سۋرەتتى تۇسىرگەن – اسىلبەك ناسىپقالي ۇلى
مۇنداعى 31 ەلدى مەكەندە «اۋىلناي» دەگەن قوعامدىق لاۋازىم بەلگىلەنگەن. اۋىلنايلار – سول اۋىلدىڭ باس كوتەرگەن ازاماتى, ەل اعالارى, جالاقى الماسا دا تۋعان جەرىنىڭ مۇددەسى جولىندا كۇن-ءتۇن دەمەي, قايرات كورسەتىپ جۇرگەندەر. كوكتەرەك اۋىلدىق وكرۋگىنە قاراستى ساتىبالدى اۋىلىنىڭ اۋىلنايى رۋسلان سارباەۆ – «رايىمبەك» شارۋا قوجالىعىنىڭ جەتەكشىسى. رۋسلان ساميعوللا ۇلى بيىل ءوز اۋىلىندا دۇنيەگە كەلگەن ءار بالاعا 200 مىڭ تەڭگە قارجىلاي سىياقى تابىستايتىنىن مالىمدەگەن ەدى. جاقىندا سىيلىقتىڭ العاشقى لاۋرەاتتارى بەلگىلى بولدى.
شاعىن عانا ساتىبالدى اۋىلىندا نەبارى 253 ادام تۇرادى. جىل باسىنان بەرى مۇندا 4 بالا دۇنيە ەسىگىن اشقان ەكەن. كوكتەم مەرەكەسىنە وراي وتكەن سالتاناتتى جيىندا جاس بوسانعان نۇرلى قايىرعاليقىزى, گۇلدانا ادىلبەكقىزى, اياجان رۋسلانقىزى, اسەل بەيبىتقىزى اۋىلنايدىڭ ارنايى سىيلىعىنا يە بولدى.
– اۋىلنايلار جەرگىلىكتى اكىمدىكپەن, دەپۋتاتتارمەن, قوعامدىق كەڭەس مۇشەلەرى, كاسىپكەرلەر, شارۋا قوجالىقتارى, اۋىل تۇرعىندارىمەن تىعىز بايلانىستا جۇمىس ىستەيدى. قىزمەتى اۋىلدىق جەردىڭ وركەندەۋىنە, تۇرعىنداردىڭ ءال-اۋقاتىن ارتتىرۋعا باعىتتالعان. حالقىمىز انانى ءاردايىم ەرەكشە قۇرمەتتەگەن. بۇگىنگى شارا دا ارداقتى انالارعا, جاس وتباسىعا دەگەن شىنايى قۇرمەت پەن جاناشىرلىقتىڭ جارقىن كورىنىسى. ساتىبالدى اۋىلىنىڭ اۋىلنايى, ەل جاناشىرى رۋسلان ساميعوللا ۇلى سارباەۆ ءوز باستاماسىمەن 2026 جىلى دۇنيەگە ءسابيى كەلگەن 4 وتباسىعا 200 مىڭ تەڭگە كولەمىندە قارجىلاي قولداۋ كورسەتىپ وتىر. بۇل ومىرگە جاڭا كەلگەن سابيگە دەگەن اق تىلەكتىڭ, اناعا دەگەن قۇرمەتتىڭ, اۋىل بولاشاعىنا دەگەن سەنىمنىڭ بەلگىسى. مەملەكەت باسشىسى قاسىم-جومارت كەمەل ۇلى توقاەۆ: «تابىسقا جەتكەن ءاربىر كاسىپكەر ءوز اۋىل-ايماعىنىڭ وركەندەۋىنە ۇلەس قوسىپ, قارجى سالسا, ەلىمىزدەگى كوپتەگەن ەلدى مەكەن كوركەيە تۇسەرى انىق», دەپ اتاپ وتكەن بولاتىن. بۇگىنگى يگى ءىس وسى ءسوزدىڭ ومىرشەڭدىگىن دالەلدەيتىن ناقتى قادام, – دەدى قازتالوۆ اۋدانىنىڭ اكىمى اسلانبەك سارقۇلوۆ.
دارىگەرلەردىڭ مالىمەتىنشە, بيىل ساتىبالدى اۋىلىندا تاعى 10 وتباسى ءسابيلى بولادى ەكەن. دەمەك اۋىلنايدىڭ سىيلىعى دەموگرافياعا وڭ اسەر ەتىپ جاتقان سياقتى. نارەستە كۇتكەن جاس وتباسىنىڭ بيۋدجەتىنە مەملەكەت قولداۋىنان بولەك, اۋىلداس كاسىپكەر تاعايىنداعان جورگەكپۇل دا قوسىلاتىنى البەتتە, جاقسى جاڭالىق.
– اۋىلىمىزدىڭ جاناشىرى رۋسلان اعامىزدىڭ باستاماسى جاس وتباسىلارعا ۇلكەن دەمەۋ بولدى. «بەرسەڭ بالاعا بەر», دەيدى حالقىمىز. ءبىز مۇنى بالامىزدىڭ نەسىبەسى دەپ بىلەمىز. ەل اعالارىنا مىڭ دا ءبىر راحمەت, – دەيدى جاس انا نۇرلى قايىرعاليقىزى.
ايتا كەتەيىك, ساتىبالدى ەلدى مەكەنىنە «قالادان – اۋىلعا» باعدارلاماسى اياسىندا سوڭعى ەكى جىلدا ەكى وتباسى كوشىپ كەلگەن ەدى. بۇيىرسا, بيىل تاعى ءبىر وتباسى قونىس اۋدارماقشى.
