بالكىم, سۋرەتشى ءۇشىن ابستراكتسيا تەك فورمادان باس تارتۋ ەمەس, ايتار ويدى ىقشامداپ, سەزىمدى قويۋلاتىپ جەتكىزۋدىڭ ءتاسىلى شىعار. كارتينادا جاستىق شاق ۇنەمى قوزعالىستا تۇراتىن توقتاۋسىز قۋات, ۇزدىكسىز ىزدەنىس, ومىرگە قۇشتارلىق, ىشكى جالىن سەكىلدى ەلەس بەرەدى. ءبىر قاراعاندا شىعارمادا ناقتى وقيعا, ايقىن سيۋجەت جوق. بىراق بۇل ونىڭ ماعىنالىق سالماعىن جەڭىلدەتپەيدى. كەرىسىنشە, سۋرەتشى ابستراكتسيا ءتىلى ارقىلى جاستىقتىڭ كۇردەلى بولمىسىن تەرەڭدەتە تۇسەدى. كەنەپتەگى ادام سۇلبالارى شارتتى, كەيدە انىق, كەيدە كومەسكى. مۇنى ءبىز – جاستىقتاعى ءوزىن-ءوزى ىزدەۋ, تۇلعالىق قالىپتاسۋ ۇدەرىسىنىڭ كوركەم بالاماسى دەپ توپشىلادىق. فيگۋرالار ءبىر-بىرىمەن تىكەلەي بايلانىسپاعانداي كورىنگەنىمەن, ولاردىڭ ءبارىن بىرىكتىرەتىن ورتاق ىرعاق بار. بۇل – ءبىر ءداۋىردىڭ, ءبىر بۋىننىڭ ىشكى تولقىنى. ءار بەينە – جەكە تاعدىر, جەكە وي, بىراق بارلىعى ءبىر كەڭىستىكتە, ءبىر ەنەرگەتيكالىق اعىستا ءومىر ءسۇرىپ جاتىر.
«كارتينانىڭ تومەنگى بولىگىندە سۋ كەمەسىنىڭ ەلەمەنتتەرىن ەلەۋسىز بەرىپ ءوتتىم. دۇنيەنى الىپ كەمەگە تەڭەسەك, سول كەمەنىڭ ۋاقىتشا قوناعى ەكەنىمىزدى, جارىسىپ ءجۇرىپ جالعاننان كوشەتىنىمىزدى كورسەتتىم. كارتينانىڭ ورتاڭعى بولىگىندە يۋ-قيۋ جالعاسىپ جاتقان سارى جولاقتار ادامنىڭ بەس ساۋساعىن بەينەلەيدى. كەيىپكەرلەردىڭ ءبىرىنىڭ ساپارى ەندى باستالسا, ءبىرى جولايرىقتا تۇر. ولاردىڭ ءبارىنىڭ قۋات الار, ەسكە تۇسسە ەگىلەر وتتى نۇكتەسى جاستىق شاق, بالا داۋرەن. بۇل كارتينا الدىندا تۇرعان ادام ءوزىن سىرتتاي باقىلاۋشى رەتىندە ەمەس, ىشكى اڭگىمەگە تارتىلعانداي سەزىنسە دەيمىن. ءار كورەرمەن كەنەپتەن ءوز جاستىعىن, ءوز كۇيىن, ءوز سۇراعىن تابا السا يگى. بىرەۋ ءۇشىن بۇل – وتكەن شاقتىڭ ەلەسى, بىرەۋ ءۇشىن – بۇگىنگى جان كۇيى, ەندى بىرەۋ ءۇشىن – الدا تۇرعان كەزەڭنىڭ بەلگىسىزدىگى بولۋى مۇمكىن. كارتينادا رومانتيكادان گورى شىنايىلىق باسىم با دەيمىن. بۇل – جاستىقتىڭ تەك قۋانىشتان تۇرمايتىنىن, ونىڭ ىشىندە كۇرەس پەن تولعانىس تا بار ەكەنىن مويىنداۋ», دەيدى سۇلتان امانجول.
