فوتو: اشىق دەرەككوز
2022 جىلدان بەرى ەلىمىزدە تسيفرلىق قىزمەتتەرگە سالىناتىن, كوپشىلىككە «Google سالىعى» اتاۋىمەن بەلگىلى تەتىك قولدانىسقا ەندى. وسى ۋاقىت ىشىندە 120 شەتەلدىك كومپانيا شارتتى تىركەۋدەن وتكەن. سونىڭ 22-ءسى 2025 جىلى تىركەلگەن. اتالعان كەزەڭدە بيۋدجەتكە تۇسكەن جالپى ءتۇسىم كولەمى 136 ملرد تەڭگەگە جەتتى. ونىڭ ىشىندە 2025 جىلى 57,6 ملرد تەڭگە, ال 2026 جىلعى قاڭتار ايىندا 8,7 ملرد تەڭگە تۇسكەن.
سالىق كودەكسىنە سايكەس ەكىنشى دەڭگەيدەگى بانكتەر مەن تولەم ۇيىمدارى شارتتى تىركەۋدەن وتكەن شەتەلدىك كومپانيالار جونىندەگى مالىمەتتەردى مەملەكەتتىك كىرىستەر ورگاندارىنا ۇسىنادى. بۇل دەرەكتەر قازاقستان اۋماعىندا جەكە تۇلعالارعا ەلەكتروندىق ساۋدا ارقىلى تاۋار ساتۋ جانە تسيفرلىق فورماتتا قىزمەت كورسەتۋ كەزىندە سالىق مىندەتتەمەلەرىنىڭ تولىق ءارى ۋاقتىلى ورىندالۋىن تالداۋعا پايدالانىلادى.
مەملەكەتتىك كىرىستەر ورگاندارى ەكىنشى دەڭگەيدەگى بانكتەر مەن تولەم ۇيىمدارىنىڭ مالىمەتتەرىن شەتەلدىك كومپانيالار تولەگەن قوسىلعان قۇن سالىعى تۋرالى دەرەكتەرمەن سالىستىرىپ, كامەرالدىق باقىلاۋ جۇرگىزەدى. تولەمەۋ نەمەسە تولىق تولەمەۋ دەرەكتەرى انىقتالعان جاعدايدا, الشاقتىقتار تۋرالى ءتيىستى حابارلامالار جولدانادى.
Apple Google كومپانياسىمەن تاعى ءبىر كەلىسىمشارتقا قول قويدى
سونىمەن قاتار سالىق كودەكسىنىڭ 89-بابىنا سايكەس 2026 جىلعى 1 قاڭتاردان باستاپ كامەرالدىق باقىلاۋ ناتيجەلەرى بويىنشا جىبەرىلگەن حابارلامالاردى, سونداي-اق قوسىلعان قۇن سالىعى بويىنشا تىركەۋ ەسەبىنە قويۋ تۋرالى تالاپتاردى ورىنداماعان شەتەلدىك ماركەتپلەيستەردىڭ ينتەرنەت-رەسۋرستارىن بۇعاتتاۋ تۋرالى شەشىم قابىلداۋعا مۇمكىندىك بەرەتىن نورمالار قاراستىرىلعان.
بۇل شارالار وتاندىق جانە شەتەلدىك نارىق قاتىسۋشىلارى ءۇشىن تەڭ باسەكەلەستىك ورتا قالىپتاستىرۋدى, تسيفرلىق كەڭىستىكتەگى سالىق ءتارتىبىن كۇشەيتۋدى جانە قۇجاتتىق سالىقتىق تەكسەرۋلەرسىز-اق كولەڭكەلى ەكونوميكانىڭ ۇلەسىن ازايتۋدى كوزدەيدى.
ەسكە سالا كەتەيىك, بۇدان ءبىر جىل بۇرىن مەملەكەت باسشىسى Google كومپانياسىنىڭ وكىلىن قابىلداعان ەدى.
