فوتو: جي كومەگىمەن جاسالعان
ماسەلەن, يتاليادا وتكەن ححV قىسقى وليمپيادا ويىندارىندا شورت-ترەك شەبەرلەرى دەنيس نيكيشا مەن ابزال اجىعاليەۆ جەكەلەي سىنداردا ۇزدىك وندىق قاتارىنان كورىنىپ, وتاندىق شورت-ترەكتىڭ الەۋەتتى ەكەنىن دالەلدەدى. سونداي-اق الەم كۋبوگى كەزەڭدەرىندە كوزگە ءتۇسىپ جۇرگەن ءادىل عالياحمەتوۆ پەن ولگا تيحونوۆانىڭ ونەرى ورەندەردىڭ بويىندا شورت-ترەككە دەگەن شىنايى قىزىعۋشىلىق الاۋىن جاعىپ ءجۇر. ءدۇبىرلى دودالارداعى ايتۋلى جەتىستىكتەر قازاقستان مارتەبەسىن بيىكتەتىپ قانا قويماي, وسى سپورتتا جاڭا بۋىن وكىلدەرىنىڭ قالىپتاسۋىنا جول اشىپ جاتىر. ءبىز بۇل كوڭىل كونشىتەر كورىنىسكە استانا قالاسى اكىمدىگىنىڭ №2 بالالار مەن جاسوسپىرىمدەر مامانداندىرىلعان سپورت مەكتەبىنىڭ شورت-ترەكشى شاكىرتتەرىنىڭ جاتتىعۋ بارىسىندا كوز جەتكىزدىك.
«شورت-ترەكتىڭ ماركو رويسى مەن شىعارمىن...»: ابزال اجىعاليەۆ جانكۇيەرلەرىنە العىس ايتتى
شورت-ترەك سپورتىندا ميلليسەكۋندتار دا ماڭىزدى
جاس شورت-ترەكشىلەر جاتتىعۋ كەزىندە فيزيكالىق, پسيحولوگيالىق, تاكتيكا جانە تەحنيكالىق ازىرلىك بويىنشا شىڭدالادى. ولار وسى تورتتىكتى بويىنا ءسىڭىرۋ ءۇشىن اپتانىڭ 6 كۇنىندە 6 ساعاتىن مۇز ۇستىندە وتكىزەدى.
شورت-ترەك بويىنشا استانا قالالىق جاسوسپىرىمدەر قۇراماسىنىڭ مۇشەسى توميريس ەرباتىر ءۇشىن تىعىز جاتتىعۋ ۋاقىتى مەن مۇز ۇستىندەگى قاۋىپ قورقىنىشتى ەمەس. 16 جاستاعى سپورتشىنىڭ ايتۋىنشا, شورت-ترەكپەن 7 جىلدان بەرى ۇزدىكسىز شۇعىلدانۋىنا جىلدامدىققا دەگەن ۇمتىلىس پەن جەڭىسكە دەگەن قۇلشىنىس جىگەر بەرەدى.
«شورت-ترەك مۇزدا وتە جوعارى جىلدامدىقپەن جۇگىرۋدى تالاپ ەتۋىمەن ادامدى باۋراپ الادى. ال جىلدامدىقتى ساقتاي وتىرىپ, قاۋىپتى بۇرىلىستاردى قاتەلىكسىز وتكەرۋ ميسسياسى كىمدى دە بولسىن قىزىقتىرماي قويمايدى. سونىمەن قاتار, قارسىلاستارمەن سايىسقا تۇسكەندە ولاردى باسىپ وزۋ ءۇشىن لوگيكانى قوسىپ, سىني ويلاي الۋ قاجەت. سول ارقىلى ولاردى اينالىپ ءوتىپ, ءتيىمدى تريۋكتار جاساپ, مارە سىزىعىن ءبىرىنشى كەسۋگە بولادى. ايتا كەتەرلىگى ناتيجەنىڭ بارلىعى ۋاقىت كورسەتكىشى بويىنشا سارالانادى. سوندىقتان شورت-ترەكتە ميلليسەكۋندتار شەشۋشى ورىنعا شىعىپ جاتادى», دەيدى توميريس ەرباتىر.
