فوتو: ۆيدەودان الىنعان كادر
اپاتتىق-ديسپەتچەرلىك قىزمەتتىڭ مالىمەتىنشە, اتالعان ءۇي ورتالىقتاندىرىلعان ىستىق سۋ جۇيەسىنە قوسىلعان. الايدا ءۇش پاتەردىڭ يەسى ءوز بەتىنشە گازبەن سۋ جىلىتقىش قۇرىلعىلارىن ورناتقان. سونىمەن قاتار مۇرجالار دۇرىس ورناتىلماعان: قۇبىرلار قاۋىپسىزدىك ەرەجەلەرىنە سايكەس شاتىر دەڭگەيىنەن جوعارى ەمەس, قابىرعا ارقىلى جۇرگىزىلگەن.
مامانداردىڭ ايتۋىنشا, مۇرجادا تارتىلىس بولماعاندىقتان, ۋلى گاز بولمە ىشىنە قايتا تارالۋى مۇمكىن. سونداي-اق ۋلى گاز پاتەرلەر اراسىنداعى جەلدەتكىش كانالدار نەمەسە قۇرىلىس ساڭىلاۋلارى ارقىلى كورشى پاتەرلەرگە دە جايىلعان بولۋى ىقتيمال دەگەن بولجام بار.
«ەگەر پاتەرلەر اراسىندا قانداي دا ءبىر ساڭىلاۋلار بولسا, ۋلى گاز سوعان تارتىلىپ كەتۋى مۇمكىن. ءبىر پاتەر ءۇشىنشى قاباتتا, ەكىنشىسى ونىڭ ۇستىندە ءتورتىنشى قاباتتا, ال ءۇشىنشىسى ءدال قابىرعالاس ورنالاسقان», دەدى «QazaqGaz Aimaq» فيليالىنىڭ ءبولىم باستىعى نۇربەك راحمانوۆ.
ەسكە سالا كەتەيىك, قايعىلى جاعداي 3 ناۋرىزدا بايتۇرسىنوۆ كوشەسىندەگى كوپ قاباتتى ۇيلەردىڭ بىرىندە بولدى. ءبىر پودەزدەن ءتورت ادامنىڭ ءمايىتى تابىلعان ەدى. قازىرگى ۋاقىتتا سوت-مەديتسينالىق ساراپتاما تاعايىندالدى, سوڭعى شەشىم قورىتىندىدان كەيىن بەلگىلى بولادى.