شىعارمادا ۋاقىت كەڭىستىگىن تىلگىلەپ بارا جاتقان الىپ كەمە تاعدىر اعىسىمەن جىلجيتىنىن, دەگەنمەن ونىڭ باعىتىن ايقىنداۋ ءار ادامنىڭ ءوز تاڭداۋىندا دەگەن تۇجىرىمدى العا شىعارادى. كومپوزيتسيادا ءومىردىڭ ۇزدىكسىز كۇرەس ەكەنى, تۇستەردىڭ قۇبىلۋى مەن فورمالاردىڭ شارتتى بەرىلۋى جاستىقتىڭ ءبىر ساتتىك ەمەس, ۋاقىتپەن بىرگە وزگەرىپ, تولىعىپ وتىراتىن كۇي ەكەنىن مەڭزەيدى. ابستراكتسيالىق شەشىم كورەرمەندى ناقتى ءبىر وبرازعا بايلاماي, ءار ادامعا ءوز ءومىر جولىن, ءوز «كەمەسىن» ەلەستەتۋگە مۇمكىندىك بەرەدى. كەنەپ ىشىندە تىنىشتىق جوق, ءبارى قوزعالىستا. سىزىقتار يرەلەڭدەپ, پىشىندەر ءبىر-بىرىنە ەنىپ, قايتا بولىنەدى. كورەرمەننىڭ كوزى ءبىر نۇكتەدە توقتامايدى, كەنەپ بويىمەن ۇنەمى قوزعالىپ وتىرادى. وسى قوزعالىس ارقىلى سۋرەتشى ۋاقىتتىڭ وتپەلىلىگىن, جاستىقتىڭ ءبىر ساتكە دە تۇراقتامايتىن مىنەزىن سەزىندىرەدى.
«كارتيناداعى تۇستەر شەشىمى – شىعارمانىڭ باستى كوركەمدىك وزەگى. قىزىل, سارى, كوك, قوڭىر رەڭكتەر ءبىر-بىرىمەن قاقتىعىسىپ, كەيدە ۇيلەسىپ, كەيدە قارسىلاسادى. بۇل – جاستىققا ءتان ىشكى قايشىلىقتاردىڭ, سەزىمدەردىڭ الماسۋى. قىزىل مەن سارى تۇستەر ومىرگە قۇشتارلىقتى, ەركىن ارەكەتتى, ىشكى وتتى بىلدىرسە, كوگىلدىر رەڭكتەر ارمان مەن قيالدىڭ, بولاشاققا دەگەن سەنىمنىڭ بەلگىسىندەي. ال قارا جانە قويۋ تۇستەر جاستىق شاقتا دا بولاتىن كۇمان مەن مازاسىزدىقتى اڭعارتادى. بىراق بۇل قاراڭعىلىق ءۇمىتتى تۇمشالامايدى. كەرىسىنشە, ول جارىق تۇستەردىڭ اسەرىن كۇشەيتىپ, كارتيناعا تەرەڭدىك بەرەدى. اۆتور جاستىقتى تەك البىرت شاق, الاۋ سەزىم رەتىندە عانا ەمەس, ادام عۇمىرىنىڭ تۇتاس فيلوسوفيالىق مودەلi رەتىندە ۇسىنادى. بالالىقتىڭ اڭعال ارمانىنان باستاپ, جاستىقتىڭ تاۋەكەلگە تولى كەزەڭىن, كەمەل شاقتىڭ جاۋاپكەرشىلىگىن, ءتىپتى بولاشاققا باعىتتالعان بەلگىسىز مەجەلەر دە شىعارمانىڭ بويىنا سىيىپ تۇر», دەيدى ونەرتانۋشى بالجان زامانبەكوۆا.
جۇرەك ۋاقىتتان بۇرىن سوعىپ, ارمان اقىلدان وزىپ تۇرعان الاۋ شاقتا جاسالعان ءبىر تاۋەكەل تۇتاس ءومىرىڭنىڭ باعىتىن ايقىنداۋى مۇمكىن عوي. اۆتور جاستىقتىڭ بۇكىل عۇمىرعا اسەر ەتەتىن ىرگەلى كەزەڭ ەكەنىن كوركەم تىلمەن بايانداپ, وتكەنگە ساعىنىشپەن كوز تاستاعان كورەرمەندى ءوز كەمەسىنىڭ قاي باعىتتا ءجۇزىپ بارا جاتقانىن پايىمداۋعا شاقىراتىنداي.
الماتى
