دەلەگاتسيانى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا باستاپ باردى. كەزدەسۋگە قازاقستان رەسپۋبليكاسى پارلامەنتىنىڭ دەپۋتاتتارى, كونستيتۋتسيالىق كوميسسيا وكىلدەرى جانە باسقالارى قاتىستى.
جيىندا جاڭا كونستيتۋتسيا جوباسى مەن الداعى رەفەرەندۋمعا قاتىستى ءتۇسىندىرۋ جۇمىستارى جۇرگىزىلدى. قاتىسۋشىلار ايقىن ەرەجەلەر ۇستەمدىك ەتىپ, ازاماتتاردىڭ قۇقىقتارى قورعالاتىن, قوعام مەن بيلىك اراسىنداعى سەنىم نىعاياتىن تۇراقتى جانە ادىلەتتى مەملەكەت قۇرۋداعى اتا زاڭنىڭ ءرولىن تالقىلادى.
ايدا بالاەۆا زاماناۋي ءوندىرىس ءۇشىن تسيفرلاندىرۋدىڭ, ەكولوگيالىق جاۋاپكەرشىلىكتىڭ جانە ادامي كاپيتالدى دامىتۋدىڭ ماڭىزىنا توقتالىپ, اتالعان باسىمدىقتار جاڭا كونستيتۋتسيا جوباسىندا كورىنىس تاپقانىن جەتكىزدى.
«بۇل ادام ءۇشىن دە, ءوندىرىس ءۇشىن دە ماڭىزدى. سەبەبى دەرەكتەر قاۋىپسىزدىگى, ۇدەرىستەردىڭ تۇراقتىلىعى مەن سەنىم كۇندەلىكتى ءومىردىڭ اجىراماس بولىگىنە اينالدى. قازىرگى زامانعى زاۋىت ءۇشىن تسيفرلاندىرۋ مەن اۆتوماتتاندىرۋ – تەك تيىمدىلىك ەمەس, سونىمەن بىرگە جاۋاپكەرشىلىك: تەحنولوگيالىق ۇدەرىستەردى قورعاۋ, باسقارۋشىلىق, سەنىمدىلىك پەن ساپانىڭ كەپىلى. تابيعاتقا جاناشىرلىق, ەڭبەك قاۋىپسىزدىگى مەن وندىرىستىك ستاندارتتاردى ساقتاۋ دا ايرىقشا مانگە يە. قازىرگى ەكونوميكا تەحنولوگيالىق دامۋدى جانە ەكولوگيالىق جاۋاپكەرشىلىكتى تالاپ ەتەدى. كونستيتۋتسيادا بەكىتىلەتىن قۇندىلىقتار ورتاق باعداردى ايقىندايدى. قارقىندى دامۋ زامانىندا دا ادام قۇرمەت كورسەتۋى, زاڭ مەن تارتىپكە ادال بولۋ جانە بولاشاق الدىنداعى جاۋاپكەرشىلىكتى سەزىنۋى قاجەت. سونىمەن قاتار ادامي كاپيتالدى – ءبىلىمدى, عىلىمدى, يننوۆاتسيالاردى دامىتۋ باسىمدىعى ەرەكشە اتاپ وتىلگەن. ەلەكتروتەحنيكالىق سالا ءۇشىن بۇل قاعيداتتاردىڭ ءمانى زور. زاماناۋي ءوندىرىس قۇزىرەتتىلىككە, ينجەنەرلىك ويلاۋعا جانە ساپا مادەنيەتىنە سۇيەنەدى», دەدى ايدا بالاەۆا.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, «AMANAT» پارتياسى فراكتسياسى جەتەكشىسىنىڭ ورىنباسارى ەرلان سايروۆ جاڭا كونستيتۋتسيانىڭ نەگىزگى ەرەكشەلىكتەرىنىڭ ءبىرى – ونىڭ مەملەكەتتىك تىلدە, ياعني قازاق تىلىندە جازىلعانىن, سونداي-اق ءداستۇرلى مادەنيەتتى ساقتاۋ مەن ۇلتتىق قۇندىلىقتاردى قورعاۋ تۋرالى ناقتى نورمالاردى قامتيتىنىن ءسوز ەتتى.
«قازاقتا «ەلۋ جىلدا ەل جاڭا» دەگەن ماقال بار. الايدا بىزدە نەبارى 35 جىلدىڭ ىشىندە تۇبەگەيلى وزگەرىستەر ورىن الدى – بۇگىندە تسيفرلىق تەحنولوگيالار مەن جاساندى ينتەللەكت داۋىرىندە ءومىر ءسۇرىپ وتىرمىز. سوندىقتان جاڭا كونستيتۋتسياعا XXI عاسىردىڭ زاماناۋي ۇردىستەرى مەن باعىتتارى ەنگىزىلدى. سونىمەن قاتار مەملەكەتتىڭ الەۋمەتتىك مىندەتتەمەلەرى تولىق ساقتالادى», دەدى دەپۋتات.
«زەنچەنكو ي ك» ديرەكتورى گەننادي زەنچەنكو ءوز سوزىندە جۇرگىزىلىپ جاتقان رەفورمالارعا ەڭبەك ۇجىمدارىنىڭ بەلسەندى قاتىسۋىنىڭ ماڭىزىنا توقتالىپ, ەلدەگى وزگەرىستەر ازاماتتاردىڭ سۇرانىستارىنا تىكەلەي بايلانىستى ەكەنىن ايتتى.
«سىزدەر – زاماناۋي كاسىپورىندا ەڭبەك ەتىپ جاتىرسىزدار. بۇگىندە ءوندىرىستى دامىتىپ وتىرعان – جاستار. باسقارۋ جۇيەسىندە, تاسىلدەردە, سايلاۋ بارىسىندا كورىپ وتىرعان وزگەرىستەر – جاي عانا ۇران ەمەس. پرەزيدەنت مەملەكەت حالىقتىڭ ءۇنىن ەستۋى ءتيىس ەكەنىن ايتتى. ازاماتتاردىڭ وتىنىشتەرى سارالانعان كەزدە زاڭنامادا قايتا قاراۋدى قاجەت ەتەتىن ماسەلەلەر بار ەكەنى ايقىندالدى. بۇل اسىرەسە وڭىرلەردە, سونىڭ ىشىندە سولتۇستىك قازاقستان وبلىسىندا كادر تاپشىلىعى ماسەلەسى ايقىن سەزىلەدى. سوندىقتان رەفەرەندۋمداعى باستامالار وسىنداي وزەكتى ماسەلەلەرمەن تىكەلەي بايلانىستى», دەدى ول.
كەزدەسۋ سوڭىندا زاۋىت قىزمەتكەرلەرى ءوز سۇراقتارىن قويىپ, ۇسىنىستارىن ءبىلدىردى. سونداي-اق رەفەرەندۋم ءاربىر ازاماتقا ەل بولاشاعىنا ءوز ۇلەسىن قوسۋعا مۇمكىندىك بەرەتىن ماڭىزدى قادام ەكەنى اتاپ ءوتىلدى. ءار ازاماتتىڭ ءوز ۇستانىمىن ءبىلدىرۋى قوعامدىق جاۋاپكەرشىلىكتى ارتتىرىپ, مەملەكەتىمىزدىڭ دامۋىنا وڭ اسەرىن تيگىزەرى انىق.
