جەو قىزمەتكەرلەرىمەن اڭگىمەلەسۋ بارىسىندا ءماجىلىس توراعاسىنىڭ ورىنباسارى دانيا ەسپاەۆا جانە ادىلەت ءمينيسترى ەرلان سارسەمباەۆ ەنەرگەتيكتەردىڭ جۇمىسى ادامداردىڭ كۇندەلىكتى ومىرىنە تىكەلەي اسەر ەتەتىنىن اتاپ ءوتتى. سەبەبى ستانسانىڭ تۇراقتى قىزمەتى ۇيلەرگە جىلۋ بەرىلۋىن, مەكتەپتەردىڭ, اۋرۋحانالار مەن كاسىپورىنداردىڭ قالىپتى جۇمىس ىستەۋىن قامتاماسىز ەتەدى. ءدال وسىنداي ستراتەگيالىق نىساندار ارقىلى ازاماتتار مەملەكەتتىك ساياساتتىڭ ساپاسىن جانە قوعام الدىنداعى جاۋاپكەرشىلىك دەڭگەيىن سەزىنەدى.
دانيا ەسپاەۆا قولدانىستاعى كونستيتۋتسيانىڭ 1995 جىلى قابىلدانعانىن ەسكە سالىپ, وسى ۋاقىت ارالىعىندا ەلدىڭ قوعامدىق ومىرىندە, ىشكى جانە سىرتقى ساياساتىندا اۋقىمدى وزگەرىستەر ورىن العانىن اتاپ ءوتتى.
«مەملەكەت باسشىسى پارلامەنتتى جانە كونستيتۋتسيانى جاڭعىرتۋ ءۇشىن رەفورمالار قاجەت ەكەنىن ايتتى. ازاماتتاردان 2,5 مىڭنان استام ۇسىنىس كەلىپ ءتۇستى. 20 قاڭتاردا ولاردى قاراستىرۋ جانە وزگەرىستەر ەنگىزۋ ماقساتىندا كونستيتۋتسيالىق كوميسسيا قۇرىلدى», دەدى ءماجىلىس توراعاسىنىڭ ورىنباسارى.
جيىندا مەملەكەتتىڭ الەۋمەتتىك جاۋاپكەرشىلىگىن جانە ازاماتتاردىڭ قۇقىعىن قورعاۋدى بەكىتەتىن جاڭا كونستيتۋتسيا جوباسىنىڭ نورمالارىنا ەرەكشە نازار اۋدارىلدى. دانيا ەسپاەۆانىڭ ايتۋىنشا, بۇل قاعيداتتار ينفراقۇرىلىمدىق سالانىڭ ورنىقتى دامۋىنا ۇزاقمەرزىمدى قۇقىقتىق نەگىز قالىپتاستىرىپ, ستراتەگيالىق كاسىپورىنداردىڭ تۇراقتى, قاۋىپسىز ءارى بولجامدى جۇمىسىن قامتاماسىز ەتەدى.
كەزدەسۋ بارىسىندا ەرلان سارسەمباەۆ قاۋىپسىز ەڭبەك جاعدايلارىن, لايىقتى جالاقىنى جانە قىزمەتكەرلەردى الەۋمەتتىك قورعاۋ كەپىلدىكتەرىن بەكىتەتىن نورمالارعا جەكە توقتالدى. ءمينيستردىڭ سوزىنشە, بۇل كەپىلدىكتەردىڭ اتا زاڭ دەڭگەيىندە بەكىتۋىلۋى ەڭبەك ادامىن قورعاۋدى كۇشەيتەدى جانە مەملەكەتتىك ساياساتتا ادامنىڭ قۇندىلىعى مەن قادىر-قاسيەتىنىڭ باسىمدىعىن كورسەتەدى.
«كونستيتۋتسيادا العاش رەت مەملەكەتتىڭ جاۋاپكەرشىلىگى بەكىتىلدى: مەملەكەتتىك ورگاننىڭ نەمەسە لاۋازىمدى تۇلعانىڭ كىناسىنەن كەلتىرىلگەن زالال ءۇشىن تۇتاستاي مەملەكەت جاۋاپ بەرەدى. بۇل دەگەنىمىز, ادام جۇيەنىڭ تۇتقىنى بولماۋى كەرەك. مەملەكەت ازاماتقا قىزمەت ەتەدى. نەگىزگى ماقسات – مەملەكەتتىك اپپاراتتىڭ جۇمىسىن ادامداردىڭ قۇقىقتارى مەن مۇددەلەرىن قورعاۋعا باسىمدىق بەرەتىندەي قايتا قۇرۋ», دەدى مينيستر.
كەزدەسۋ قورىتىندىسىندا قاتىسۋشىلار كونستيتۋتسيا جوباسىنىڭ نەگىزگى باعىتتارى مەن نورمالارىن تالقىلاپ, ءوز پىكىرلەرىن ءبىلدىردى.
