ەلىمىزدىڭ جەتەكشى شىعارماشىلىق ۇجىمدارىنىڭ ءبىرى سانالاتىن انسامبل كورەرمەنگە ەرەكشە كونتسەرتتىك باعدارلاما ۇسىندى. كەش بارىسىندا تىڭدارمان قازاق ءداستۇرلى مۋزىكاسىنىڭ الۋان ءتۇرلى كومپوزيتسيالارىمەن تانىسىپ, فولك, ەتنو-دجاز, ەتنو-پانك جانە زاماناۋي باعىتتاردىڭ ۇيلەسىم تاپقان اسەرلى مۋزىكالىق كەشتىڭ كۋاسى بولدى. باعدارلاما ۇلتتىق مۋزىكا ونەرىنىڭ ۇزدىك تۋىندىلارىن – كۇي, ءان, بي جانە ولاردىڭ زاماناۋي ينتەرپرەتاتسيالارىن قامتىدى.
كونتسەرتكە قازاقستاننىڭ ەڭبەك سىڭىرگەن قايراتكەرى ەربولات شالدىبەكوۆ, «دارىن» مەملەكەتتىك جاستار سىيلىعىنىڭ لاۋرەاتى ءادىلحان ماكين, سونداي-اق رەسپۋبليكالىق جانە حالىقارالىق بايقاۋلاردىڭ لاۋرەاتتارى زاڭعار مۇباراكوۆ, جانتۋ داداباەۆ, اققانات سماعۇلوۆا, جاسۇلان كارىم قاتىستى.
«Astana sazy» قازاق مەملەكەتتىك فولكلورلىق ءانسامبلى – قازاق حالىق شىعارماشىلىعىنىڭ دامۋىنا جانە دارىپتەلۋىنە زور ۇلەس قوسىپ جۇرگەن ونەر ۇجىمدارىنىڭ ءبىرى. فولكلورلىق انسامبل مۋزىكانتتارى كورەرمەندى دومبىرا, قوبىز, شەرتەر, شاڭقوبىز, سازسىرناي, سىبىزعى, اساتاياق, داۋىلپاز, تۇياقتاس, قوڭىراۋ جانە باسقا دا حالىق مۋزىكالىق اسپاپتارىنىڭ ۇنىمەن تانىستىرىپ كەلەدى. ءانسامبلدىڭ كوركەمدىك جەتەكشىسى – نۇركەن ياكياەۆ.
ونەر ۇجىمىنىڭ رەپەرتۋارى ءتۇرلى حالىقتاردىڭ ءداستۇرلى اسپاپتىق مۋزىكاسىنا, سونداي-اق زاماناۋي اۆتورلىق شىعارمالارعا باي. ۇجىم ارتىستەرى تاجىكستان, وزبەكستان, قىرعىزستان, تاياۋ شىعىس پەن ورتا ازيا ەلدەرىندە ونەر كورسەتىپ, حالىقارالىق مادەني ءىس-شارالارعا بەلسەندى قاتىسىپ كەلەدى.
