتىك الەۋەتىن نىعايتۋدى قامتاماسىز ەتە وتىرىپ, قازاقستاننىڭ ەكونوميكالىق كەڭىستىگىنىڭ كاركاسىنا اينالىپ كەلەدى.
