جارىستى ەركىن كۇرەس شەبەرلەرى باستادى. الاش توپىراعىنان اتتانعان 13 بالۋاننىڭ اراسىنان العاشقى كۇنى بولات ساقاەۆتىڭ عانا جەڭىس تۇعىرىنا كوتەرىلۋگە كۇش-جىگەرى جەتتى. 86 كگ سالماق دارەجەسىندە كۇش سىناسقان 33 جاستاعى ساقا سپورتشى العاشقى اينالىمداردا ەۋروپا بىرىنشىلىگىنىڭ قولا جۇلدەگەرى, تۇركيالىق وسمان گيوچەن مەن الەم چەمپيوناتىنىڭ كۇمىس جانە قولا جۇلدەگەرى, سلوۆاكيالىق بوريس ماكوەۆتان باسىم ءتۇستى. جارتىلاي فينالدا ساقاەۆ بىلتىر زاگرەبتە تورتكۇل دۇنيەنىڭ تەڭدەسسىزى دەپ تانىلعان گرەكيالىق يورگوس كۋيۋمتسيديسكە ەسە جىبەردى. ال قولا مەدال ءۇشىن تارتىستا بولات جاستار اراسىنداعى الەم چەمپيونى (U20), تۇرىكمەنستاندىق الپ ارسلان بەگەندجوۆتان ايلاسىن اسىردى.
ريزابەك ايتمۇحان ەركىن كۇرەستەن بىشكەكتەگى حالىقارالىق تۋرنيردە باق سىنايدى
كەلەسى كۇنى 97 كگ سالماقتا سىنعا تۇسكەن ريزابەك ايتمۇحانعا ايرىقشا سەنىم ارتتىق. باستاپقى باسەكەلەردە گرۋزيالىق اندرو مارگيشۆيلي, ۇندىستاندىق ۆيككي ۆيككي جانە يتاليالىق بەنجامين ءحونيستى ەش قينالماي ۇتقان قازاقتىڭ ايگىلى بالۋانى جارتىلاي فينالدا وليمپيادانىڭ ەكى, الەمنىڭ التى جانە ەۋروپانىڭ ءتورت دۇركىن چەمپيونى, رەسەيلىك ابدۋلراشيد سادۋلاەۆپەن جولىقتى. بۇل ايقاس «ورىس تانكىسىنىڭ» ايقىن جەڭىسىمەن اياقتالدى. ال قولا مەدال ءۇشىن باسەكەدە ريزابەك نەبارى 23 سەكۋندتا ۇندىستاندىق دجوينتي كۋماردىڭ تاس-تالقانىن شىعاردى.
تيرانادا 92 كگ سالماقتاعى الەم چەمپيوناتىنىڭ قولا جۇلدەگەرى, ازيانىڭ ءۇش دۇركىن چەمپيونى, يراندىق ءامىر حوسسەين فيرۋزپۋر ەلىمىزدىڭ ەكى بىردەي بەلدى بالۋانى ازامات داۋلەتبەكوۆ پەن كاميل كۋرۋگليەۆتىڭ جولىن بوگەدى. قوس جەرلەسىمىز ءۇشىنشى ورىن ءۇشىن ءوزارا كۇش سىناسىپ, بۇل بەلدەسۋدە ازاماتتىڭ اسىعى الشىسىنان ءتۇستى. ءسويتىپ, ەلىمىزدىڭ ەركىن كۇرەس شەبەرلەرى البانياداعى جارىستى ءۇش قولامەن قورىتىندىلادى.
ءدال سول مەجەدەن كورىنۋگە تاعى ءۇش سپورتشىمىزدىڭ زور مۇمكىندىگى بولدى. الايدا ولار شەشۋشى ساتتە ءسۇرىندى. اتاپ ايتساق, مەرەي بازارباەۆ (61 كگ) البانيالىق زەليمحان اباكاروۆقا, مايس اليەۆ (70 كگ) رەسەيلىك يبراگيم يبراگيموۆقا جانە نۇرسۇلتان ازوۆ (125 كگ) پولشالىق كاميل كوسچيولەككە جول بەرىپ, بەسىنشى ورىندى قاناعات تۇتتى.
ەركىن كۇرەستەن وتكەن جارىستىڭ جەڭىمپازدارى:
- 57 كگ – سپەنسەر ريچارد لي (اقش);
- 61 كگ – زاۋر ۋگۋەۆ (رەسەي);
- 65 كگ – سۋجەت سۋجەت ء(ۇندىستان);
- 70 كگ – ەرنازار اكماتاليەۆ (قىرعىزستان);
- 74 كگ – يۋنەس ەمامي (يران);
- 79 كگ – موحامماد ناحودي (يران);
- 86 كگ – يبراگيم كاديەۆ (رەسەي);
- 92 كگ – ءامىر حوسسەين فيرۋزپۋر (يران);
- 97 كگ – ابدۋلراشيد سادۋلاەۆ (رەسەي);
- 125 كگ – مەيسون پارريز (اقش).
ايەلدەر كۇرەسىنەن وتكەن جارىستى قازاق قىزدارى وتە قارقىندى باستادى. 50 كگ سالماقتاعى زەينەپ بايانوۆا كەدرا روزا رياندى (اقش), جاستار اراسىنداعى الەم چەمپيونى ميا ناكامۋرانى (جاپونيا) جانە جاسوپىرىمدەر اراسىنداعى الەم بىرىنشىلىگىنىڭ جەڭىمپازى مۋسكان مۋسكاندى ء(ۇندىستان) ەش كۇمانسىز جەڭدى. ودان كەيىن ءۇندىستاننىڭ تاعى ءبىر بەلدى بالۋانى پريانشي پراجاراتتى 13:2 ەسەبىمەن ەسەڭگىرەتكەن زەينەپ التىننان القا تاقتى.
كوماندالىق ارىپتەسىنىڭ جەڭىستى جولىن 55 كگ سالماق دارەجەسىندە سىنعا تۇسكەن لاۋرا الماعامبەتوۆا جالعاستىردى. پۋشپا پۋشپا ء(ۇندىستان), اناستاسيۋ بلايۆاس (گەرمانيا) جانە ليليا مالانچۋكتى (ۋكراينا) تىزە بۇكتىرگەن ول دا التىن تۇعىردان قول بۇلعادى.
