قازاقستاننىڭ رەسەيدەگى ەلشىسى داۋرەن اباەۆ ءاليحان بوكەيحاننىڭ ءبىرىنشى مەملەكەتتىك دۋما دەپۋتاتى بولعانىن العا تارتىپ, الاش قايراتكەرىنىڭ ءبيۋستى رەسەي مەن قازاقستان حالىقتارىنىڭ ورتاق تاريحىنا قوسقان ۇلەسىنە قۇرمەت رەتىندە قويىلعانىن ايتتى. سونىمەن قاتار ەلشى ءاليحاننىڭ مۇراسى بۇگىندە ەكى ەل اراسىنداعى ستراتەگيالىق ارىپتەستىك قاعيداتتارىندا كورىنىس تاۋىپ جاتقانىن دا تىلگە تيەك ەتتى. سونداي-اق قايراتكەردىڭ ءبيۋستىن ورناتۋعا باستاماشى كاسىپكەر جانبولات نادىروۆقا العىسىن جەتكىزدى.
ءوز كەزەگىندە جانبولات نادىروۆ ءاليحاننىڭ ءومىرى مەن قىزمەتىن ءاردايىم ۇلگى تۇتاتىنىن ايتا كەلىپ, الاش كوشباسشىسىنا ەسكەرتكىش ورناتۋدىڭ ماڭىزدى ەكەنىنە توقتالدى. ونىڭ ايتۋىنشا, ەندى ماسكەۋگە كەلگەن مەيماندار ماسكەۋدەگى حالىق شارۋاشىلىعى جەتىستىكتەرى كورمەسىندەگى قازاقستان پاۆيلونىنا بارىپ, ءاليحاننىڭ ءبيۋستىن كورە الادى. ال اتالعان پاۆيلوننىڭ باسشىسى تامارا باباكوۆا كورمەگە كەلۋشىلەردىڭ كوپ ەكەنىن اتاپ ءوتىپ, ءبيۋستى كورۋگە كەلەتىندەر قاتارى ارتا تۇسەتىنىن جەتكىزدى.
سونىمەن قاتار ءبيۋستىڭ اشىلۋىنا ءاليحاننىڭ نەمەرە ءىنىسى, پروفەسسور نۇرىم بوكەيحانوۆ تا قاتىستى. ول اتاسىنىڭ ەل ءۇشىن وراسان زور ەڭبەك سىڭىرگەنىن ايتا كەلىپ: ء«اليحاننىڭ باستاماسىمەن ابايدىڭ ولەڭدەرى جيناقتالدى. ول تۇڭعىش ابايتانۋشى بولدى, كورنەكتى اقىن ءارى فيلوسوفتىڭ مۇراسىن حالىققا جەتكىزدى», دەدى.
ءاليحان ءبيۋستىنىڭ ماسكەۋدە اشىلۋىنىڭ ءمانى بار. سەبەبى ءاليحان 1922–1937 جىلدار ارالىعىندا 15 جىلداي ماسكەۋدە تۇردى. سول ارالىقتا «كۇنشىعىس» باسپاسىنىڭ قازاق باسقارماسىندا ادەبي قىزمەتكەر بولىپ جۇمىس ىستەدى. 1937 جىلى ناقاق اتۋ جازاسىنا كەسىلىپ, ورتەلگەن سۇيەگى ماسكەۋدەگى دون زيراتى اۋماعىنداعى شۇقىرعا تاستالدى. بۇل – كۇردەلى كەزەڭنىڭ ۇلكەن تراگەدياسى ەدى. ءبىر ايتا كەتەر فاكت: وسىعان دەيىن الەكەڭە ەسكەرتكىش سانكت-پەتەربورداعى مەملەكەتتىك دۋما عيماراتى – تاۆريا سارايىنا ورناتىلعانى ءمالىم.
