ەندى قازاقستان استاناسى مەن موڭعوليانىڭ باس قالاسى ۇلان-باتىر اراسىندا تۇراقتى اۋە قاتىناسى جولعا قويىلدى. جاڭا باعىت بويىنشا رەيستەردى SCAT اۋە كومپانياسى جۇزەگە اسىرادى.
ۇشاقتار اپتاسىنا ەكى رەت – سەيسەنبى جانە جۇما كۇندەرى قاتىنايدى. رەيستەر زاماناۋي Boeing 737 MAX اۋە كەمەلەرىمەن ورىندالادى.
كولىك مينيسترلىگىنىڭ مالىمەتىنشە, جاڭا باعىت حالىقارالىق مارشرۋتتار جەلىسىن كەڭەيتۋ جانە رەيستەر سانىن ارتتىرۋ جونىندەگى جۇمىستار اياسىندا اشىلىپ وتىر.
سونىمەن قاتار الماتى مەن ۇلان-باتىر اراسىنداعى اۋە قاتىناسى دا جالعاسىپ كەلەدى. بۇل باعىتتا موڭعوليالىق Hunnu Air كومپانياسى قىزمەت كورسەتەدى. قازىرگى ۋاقىتتا رەيستەر اپتاسىنا ءۇش رەت ورىندالسا, 6 ماۋسىمنان باستاپ ولاردىڭ سانى تورتكە دەيىن كوبەيەدى.
وسىلايشا قازاقستان مەن موڭعوليا اراسىنداعى ەكى باعىت بويىنشا اپتالىق رەيستەر سانى التىعا جەتەدى. ولار – استانا – ۇلان-باتىر جانە الماتى – ۇلان-باتىر باعىتتارى.
كولىك مينيسترلىگىنىڭ مالىمەتىنشە, اۋە قاتىناسىنىڭ كەڭەيۋى ەكى ەل اراسىنداعى ساۋدا-ەكونوميكالىق بايلانىستاردى نىعايتىپ, ينۆەستيتسيالىق ىنتىماقتاستىقتى دامىتۋعا, سونداي-اق تۋريزم مەن ىسكەرلىك ساپارلاردىڭ ارتۋىنا ىقپال ەتەدى.
بۇعان دەيىن VietJet Qazaqstan كومپانياسى جازعى تۋريستىك ماۋسىمدا استانادان بالقاش, ءۇرجار جانە ءۇشارال باعىتتارىنا سۋبسيديالاناتىن ىشكى رەيستەر اشاتىنىن حابارلاعان بولاتىن.
