ەلوردادا شومىلۋ ماۋسىمى رەسمي تۇردە باستالىپ, استانا قالاسىنىڭ توتەنشە جاعدايلار دەپارتامەنتى سۋ ايدىندارىنداعى قاۋىپسىزدىكتى قامتاماسىز ەتۋ جۇمىستارىن كۇشەيتتى.
قۇتقارۋشىلار ەسىل وزەنىندە كۇن سايىن پاترۋلدىك باقىلاۋ جۇرگىزىپ ءجۇر. سونىمەن قاتار قاۋىپتى اۋماقتاردا ءۇش ءموبيلدى قۇتقارۋ بەكەتى جۇمىس ىستەپ تۇر.
1 ماۋسىمدا اشىلادى: الماتى وبلىسىنىڭ جاعاجايلارى شومىلۋ ماۋسىمىنا دايىن
تۇرعىندار مەن قالا قوناقتارىنىڭ قاۋىپسىز دەمالىسىن قامتاماسىز ەتۋ ءۇشىن شومىلۋعا ارنالعان بەس رەسمي ورىن بەلگىلەنگەن. ال جابدىقتالماعان جانە قاۋىپتى ايماقتارعا شومىلۋعا تىيىم سالىنعانى جونىندە ارنايى ەسكەرتۋ بەلگىلەرى قويىلعان.
«سۋدا بولاتىن جازاتايىم وقيعالاردىڭ باسىم بولىگى شومىلۋعا ارنالماعان ورىنداردا تىركەلەدى. سوندىقتان تۇرعىندار مەن قوناقتاردى تەك رەسمي جاعاجايلاردا دەمالۋعا, بالالاردى قاراۋسىز قالدىرماۋعا جانە ماس كۇيدە سۋعا تۇسپەۋگە شاقىرامىز», دەدى استانا قالالىق تجد توتەنشە جاعدايلاردى جويۋ باسقارماسىنىڭ باستىعى باۋىرجان احمەتالين.
ۆەدومستۆو مالىمەتىنشە, سۋداعى قاۋىپسىزدىك تالاپتارىن بۇزعان ازاماتتارعا اكىمشىلىك جاۋاپكەرشىلىك قاراستىرىلعان. وتكەن جىلعى شومىلۋ ماۋسىمىندا جۇرگىزىلگەن رەيدتەر بارىسىندا 176 اكىمشىلىك حاتتاما تولتىرىلعان.
توتەنشە جاعدايلار دەپارتامەنتى ازاماتتاردى دەمالىس كەزىندە ساقتىق شارالارىن ساقتاپ, ءوز ءومىرى مەن جاقىندارىنىڭ قاۋىپسىزدىگىنە جاۋاپكەرشىلىكپەن قاراۋعا شاقىردى.