شورت-ترەكپەن 5-7 جاستان باستاپ شۇعىلدانۋعا رۇقسات ەتىلەدى. وزگەلەرمەن سالىستىرمالى تۇردە كەشىرەك كونكي كيگەن توميريس اتالعان سپورتقا تەز بەيىمدەلگەن. ءتىپتى قالالىق, رەسپۋبليكالىق سىنداردا جۇلدەگەرلەر قاتارىنان كورىنىپ ۇلگەرگەن.
«شورت-ترەك – مەنىڭ سانالى تاڭداۋىم. سوندىقتان بۇل سپورت ءومىرىمنىڭ مازمۇندى بولشەگىنە اينالدى. قازاقستان بىرىنشىلىگىندە كوماندالىق ەستافەتا سىنىندا 1-ءشى تۇعىردان كورىنىپ, جازعى شورت-ترەكتەگى جەكەلەي سىندا ۇزدىك ۇشتىكتى تۇيىندەۋىم وزىمە دەگەن سەنىمىمدى ارتتىردى», دەيدى جاس شورت-ترەكشى.
ال كىشى قۇراما باپكەرى راحات قاسەن ۇلى ەل چەمپيوناتىندا جۇلدەگەر بولۋدىڭ ءوزى جوعارى جەتىستىك ەكەنىن اتاپ ءوتتى. سەبەبى رەسپۋبليكالىق دەڭگەيدە ونەر كورسەتۋ ءۇشىن سپورتشى كەمى 1-2 جىل ۋاقىتىن جاتتىعۋعا ارنايدى.
«شورت-ترەكتە باسقا سپورت تۇرلەرىندەگىدەي 4-5 اي جاتتىعىپ, جارىستا باق سىناۋعا رۇقسات ەتىلە بەرمەيدى. الدىمەن سپورتشى مۇز ۇستىندە ءوزىن ەركىن سەزىنۋ ءۇشىن تەر توكسە, ودان كەيىن تەحنيكالىق تاسىلدەردى مەڭگەرۋ كەرەك. كونكيمەن جۇگىرۋ جانە شورت-ترەكتى سالىستىراتىن بولساق, شورت-ترەكشىلەر فينالعا جەتۋ ءۇشىن ءبىر كۇندە 4-5 رەت مۇزعا شىعىپ, ۋاقىت كورسەتكىشىنە جۇگىرەدى. كونكيمەن جۇگىرۋشىلەر ءبىر كۇندە 1-اق رەت سايىسادى. شورت-ترەكتە كوپ اينالىم بولاتىندىقتان, سپورتشى كۇشىن ءار كەزەڭگە لايىقتى بولە ءبىلۋى ءتيىس. قاي ماڭدا, نەشىنشى اينالىمدا وزۋ كەرەك ەكەنىن بالا ىشتەي ەسەپتەي الۋى ءتيىس. ونىڭ بارلىعىنا جاتتىعۋ كەزىندە داعدىلانامىز. تەحنيكالىق تۇرعىدا تالانتتى بالا جەتىستىككە تەزىرەك جەتىپ جاتادى», دەيدى باپكەر.
قىسقى وليمپيادا ويىندارىنان كەيىن شورت-ترەككە قىزىعۋشىلار قاتارى ارتتى
بۇگىندە راحات حاسەن ۇلى باپتاپ جۇرگەن شاكىرتتەرىنىڭ التاۋى سپورت كانديتاتى دارەجەسىن يەلەنگەن. سونداي-اق 8-15 جاستاعى كىشى قۇراما وكىلدەرى قازاقستانمەن قاتار شەت ەلدەردەگى حالىقارالىق جارىستاردان جۇلدەمەن ورالىپ ءجۇر.
