تسيفرلىق مونيتورينگ جۇيەسى مەملەكەت باسشىسىنىڭ 2023 جىلعى 11 ماۋسىمداعى تاپسىرماسى اياسىندا جۇزەگە اسىرىلىپ جاتىر. بۇگىندە وبلىستىڭ بەس ورمان شارۋاشىلىعىندا – باقاناس, قاسكەلەڭ, كۇرتى, شەلەك, قارادالا اۋماقتارىندا 18 اپپاراتتىق-باعدارلامالىق كەشەن ورناتىلعان.
جۇيەگە قوسىلعان زاماناۋي بەينەكامەرالار تاۋلىك بويى ءورت قاۋپى جوعارى ايماقتاردى باقىلاپ, ءتۇتىن مەن وت تۇتانۋ وشاقتارىن ەرتە كەزەڭدە انىقتايدى. اقپارات ناقتى ۋاقىت رەجىمىندە جەدەل قىزمەتتەرگە جەتكىزىلىپ, قاۋىپتىڭ الدىن الۋعا, ءورتتىڭ تارالۋىنا جول بەرمەۋگە مۇمكىندىك بەرەدى.
الماتى وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ مالىمەتىنشە, قابىلدانعان شارالار ايتارلىقتاي ناتيجە بەرگەن. 2022 جىلى ورمان ورتتەرى شارپىعان اۋماق 784 گەكتاردان اسسا, وتكەن جىلى بۇل كورسەتكىش 53 گەكتارعا دەيىن قىسقارعان. بۇل – شامامەن 14 ەسە از. مامانداردىڭ ايتۋىنشا, بەينەمونيتورينگ جۇيەسى ەرتە انىقتاۋ مەن جەدەل ارەكەت ەتۋ تيىمدىلىگىن ودان ءارى ارتتىرادى.
ءورتتىڭ الدىن الۋ شارالارى ورماندى قالپىنا كەلتىرۋ جۇمىستارىمەن دە تىعىز بايلانىستى. 2021–2025 جىلدارعا ارنالعان 2 ملرد اعاش وتىرعىزۋ جونىندەگى ۇلتتىق جوبا اياسىندا الماتى وبلىسىندا 43,7 ملن اعاش وتىرعىزىلىپ, 19,8 مىڭ گا اۋماق قامتىلدى. ورمان وتىرعىزۋ, تۇقىم سەبۋ جۇمىستارى 100%-عا ورىندالدى. الداعى جىلدارى بۇل جۇمىس جالعاسىن تابادى. وڭىردە قوسىمشا 8,9 ملن اعاش وتىرعىزىلىپ, 4 مىڭ گا جەر كوگالداندىرىلادى.
جاڭا تەحنولوگيالاردى ەنگىزۋ مەن اۋقىمدى ورماندى قالپىنا كەلتىرۋ جۇمىستارى تابيعي ورتتەردىڭ الدىن الىپ قانا قويماي, جاسىل ايماقتاردىڭ كولەمىن ۇلعايتىپ, ءوڭىردىڭ ەكولوگيالىق قاۋىپسىزدىگىن نىعايتۋعا سەپتىگىن تيىگىزەدى.
الماتى وبلىسى
