كەزدەسۋ پانارالىق ديالوگ فورماتىندا ءوتتى. عالىمدار مەن ساراپشىلار انا مەن اكەنى, بالانى قورعاۋعا, سونداي-اق نەكەنىڭ كونستيتۋتسيالىق مارتەبەسىنە قاتىستى ۇسىنىلعان باپتاردىڭ تۇجىرىمدارىن جان-جاقتى تالدادى.
تالقىلاۋدى اشا وتىرىپ, زاڭناما جانە قۇقىقتىق اقپارات ينستيتۋتىنىڭ ديرەكتورى, زاڭ عىلىمدارىنىڭ دوكتورى, پروفەسسور ينديرا اۋباكيروۆا كونستيتۋتسيالىق رەفورمالاردى عىلىمي تۇرعىدان پىسىقتاۋدىڭ ستراتەگيالىق ماڭىزىن اتاپ ءوتتى.
«جاڭا كونستيتۋتسيا جوباسى – بۇل جاڭارتىلعان نورمالاردىڭ جاي عانا جيىنتىعى ەمەس, مەملەكەتىمىزدىڭ دامۋىنىڭ جاڭا كەزەڭىنىڭ كورىنىسى. بۇگىن قۇقىقتانۋشىلار مەن الەۋمەتتانۋشىلاردىڭ كۇشىن بىرىكتىرە وتىرىپ, ءبىز كونستيتۋتسيالىق جاڭالىقتاردىڭ قۇقىقتىق تۇرعىدان ءمىنسىز ءارى ومىرشەڭ بولۋىنا جۇمىس ىستەپ جاتىرمىز. وتباسىلىق قۇندىلىقتاردى قورعايتىن نورمالارعا ەرەكشە ءمان بەرەمىز, ويتكەنى وتباسى – قوعامنىڭ تابيعي ءارى ىرگەلى ۇياسى. ءبىزدىڭ مىندەت – مۇنداي ينستيتۋتتارعا قازىرگى زاماننىڭ سىن-قاتەرلەرى مەن حالقىمىزدىڭ داستۇرلەرىنە ساي سەنىمدى كونستيتۋتسيالىق كەپىلدىك بەرۋ», دەدى ول.
ءوز كەزەگىندە قازاقستاندىق قوعامدىق دامۋ ينستيتۋتى باسقارما ءتورايىمى, فيلوسوفيا دوكتورى (PhD) جۇلدىزاي يسكاكوۆا رەفورمالاردىڭ الەۋمەتتىك ولشەمىنىڭ ماڭىزىن اتاپ ءوتتى.
«كونستيتۋتسيا ازاماتتاردىڭ كۇتۋلەرىنە ءۇن قاتۋى ءتيىس. زاڭناما ينستيتۋتىمەن بىرلەسكەن جۇمىس قۇقىقتىق تۇجىرىمداردى قوعامنىڭ ناقتى سۇرانىستارىمەن ۇيلەستىرۋگە مۇمكىندىك بەرەدى, جەكە ادامنىڭ قۇقىقتارىن قورعاۋ مەن ۇلتتىڭ مادەني كودىن ساقتاۋ اراسىنداعى تەپە-تەڭدىكتى قامتاماسىز ەتەدى», دەدى جۇلدىزاي يسكاكوۆا.
وتىرىس بارىسىندا جاھاندانۋ جاعدايىندا ءداستۇرلى قۇندىلىقتاردى ساقتاۋ ماسەلەلەرى توڭىرەگىندە قىزۋ پىكىرتالاس ءوربىدى. قاتىسۋشىلار قازىرگى زاماننىڭ وتكىر الەۋمەتتىك سىن-قاتەرلەرىن دە نازاردان تىس قالدىرمادى. اتاپ ايتقاندا, جۇمىسسىزدىقپەن كۇرەس ماسەلەلەرى, سونداي-اق بۋللينگ (قورلاۋ) جانە ستالكينگ (قۋدالاۋ) سياقتى تەرىس قۇبىلىستارعا قارسى ءىس-قيمىلدىڭ قۇقىقتىق تەتىكتەرى ناقتى قارالدى. ساراپشىلار تۇلعانى قاۋىپ-قاتەردىڭ جاڭا تۇرلەرىنەن قورعاۋ ءۇشىن سەنىمدى قۇقىقتىق توسقاۋىلدار قۇرۋ قاجەتتىگىن تالقىلادى.
ءىس-شارا قورىتىندىسىندا قاتىسۋشىلار اتالعان نورمالاردى كونستيتۋتسيالىق دەڭگەيدە بەكىتۋدىڭ ۋاقتىلى ەكەنىن ءبىراۋىزدان اتاپ ءوتىپ, ولاردىڭ قوعامدا جوعارى سۇرانىسقا يە ەكەنىن ايتتى.
سونىمەن بىرگە, ساراپشىلار بۇل كونستيتۋتسيالىق كەپىلدىكتەردى پراكتيكالىق ىسكە اسىرۋ زاڭدار مەن زاڭعا تاۋەلدى اكتىلەر دەڭگەيىندە ودان ءارى مۇقيات پىسىقتاۋدى جانە ناقتىلاۋدى تالاپ ەتەتىنىن ەرەكشە اتاپ ءوتتى