قازاقستان قۇراماسىنىڭ قىسقى وليمپياداداعى جولى: جىلدار مەن ناتيجەلەر
«ماۋسىم سايىن كورسەتكىشتەر كوڭىلدەن شىعىپ كەلەدى. وزدەرىڭىزگە بەلگىلى, كىشى قۇرام اۋەلى 222, 333 مەتر قاشىقتىقتا جارىسادى. جاس ەرەكشەلىگىنە ساي قاشىقتىق ۇزارا بەرەدى. ءار سوڭعى ناتيجەگە ساي شاكىرتتەرىم اتالعان قاشىقتىقتا جەكە رەكوردىن سەكۋندقا بولسىن العا جىلجىتىپ ءجۇر. ەلىمىزدە تابىستى ونەر كورسەتكەن شاكىرتتەرىم قىتاي, كورەيا ەلدەرىندەگى جارىستاردان مەدالمەن ورالدى», دەگەن ءسۇيىنشى جاڭالىعىن جەتكىزگەن راحات حاسەن ۇلى, اسىرەسە قىسقى وليمپيادادان كەيىن شورت-ترەككە قىزىعۋشىلار قاتارى قالىڭدايتىنىن جەتكىزدى.
«بۇل تۇرعىدا ۇلتتىق قۇراما مۇشەلەرىنىڭ ەڭبەگى وراسان. ولار قىسقى سپورت قارقىندى دامىعان مەملەكەتتەردىڭ وكىلدەرىمەن تەرەزەسى تەڭ ونەر كورسەتىپ, ەل بالالارىنا حالىقارالىق ارەنادا ۇلگى بولىپ ءجۇر. ماسەلەن, سوڭعى يتاليانىڭ قوس قالاسىندا وتكەن وليمپيادا ويىندارىن شاكىرتتەرىم تۇنگى ۋاقىت بولسا دا تالماي قارادى. بيىل تاعى ءبىر ەرەكشەلىك رەتىندە ولاردىڭ قاتارىنا اتا-انالاردىڭ دا قوسىلعانىن ايرىقشا ايتقىم كەلەدى. ءوز كەزەگىندە اتا-انالار سپورتشىعا نە ءۇشىن ەسكەرتۋ بەرگەنىن, مارەگە نە ءۇشىن جەتە الماعانىن بەلسەندى سۇراپ, جاۋاپ الىپ وتىردى. ال مۇنىڭ ءبارى الداعى ۋاقىتتا شورت-ترەككە كەلەتىن بالالاردىڭ قاتارىنىڭ ارتاتىنىن اڭعارتادى», دەيدى راحات حاسەن ۇلى.
سول سەكىلدى شورت-ترەكتەن كىشى قۇراما مۇشەسى حامزا ەركىن ۇلىن مۇز ايدىنىنا اناسى جەتەلەپ اكەلگەن. باستاپقىدا اناسىنىڭ ايتقان ءسوزىن جەرگە تاستاماعان ول 3 جىل وتسە دە شورت-ترەكپەن قوش ايتىسپاعان. سەبەبى, كوك مۇزداعى جوعارى جىلدامدىق ونىڭ دا جانىن باۋراعان.
«بۇل سپورتپەن تۇراقتى شۇعىلدانۋىما تانىمال شورت-ترەكشى ءادىل عالياحمەتوۆتىڭ دە اسەرى مول. ونىڭ ونەرىن ۇزبەي باقىلايمىن, جىلدامدىقتى يگەرە الۋى, قارسىلاستارىن باسىپ وزۋى سىندى ونەرىنەن ۇلگى الامىن. سوڭعى وليمپياداعا قاتىسقان شورت-ترەكشىلەردىڭ دە باعدارلاماسىن باقىلادىم. تەك ازداعان ساتتىلىك جەتىسپەدى. دەگەنمەن وليمپياداعا قاتىسۋدىڭ ءوزى ۇلكەن جەتىستىك. مەن دە وليمپيادا التىنىن الىپ, وعان قاتىسۋدى ارماندايمىن», دەدى حامزا ەركىن ۇلى.
