سۋرەتتى تۇسىرگەن – ەرلان ومار, «EQ»
ۇلتتىق تەستىلەۋ ورتالىعىنىڭ دەرەگىنە قاراعاندا, 2026 جىلى ۇلتتىق بىرىڭعاي تەستىلەۋدىڭ فورماتى وزگەرىسسىز قالادى. تالاپكەرلەر ءۇش مىندەتتى ءپاندى جانە تاڭداۋى بويىنشا ەكى بەيىندىك ءپاندى تاپسىرادى. ۇبت تاپسىرمالارىنىڭ جالپى سانى – 120. ونىڭ ىشىندە «قازاقستان تاريحى» ءپانى بويىنشا – 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن 10 تاپسىرمادان, سونداي-اق ەكى بەيىندىك ءپاننىڭ ارقايسىسىنان 40 تاپسىرمادان بەرىلەدى. ۇبت بويىنشا ەڭ جوعارى بالل دا وزگەرمەيدى, 140 بالدى قۇرايدى. تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالارعا ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك. سونىمەن قاتار تالاپكەرلەر ءوتىنىش بەرۋ كەزىندە تەستىلەۋ كۇنىن, ۋاقىتىن, پۋنكتىن وزدەرى تاڭدايدى.
ۇبت بارىسىندا كالكۋلياتور, حيميالىق ەلەمەنتتەردىڭ پەريودتىق جۇيەسى (مەندەلەەۆ كەستەسى) جانە تۇزداردىڭ ەرىگىشتىك كەستەسى تەستىلەۋ باعدارلاماسىندا قولجەتىمدى بولادى. تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. اپەللياتسياعا ءوتىنىش بەرگەن تەستىلەنۋشىلەردىڭ سەرتيفيكاتى اپەللياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە شىعادى.
ناۋرىز ايىنداعى ۇبت-عا قاتىسۋ ءوتىنىمىن بەرگەندەردىڭ ەڭ كوپ تاڭداعان بەيىندى پاندەر كومبيناتسياسى – «ماتەماتيكا-فيزيكا», ونى تالاپكەرلەردىڭ 18,7%-ى تاڭداعان. ياعني بۇل – بولاشاق مۇعالىمدەر, ينجەنەرلەر, مەحانيكتەر, تەحنيكتەر مەن تەحنولوگتەر, ەنەرگەتيكتەر, قۇرىلىسشىلار. ال 16,6%-ى – «بيولوگيا-حيميا», 10,3%-ى «شىعارماشىلىق ەمتيحان» پاندەرىن تاڭدادى, سايكەسىنشە بولاشاق مەديتسينالىق قىزمەتكەرلەر مەن شىعارماشىلىق سالاسىنىڭ ماماندارى.
ايتا كەتۋ كەرەك, بيىل ۇلتتىق تەستىلەۋ ورتالىعى تالاپكەرلەرگە لايىقتى ماماندىق تاڭداۋعا كومەكتەسەتىن «Edunavigator.kz» كاسىبي باعدار بەرۋ پلاتفورماسىن ىسكە قوستى. پلاتفورما بولاشاق ماماندىقتى سانالى تۇردە تاڭداۋعا مۇمكىندىك بەرىپ, جوعارى وقۋ ورىندارىنا ءتۇسۋ كەزىندە سەنىمدىلىكتى ارتتىرادى.
ۇبت-عا دايىندىق ساپاسىن ارتتىرۋ ماقساتىندا بايقاۋ سىناقتارى ىسكە قوسىلدى. وقۋ جىلىنىڭ باسىندا ۇلتتىق تەستىلەۋ ورتالىعىنىڭ رەسمي سايتىندا تالاپكەرلەرگە ارنالعان كومەكشى ماتەريالدار جاريالاندى. اتاپ ايتقاندا, ۇسىنىلاتىن ادەبيەتتەر ءتىزىمى, «قازاقستان تاريحى» جانە «دۇنيەجۇزى تاريحى» پاندەرى بويىنشا 100 نەگىزگى تاريحي داتانىڭ ءتىزىمى, «ينفورماتيكا» ءپانى بويىنشا تەرميندەر ءتىزىمى, سونداي-اق «قازاق ادەبيەتى» مەن «ورىس ادەبيەتى» پاندەرى بويىنشا مىندەتتى ادەبي شىعارمالاردىڭ تىزبەسى ۇسىنىلدى.
ەستەرىڭىزگە سالا كەتسەك, ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعاندار, وتكەن جىلعى مەكتەپ جانە كوللەدج تۇلەكتەرى, قازاقستان ازاماتى ەمەس ۇلتى قازاق تۇلعالار, شەتەلدە ءبىلىم العان ەل ازامات- تارى, مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
