ماۋلەن اشىمباەۆ كەزدەسۋگە قاتىسۋشىلارعا ءىلتيپات ءبىلدىرىپ, كونستيتۋتسيالىق رەفورما مەملەكەت باسشىسى باستاماشى بولعان اۋقىمدى جاڭعىرتۋلاردىڭ دايەكتى جالعاسى ەكەنىن اتاپ ءوتتى. سونداي-اق ول بۇل ساياسي باعدار ادىلەتتىلىك, زاڭ ۇستەمدىگى جانە بيلىكتىڭ قوعام الدىنداعى جاۋاپكەرشىلىگى سياقتى ماڭىزدى قاعيداتتارعا تابان تىرەيتىنىن ايتتى.
«پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن بارلىق سالادا كەشەندى جاڭعىرتۋلار جۇزەگە اسىرىلۋدا. كونستيتۋتسيالىق رەفورما – سول ىرگەلى وزگەرىستەردىڭ زاڭدى ءارى دايەكتى جالعاسى. مەملەكەت باسشىسىنىڭ جارلىعىمەن جاڭا كونستيتۋتسيا جوباسى رەسپۋبليكالىق رەفەرەندۋمعا شىعارىلدى. وسىلايشا, 15 ناۋرىزدا ازاماتتار ءوز تاڭداۋىن جاسايدى. بۇل – ەلدىڭ ساياسي جۇيەسىن دەموكراتيالاندىرۋ جولىنداعى ماڭىزدى قادام. جاڭا اتا زاڭدا مەملەكەتتىلىكتى نىعايتۋعا, تاۋەلسىزدىكتى كۇشەيتۋگە جانە ازاماتتاردىڭ ءومىر ءسۇرۋ ساپاسىن ارتتىرۋعا باسا ءمان بەرىلگەن. سوندىقتان كونستيتۋتسيالىق رەفورما زاڭ مەن ءتارتىپ قاعيداتىنا, ازاماتتاردىڭ قۇقىقتارى مەن مۇددەلەرىن قورعاۋعا, قورشاعان ورتاعا جاناشىرلىقپەن قاراۋعا جانە ورنىقتى دامۋ باعدارىنا تابان تىرەيدى», دەدى ماۋلەن اشىمباەۆ.
جاڭا كونستيتۋتسيا جوباسى بويىنشا رەفەرەندۋمعا قانشا قاراجات جۇمسالادى؟
سونىمەن قاتار سەنات توراعاسى جاڭا كونستيتۋتسيا جوباسى «ادىلەتتى قازاقستان» يدەياسىن جۇزەگە اسىرۋدىڭ قۇقىقتىق نەگىزىن قالايتىنىنا نازار اۋداردى. قۇجاتتا ەلدىڭ زياتكەرلىك الەۋەتىن دامىتۋعا جانە حالىقتىڭ بىرلىگىن نىعايتۋعا بەرىك كەپىل بولاتىن باسىمدىقتار قامتىلعان. بۇل جاڭا اتا زاڭنىڭ ادامعا باعدارلانۋىن, مازمۇنىنىڭ ايقىندىعىن جانە قوعامدى ۇيىستىرۋشى ءرولىن ايقىن كورسەتەدى.
«جاڭا كونستيتۋتسيا جوباسى – وتكەننىڭ ينەرتسياسىنان سانالى تۇردە ارىلىپ, زاماناۋي مەملەكەتتىك مودەلگە كوشۋ. اتا زاڭداعى تۇجىرىمدامالىق وزگەرىستەردىڭ ءبىرى ادام قۇقىقتارى مەن بوستاندىقتارىن مەملەكەتتىڭ ەڭ جوعارى قۇندىلىعى رەتىندە بەكىتۋ ەكەنى انىق. جاڭا كونستيتۋتسيادا ءدال وسى قاعيدا مەملەكەتتىك قۇرىلىم جۇيەسىنىڭ ىرگەتاسىنا اينالادى. بۇل – «ادىلەتتى قازاقستان» يدەياسىن دەكلاراتسيا دەڭگەيىندە ەمەس, ناقتى كونستيتۋتسيالىق نورمالار ارقىلى جۇزەگە اسىرۋ دەگەن ءسوز», دەدى پالاتا سپيكەرى.
