كواليتسيا دەلەگاتسياسىن پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا باستاپ باردى. وتىرىسقاى پارلامەنت ءماجىلىسىنىڭ دەپۋتاتتارى جاناربەك ءاشىمجانوۆ, سەرگەي پونومارەۆ جانە باسقالارى قاتىستى. ستۋدەنتتىك قاۋىمداستىق اتىنان ۋنيۆەرسيتەت بەلسەندىلەرى مەن جاس جوبا اۆتورلارى ءسوز سويلەدى.
ايدا بالاەۆا جاڭا كونستيتۋتسيا جوباسى جاھاندىق وزگەرىستەردى ەسكەرىپ, يدەيالار, قۇزىرەتتەر مەن يننوۆاتسيالار شەشۋشى ءرول اتقاراتىن ءبىلىم ەكونوميكاسىن دامىتۋعا جول اشاتىنىن اتاپ ءوتتى. ونىڭ ايتۋىنشا, ستۋدەنتتەر مەن جاس زەرتتەۋشىلەر ءۇشىن زاڭ جوباسىندا شىعارماشىلىق ەركىندىككە كەپىلدىك پەن زياتكەرلىك مەنشىكتى قورعاۋ نورمالارىنىڭ بەكىتىلۋى ايرىقشا ماڭىزدى.
«كونستيتۋتسيا ءسوز بوستاندىعى مەن عىلىمي, تەحنيكالىق, كوركەم شىعارماشىلىق ەركىندىككە كەپىلدىك بەرەدى. ەڭ باستىسى – زياتكەرلىك مەنشىك زاڭمەن قورعالادى. ياعني, يدەيالار, ستارتاپ ونىمدەرى, اۆتورلىق جوبالار, زەرتتەۋلەر مەن شىعارماشىلىق ناتيجەلەرى كونستيتۋتسيالىق دەڭگەيدە بەكىتىلەدى. جاستار ءۇشىن بۇل – ابستراكتسيا ەمەس, ەڭبەكتەرىڭىزدىڭ قورعالاتىنىنا جانە قۇندىلىق رەتىندە تانىلاتىنىنا دەگەن سەنىم», دەدى ايدا بالاەۆا.
ۆيتسە-پرەمەر ءبىلىم بەرۋدىڭ ماڭىزىنا ەرەكشە توقتالىپ, ونى نەگىزگى كونستيتۋتسيالىق كەپىلدىك ءارى مۇمكىندىكتەر تەڭدىگىنىڭ ىرگەتاسى دەپ اتادى. ول بىلىمگە قولجەتىمدىلىك الەۋمەتتىك تۇراقتىلىق پەن ادامي كاپيتالدى دامىتۋدىڭ باستى نەگىزى بولىپ قالا بەرەتىنىن ايتتى.
سونىمەن قاتار, كەزدەسۋ بارىسىندا كواليتسيا مۇشەلەرى ازاماتتاردىڭ تسيفرلىق ورتاداعى قۇقىقتارىنا نازار اۋداردى. اتاپ ايتقاندا, دەربەس دەرەكتەردى قورعاۋ جانە تسيفرلىق سەرۆيستەرگە سەنىمدى قالىپتاستىرۋ ماسەلەلەرى تالقىلاندى. كونستيتۋتسيا جوباسىندا دەربەس دەرەكتەردى زاڭسىز جيناۋدان, وڭدەۋدەن, ساقتاۋدان جانە پايدالانۋدان تسيفرلىق تەحنولوگيالار ارقىلى قورعاۋ نورمالارى بەكىتىلەتىنى اتاپ ءوتىلدى. بۇل جاستاردىڭ تسيفرلىق باستامالارىنىڭ قاۋىپسىزدىگى مەن دامۋىنا تىكەلەي اسەر ەتەدى.
جالپىۇلتتىق كواليتسيا مۇشەسى, ءماجىلىس دەپۋتاتى جاناربەك ءاشىمجانوۆ ءبىلىم مەن عىلىمعا باسىمدىق بەرۋ ەكونوميكانى جاڭعىرتۋدىڭ ءارى ەلدىڭ باسەكەگە قابىلەتىن ارتتىرۋدىڭ باستى شارتى ەكەنىن ءسوز ەتىپ, بۇل باعىتتار كونستيتۋتسيادا ناقتى ءارى بەرىك بەكىتىلۋى ءتيىس ەكەنىن تىلگە تيەك ەتتى.
ء«بىلىم ءوندىرىستى جاڭعىرتۋعا, ءونىم ساپاسىن ارتتىرۋعا, جاڭا ستاندارتتاردى ەنگىزۋگە جانە باسەكەگە قابىلەتتى بولۋعا مۇمكىندىك بەرەدى. بالالارعا ءبىلىم بەرۋ قۇقىعى, زاماناۋي ءبىلىم الۋ, جاستاردىڭ سۇرانىسقا ساي قابىلەتتەردى يگەرۋى – مۇنىڭ ءبارى اتا زاڭدا بەرىك بەكىتىلۋى ءتيىس. سەبەبى كونستيتۋتسيا مەملەكەتتىڭ زاڭنامالىق جانە بيۋدجەتتىك ساياساتىنىڭ ىرگەتاسىن ايقىندايدى», دەپ اتاپ ءوتتى ول.
كەزدەسۋ بارىسىندا ستۋدەنتتەر دە جاڭا كونستيتۋتسيا جوباسىنىڭ ماڭىزى تۋرالى پىكىر ءبىلدىرىپ, ءبىلىم, عىلىم جانە ەلدىڭ زياتكەرلىك الەۋەتىن دامىتۋدىڭ ستراتەگيالىق نەگىزى رەتىندە قابىلدايتىندارىن جەتكىزدى. SDU ستۋدەنتى ماقسات ايتبەك ءبىلىم مەن عىلىم باسىمدىقتارىن كونستيتۋتسيالىق دەڭگەيدە بەكىتۋدى قاجەت دەپ سانايدى.
ابزال قۇسپان: كونستيتۋتسيالىق سوت ازامات پەن مەملەكەت اراسىنداعى تورەشى بولادى
«ەگەر كونستيتۋتسيا ءبىلىم مەن عىلىمدى مەملەكەتتىك ساياساتتىڭ تىرەگىنە اينالدىرسا, بۇل الەۋمەتتىك سالاعا سالىنعان ينۆەستيتسيا عانا ەمەس, بولاشاققا باعىتتالعان ستراتەگيالىق قادام», دەدى ول.
كەزدەسۋ سوڭىندا ايدا بالاەۆا ستۋدەنتتەرمەن جانە ۋنيۆەرسيتەت وقىتۋشىلارىمەن اڭگىمەلەسىپ, اتا زاڭنىڭ بولاشاعىنا قاتىستى شەشىم قابىلداۋدا ازاماتتاردىڭ رەفەرەندۋمعا تىكەلەي قاتىسۋى ماڭىزدى ەكەنىن جەتكىزدى.
