سۋرەت: massaget.kz
Wildberries جۇرگىزگەن زەرتتەۋگە سايكەس, ەل ازاماتتارى مەرەكەدە بۇرىن-سوڭدى بولماعان, توسىن سىي جاساۋدى قولاي كورەدى. ساتىپ الۋشىلاردىڭ 49%-عا جۋىعى قۇتتىقتاۋعا ورتا ەسەپپەن 15–40 مىڭ تەڭگە ارالىعىندا قارجى جۇمساۋدى كوزدەيدى. سىيلىق رەتىندە ەڭ سۇرانىسقا يە ساناتتارعا ءداستۇرلى تۇردە گۇل (52%), كوسمەتيكالىق ونىمدەر (44%) كىرەدى. سونىمەن قاتار مىنا تاۋارلار دا تىزىمدە كوش باستاپ تۇر: تۇرمىستىق تاۋارلار – 43%, پارفيۋمەريا – 31%, كونديتەرلىك ونىمدەر – 29%, سيمۆوليكالىق سىيلىقتار (قۇتتىقتاۋ حاتتارى) – 26%, حوببي تاۋارلارى – 19%, زەرگەرلىك بۇيىمدار مەن اكسەسسۋارلار – 17%.
Wildberries ساراپشىلارى ءداستۇرلى تاۋارلاردان بولەك, اقپان ايىنىڭ اياعىنا قاراي تەحنولوگيالىق جانە پراكتيكالىق سىيلىقتارعا دەگەن قىزىعۋشىلىقتىڭ ارتقانىن ايتادى. جاڭا تاۋارلاردىڭ ىشىندە كامەراسى مەن اۋدارماشىسى بار سمارت-كوزىلدىرىكتەر, اەروگريلدەر مەن شىعارماشىلىق جيىنتىق بار.
مەرەكەلىك سۇرانىستىڭ وڭىرلىك سيپاتى دا اركەلكى. اباي وبلىسىندا پارفيۋمەرياعا قىزىعۋشىلىق التى ەسە ارتسا, استانا قالاسى, اقمولا جانە قوستاناي وبلىستارىنىڭ تۇرعىندارى تۇرمىستىق تەحنيكاعا باسىمدىق بەرگەن. بۇل وڭىرلەردە نان پەشى مەن مۋلتيۆاركاعا تاپسىرىس كولەمى ەكى ەسە كوبەيگەن. ال پاۆلودار وبلىسى سۇلۋلىققا ارنالعان قۇرىلعىلار ساناتىندا العا شىعىپ, فوتوەپيلياتورعا سۇرانىس بىلتىرعى كەزەڭمەن سالىستىرعاندا 125% وسكەن. جامبىل وبلىسىندا ءۇي تۇرمىسىنا قاجەتتى تاۋارلاردى جاڭارتۋعا قىزىعۋشىلىق جوعارى بولسا, ەلدىڭ سولتۇستىك جانە شىعىس ايماقتارىندا مەرەكەگە وراي زياتكەرلىك سىيلىقتارعا سۇرانىس ارتىپ, شەت تىلدەرىندەگى كىتاپ ساتىپ الۋ كولەمى 40% ۇلعايعان.
جوعارىدا ايتقانداي, مەرەكە قارساڭىندا سۇرانىستان تۇسپەيتىن باستى سىيلىق – گۇل. ۇلتتىق ستاتيستيكا بيۋروسىنىڭ مالىمەتىنشە, 2024 جىلى ەلىمىز سوماسى 93,5 ملن دوللاردى قۇرايتىن رەكوردتىق 12,3 مىڭ توننا كەسىلگەن گۇل يمپورتتاعان. ەلىمىزگە گۇلدى ەڭ كوپ ەكسپورتتاعان ەلدەر – ەكۆادور, نيدەرلاند, قىتاي, كولۋمبيا, كەنيا. بۇل ەلدەردەن راۋشان, قىزعالداق پەن لالاگۇلدەردىڭ ەڭ تانىمال سۇرىپتارى اكەلىنگەن.
سۇرانىس ءوسىمى يمپورت كولەمى ەمەس, ىشكى نارىقتا دا بايقالادى. وتاندىق فەرمەرلەر كەيىنگى جىلدارى وزىندىك ونىمدەردى ءوسىرىپ جاتىر. وتكەن جىلعى مەرەكەدە جىلىجايلاردا 33 ملننان استام گۇل وسىرىلگەن. بۇل بۇرناعى جىلمەن سالىستىرعاندا 5 ەسە كوپ. وسىلايشا, مەرەكە قارساڭىندا وتاندىق وندىرۋشىلەر دە بەلسەندى قوسىلىپ, نارىقتىڭ شەتەلدىك ونىمدەرگە تاۋەلدىلىگىن تومەندەتەدى.
دەمەك, مەرەكەنىڭ ءوزىن ەكونوميكالىق فاكتور دەپ ەسەپتەۋگە بولادى. وسى ۋاقىتتا بولشەك ساۋدا اينالىمى ايتارلىقتاي ءوسىپ, شاعىن بيزنەسكە قوسىمشا كىرىس اكەلەدى. ءىس جۇزىندە بۇل قىسقامەرزىمدى بولعانمەن, ساۋدا مەن قىزمەت كورسەتۋ سەكتورىنا قۋاتتى سەرپىن بەرەدى.
