كەزدەسۋ بارىسىندا 15 ناۋرىزعا بەلگىلەنگەن رەسپۋبليكالىق رەفەرەندۋمدا ۇسىنىلاتىن جاڭا كونستيتۋتسيا جوباسىنىڭ نەگىزگى باعىتتارى تالقىلاندى. قاتىسۋشىلار جاڭا اتا زاڭنىڭ ادامعا باعدارلانعان سيپاتى, ادىلەتتىلىك قاعيداتتارىن نىعايتۋ, زاڭ ۇستەمدىگىن كۇشەيتۋ جانە جاستاردىڭ ەل دامۋىنا قاتىسۋ مۇمكىندىكتەرىن كەڭەيتۋ ماسەلەلەرىنە توقتالدى.
جيىندى اشقان پارلامەنت ءماجىلىسىنىڭ دەپۋتاتى, جالپىۇلتتىق كواليتسيا مۇشەسى اناس باققوجاەۆ جاڭا كونستيتۋتسيانىڭ قوعام سۇرانىسىنان تۋىنداعان قۇجات ەكەنىن اتاپ ءوتتى.
«بۇل رەفورما – قوعاممەن جۇرگىزىلگەن كەڭ ديالوگتىڭ ناتيجەسى. مىڭداعان ۇسىنىس ەسكەرىلىپ, جاڭا كونستيتۋتسيا جوباسى اشىق تالقىلاۋ نەگىزىندە ازىرلەندى. وندا مەملەكەتتىڭ باستى قۇندىلىعى – ادام جانە ونىڭ قۇقىقتارى ەكەنى ناقتى بەكىتىلەدى. جاستار ءۇشىن بۇل – تەڭ مۇمكىندىكتەرگە, ءادىل باسەكەگە جانە زاڭ ۇستەمدىگىنە نەگىزدەلگەن بولاشاقتىڭ كەپىلى», دەدى اناس باققوجاەۆ.
ءوز كەزەگىندە وڭىرلىك كواليتسيا جەتەكشىسىنىڭ ورىنباسارى سەرىك نۇرقادىروۆ جاڭا كونستيتۋتسيانىڭ ستراتەگيالىق باسىمدىقتارىنا توقتالدى.
«جوبا مەملەكەتتىڭ دامۋ مودەلىن جاڭعىرتادى. باستى نازار ادام كاپيتالىنا – بىلىمگە, عىلىمعا, يننوۆاتسياعا اۋدارىلادى. جاستاردىڭ ساپالى ءبىلىم الۋى, كاسىبي قالىپتاسۋى جانە ازاماتتىق باستامالارىن ەركىن جۇزەگە اسىرۋى كونستيتۋتسيالىق دەڭگەيدە قولداۋ تابادى. سونداي-اق تسيفرلىق ورتاداعى قۇقىقتاردى قورعاۋ نورماسىنىڭ ەنگىزىلۋى – جاڭا ءداۋىر تالاپتارىنا بەرىلگەن ناقتى جاۋاپ», دەدى ول.
سونىمەن قاتار, كواليتسيا مۇشەلەرى قازىبەك داۋتاليەۆ پەن سەرگەي گوريانوي كونستيتۋتسيالىق رەفورمانىڭ قوعامدىق كەلىسىمدى نىعايتۋداعى رولىنە جانە ازاماتتاردىڭ, اسىرەسە جاستاردىڭ بەلسەندى قاتىسۋىنىڭ ماڭىزدىلىعىنا توقتالدى.
كەزدەسۋ بارىسىندا جاستار ءوز ۇسىنىستارىن ءبىلدىرىپ, جاڭا كونستيتۋتسيا جوباسىنا قولداۋ تانىتتى.
قاتىسۋشىلار الداعى رەفەرەندۋم – ەل دامۋىنىڭ جاڭا كەزەڭىن ايقىندايتىن ماڭىزدى ساياسي ناۋقان ەكەنىن اتاپ ءوتتى.
ەلىمىزدىڭ كينوتەاترلارىندا جاڭا كونستيتۋتسيانى قولداۋعا ارنالعان بەينەروليكتەر كورسەتىلدى
ايتا كەتەيىك, «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى وڭىرلەردە اقپاراتتىق-ءتۇسىندىرۋ جۇمىستارىن جالعاستىرىپ, ازاماتتاردىڭ بارلىق ساۋالىنا جاۋاپ بەرۋگە دايىن ەكەنىن مالىمدەدى.
استانادا ماتچ كەزىندە كونستيتۋتسيالىق رەفورمالاردى قولداۋعا ارنالعان ەرەكشە اكتسيا ءوتتى
