قازاقستاندا ابونەنتتەر اراسىندا كەڭىنەن تانىمال بولعان اۆتوقوڭىراۋ قىزمەتى كەزەڭ-كەزەڭىمەن توقتاتىلادى. بۇل تۋرالى Kcell جانە Beeline كومپانيالارى حابارلادى.
Kcell جانە Activ ابونەنتتەرى ءۇشىن «ميكروقوڭىراۋ» قىزمەتى 30 ماۋسىمنان باستاپ جۇمىسىن توقتاتادى. وسى ۋاقىتقا دەيىن سەرۆيس بۇرىنعى تارتىپپەن قولجەتىمدى بولادى. كومپانيا وكىلدەرىنىڭ ايتۋىنشا, قازىرگى تاڭدا ابونەنتتەردىڭ باسىم بولىگى مەسسەندجەرلەردى, داۋىستىق حابارلامالاردى جانە باسقا دا تسيفرلىق بايلانىس قۇرالدارىن پايدالانادى. سوندىقتان اۆتوقوڭىراۋ قىزمەتىنە دەگەن قاجەتتىلىك ايتارلىقتاي تومەندەگەن.
اۆتوقوڭىراۋ مەن شەتەلدىك نومىرلەر ارقىلى جاسالاتىن شابۋىلدارعا قاشان توسقاۋىل قويىلادى؟
ال Beeline كومپانياسىنىڭ Beep Call قىزمەتى 1 شىلدەدەن باستاپ بارلىق ابونەنتتەر ءۇشىن وشىرىلەدى. وپەراتوردىڭ مالىمەتىنشە, كوپتەگەن پايدالانۋشىلار وتكىزىپ العان قوڭىراۋلاردان كەيىن كەلەتىن اۆتوماتتى قوڭىراۋلاردىڭ قولايسىزدىق تۋدىراتىنىن ايتىپ شاعىمدانعان.
سونىمەن قاتار Tele2 جانە Altel وپەراتورلارى ازىرگە بۇل قىزمەتكە قاتىستى رەسمي اقپارات جاريالاعان جوق. كومپانيالاردىڭ رەسمي سايتتارىندا دا اۆتوقوڭىراۋدى توقتاتۋ جونىندە حابارلاما جوق.
ۇيالى بايلانىس ءتاريفى 151%-عا قىمباتتادى: قىزمەت ساپاسىنا شاعىم كوبەيدى
ايتا كەتەيىك, مامىر ايىندا قازاقستاننىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى بايلانىس قىزمەتتەرىن كورسەتۋ قاعيدالارىنا وزگەرىستەر ەنگىزىلەتىنىن مالىمدەگەن بولاتىن. ۇسىنىلعان تۇزەتۋلەرگە سايكەس, اۆتوقوڭىراۋ قىزمەتىنە تىيىم سالىنىپ, وتكىزىپ العان قوڭىراۋلار تۋرالى اقپارات ابونەنتتەرگە تەك قىسقا ماتىندىك حابارلاما (SMS) ارقىلى جەتكىزىلمەك.
