فوتو: اشىق دەرەككوز
قولدانىستاعى زاڭ بويىنشا ساباق ۇستىندە سمارتفون قولدانۋعا تىيىم سالىنادى. اتاپ ايتقاندا, حات الماسۋ, الەۋمەتتىك جەلىلەرگە كىرۋ, ۆيدەو كورۋ, ويىن ويناۋ – ءبارى دە وقۋ پروتسەسى كەزىندە رۇقسات ەتىلمەيدى. دەگەنمەن, وقۋشىلارعا تەلەفوندى مەكتەپكە الىپ كەلۋگە بولادى. ونى تەك ءۇزىلىس كەزىندە, توتەنشە جاعدايدا نەمەسە مۇعالىمنىڭ رۇقساتىمەن وقۋ تاپسىرماسىن ورىنداۋ ءۇشىن قولدانۋعا مۇمكىندىك بار.
ەرەجەنى العاش رەت بۇزعان جاعدايدا ەسكەرتۋ جاسالادى. قايتالاپ بۇزسا, جاۋاپكەرشىلىك اتا-انالارعا جۇكتەلەدى. ايىپپۇل كولەمى 5 ايلىق ەسەپتىك كورسەتكىشكە دەيىن جەتۋى مۇمكىن (21 625 تەڭگە).
قازىرگى تاڭدا پارلامەنت ماجىلىسىندە مەكتەپ اۋماعىندا سمارتفون قولدانۋدى تولىق شەكتەۋدى كوزدەيتىن زاڭ جوباسى قارالۋدا. بۇل قۇجات پەداگوگ مارتەبەسى مەن ءبىلىم سالاسىنا قاتىستى زاڭنامالارعا وزگەرىستەر ەنگىزۋدى ۇسىنادى.
قولدانىستاعى نورما بويىنشا مەكتەپتەر ءۇزىلىس كەزىندەگى تەلەفون پايدالانۋ ءتارتىبىن وزدەرى انىقتاي الادى. ال جاڭا ۇسىنىسقا سايكەس, تىيىم تەك ساباقتا عانا ەمەس, بۇكىل وقۋ كۇنى بويى, ياعني ۇزىلىستەردە دە كۇشىنە ەنۋى مۇمكىن.
بۇل جاعدايدا وقۋشىلار مەكتەپتە مۇلدە سمارتفون قولدانا المايدى. ەرەكشە جاعدايلار تەك ۋاكىلەتتى ورگان بەكىتكەن ارنايى ەرەجەلەر ارقىلى قاراستىرىلماق.
ۇسىنىلعان تۇزەتۋلەرگە سايكەس, تەلەفون پايدالانۋ ءتارتىبىن رەتتەۋ قۇزىرەتى ءبىلىم بەرۋ سالاسىنداعى ۋاكىلەتتى ورگانعا بەرىلەدى. ياعني بىرىڭعاي تالاپتاردى مينيسترلىك نەمەسە وڭىرلىك ءبىلىم باسقارمالارى بەكىتەدى.
تولىق تىيىم سالۋ باستاماسى قوعامدا قىزۋ تالقىلانىپ جاتىر. قولداۋشىلار كيبەربۋللينگ ازاياتىنىن, الەۋمەتتىك جەلىلەرگە تاۋەلدىلىك تومەندەيتىنىن, بالالار ءتىرى قارىم-قاتىناسقا كوبىرەك كوڭىل بولەتىنىن, سونداي-اق وقۋ ۇلگەرىمى مەن ءتارتىپ جاقسارىپ قىمبات گادجەتتەرگە بايلانىستى الەۋمەتتىك تەڭسىزدىك بولمايتىنىن ايتادى. ال قارسى تاراپ اتا-انامەن جەدەل بايلانىس قيىندايتىنىن العا تارتىپ, تسيفرلىق ساۋاتتىلىق شەكتەلەتىنىنە الاڭداۋشىلىق بىلدىرگەن.
كوپتەگەن ەل مەكتەپتەرىندە سمارتفون قولدانۋعا ءتۇرلى دەڭگەيدە شەكتەۋ ەنگىزىلگەن. كەيبىرىندە ۇلتتىق دەڭگەيدە تولىق تىيىم سالىنسا, باسقالارىندا مەكتەپ اكىمشىلىگى ءوز ءتارتىبىن بەلگىلەگەن.
سونىمەن قاتار بىرقاتار ەلدە مەديتسينالىق نەمەسە ەرەكشە ءبىلىم بەرۋ قاجەتتىلىكتەرى بار بالالارعا ارنايى جەڭىلدىكتەر قاراستىرىلعان. قازاقستانداعى نازارباەۆ زياتكەرلىك مەكتەپتەرىندە 2025 جىلدىڭ قىركۇيەگىنەن باستاپ تەلەفونعا شەكتەۋ ەنگىزىلگەن.
بۇل باستاما ءتارتىپ پەن قاۋىپسىزدىكتى كۇشەيتۋدى ماقسات ەتەدى. الايدا قوعامدا تسيفرلىق ەركىندىك پەن باقىلاۋ اراسىنداعى تەپە-تەڭدىك ماسەلەسى ءالى دە تالقىلانىپ جاتىر.
