ۇلتتىق اكادەميالىق كىتاپحانادا مارال حاسەن قورى بار. قالامگەردىڭ سوڭىندا قالعان كىتاپتارىنىڭ تاڭداۋلىلارىن وسىندا وتكىزىپ, رەسمي تىركەتىپ جۇرگەن جارى – رىمبالا اپاي. بۇل كىسى جارى دۇنيە سالعان سوڭ, قاسيەتتى ءىسىن جالعاستىرىپ, نوبەل سىيلىعىنىڭ لاۋرەاتى سۆەتلانا الەكسيەۆيچتىڭ «تسينكوۆىە مالچيكي» پوۆەسىن قازاقشا سويلەتتى (2017). سونداي-اق گارري گرەيدىڭ «ودانجدى ۆ امەريكە» بەستسەللەرىن (2021), نۇراينا ساتباەۆانىڭ «سەرەبريانايا تامگا الكي» (2022) اڭگىمەلەر جيناعىن, يلماز دانيال ۇلىنىڭ «ناچالو. داستان ي ارمان» تاريحي ساگاسىن (2023) اۋدارسا, وسى جولى اتاقتى ۆيكتور گيۋگونىڭ «پاريجدەگى نوتر-دام سوبورىن» قازاقشالاپتى.
«امانات ارقالاعان انا» اتتى شىعارماشىلىق كەزدەسۋ كەشتە اتالعان اۋدارما كىتابىنىڭ تۇساۋكەسەر ءراسىمى ءوتىپ, وقىرماننىڭ قولىنا ءتيدى. كەزدەسۋدى «استانا اقشامى» گازەتىنىڭ شولۋشىسى, جۋرناليست امانعالي قالجانوۆ جۇرگىزدى. اۋدارماشىنىڭ باسقا دا ەڭبەكتەرىن كىرىكتىرە سويلەگەن مودەراتور اۋەلى ۇلتتىق اكادەميالىق كىتاپحانا ديرەكتورى كۇمىس سەيىتوۆا مەن جازۋشى ايگۇل كەمەلباەۆاعا ءسوز بەردى. كۇمىس حانىم رىمبالا اپايدى قۇتتىقتاپ, مادەنيەت جانە اقپارات ۆيتسە-ءمينيسترى رۋستام ءاليدىڭ العىسحاتىن تاپسىردى.
«وت باسى, وشاق قاسىن ادەبيەت اتتى ۇلى ۇعىمنىڭ ورداسىنا اينالدىرۋ ەكىنىڭ ءبىرىنىڭ قولىنان كەلە بەرمەيدى. مارال حاسەندەي اۋدارماشى ءارى وتە ءبىلىمدار ادامدار دا بۇرىننان كوپ بولماعان, بىراق قۇدايعا شۇكىر, بارىنا قۋانامىز. سوندىقتان حالىقتىڭ سانا-سەزىمىن كوتەرۋگە, ادەبيەت پەن رۋحانياتقا قىزمەت ەتكەن ءسىزدىڭ ەڭبەكتى ءوز باسىم جوعارى باعالايمىن ءارى ءاردايىم تىلەكتەسپىن», دەدى جازۋشى ايگۇل كەمەلباەۆا.
جۋرناليست ماعجان سادىحان دا مارال حاسەننىڭ كىسىلىك كەلبەتىنە كەڭىنەن توقتالىپ, رىمبالا اپايدىڭ ەڭبەگى قاستەرلەۋگە تۇراتىن مۇراعا اينالىپ كەتكەنىن لەپەس ەتتى. اۋدارماشى, دراماتۋرگ كەنجەباي احمەت, باسقا دا تۇلعالار اۆتورعا اقجارما تىلەكتەرىن جەتكىزدى.