ماۋلەن اشىمباەۆ جاڭا كونستيتۋتسيا جوباسىن تاريحي قۇجات دەپ اتاپ, بۇل شەشىم قوعامدىق كەلىسىمنىڭ جاڭا ۇلگىسىنە كوشۋ جانە ىشكى سۇرانىستار مەن سىرتقى سىن-قاتەرلەرگە بەرىلگەن ۋاقىتىلى جاۋاپ ەكەنىن دە تىلگە تيەك ەتتى. ول كونستيتۋتسيالىق رەفورمانى ساراپتامالىق تۇرعىدان ىلگەرىلەتۋدىڭ ماڭىزىنا توقتالىپ, وسى يدەيالاردى ناقتى تەتىكتەرگە, الداعى ۋاقىتتا قابىلداناتىن زاڭدارعا جانە قۇقىق قولدانۋ تاجىريبەسىنە ءتيىمدى ەنگىزۋ قاجەت ەكەنىن ايتتى.
«جاڭا كونستيتۋتسيا الداعى جىلداردا قازاقستاننىڭ تۇراقتى, قاۋىپسىز ءارى سەرپىندى دامۋىن قامتاماسىز ەتەتىن مەملەكەتتىك جانە ساياسي قۇرىلىمدى قالىپتاستىرۋعا نەگىز بولادى. بۇل قادام قازىرگى جانە كەلەشەكتەگى سىن-قاتەرلەردى ەڭسەرە الاتىن ءتيىمدى جۇيە قۇرۋعا جول اشادى. قازىر ەگەمەندىكتى كۇشەيتۋگە, تاۋەلسىزدىكتى نىعايتۋعا, ەلىمىزدىڭ قۋاتتى دامۋىنا جاعداي جاساۋعا جانە ازاماتتاردىڭ ءال-اۋقاتىن جاقسارتۋعا باسا ءمان بەرۋىمىز كەرەك. سوندا عانا قازاقستان الەمدىك ەكونوميكا مەن ساياساتتا لايىقتى ورنىن يەلەنە الادى», دەدى سەنات توراعاسى.
تالقىلاۋ بارىسىندا ساراپشىلار مەن تالداۋ ورتالىقتارىنىڭ وكىلدەرى الداعى رەفەرەندۋم اياسىنداعى بىرلەسكەن جۇمىسقا قاتىستى ۇسىنىس-ويلارىن ايتىپ, وزەكتى ماسەلەلەر توڭىرەگىندە پىكىر الماستى.
الماتىدا حالىقتىق كونستيتۋتسيانى قولدايتىن قالالىق كواليتسيانىڭ العاشقى وتىرىسى وتەدى
ساپار اياسىندا سەنات توراعاسى اباي اتىنداعى رەسپۋبليكالىق مەكتەپتىڭ ماتەريالدىق-تەحنيكالىق بازاسىمەن, ونىڭ ىشىندە بۇۇ كابينەتىنىڭ جانە ءبىلىم ورداسىنداعى مۋزەيدىڭ قىزمەتىمەن تانىستى. سونداي-اق قالالىق كىتاپحانا ۇجىمىمەن جانە مەگاپوليستىڭ بەلسەندى جاستارىمەن كەزدەستى. ودان بولەك, سەناتورلار Yandex Qazaqstan-نىڭ كەڭسەسىنە بارىپ, ەلىمىزدەگى تسيفرلاندىرۋ ۇدەرىستەرىن ودان ءارى دامىتۋ ماسەلەلەرىن تالقىلادى.
