فوتو: اشىق دەرەككوز
ۇلتتىق بانكتىڭ مالىمەتىنشە, ولشەمدى قۇيمالار كوپ ساتىلعان وڭىرلەر: الماتى (20 526 دانا, 74%), استانا (1 650 دانا, 6%) جانە شىمكەنت (1 099 دانا, 4%).
حالىققا ارنالعان ولشەمدى قۇيمالاردى Halyk Bank, ەۋرازيالىق بانك, Alatau city bank, تسەنتركرەديت بانك ارقىلى, سونداي-اق بانكتىك ەمەس جەكەلەگەن ايىرباستاۋ ورىندارىندا ساتىپ الۋعا نەمەسە كەرى ساتۋعا بولادى.
20 كۇندە 4,2 ملرد دوللار تابىس: التىن باعاسىنىڭ ءوسۋى ەل رەزەرۆىنە قالاي اسەر ەتتى؟
وسىلايشا, 2025 جىلى ەدب مەن بانكتىك ەمەس جەكەلەگەن ايىرباستاۋ ورىندارى كەرى ساتىپ العاندى ەسكەرگەندە, حالىققا جالپى سالماعى 1,1 ت – 40 799 ولشەمدى قۇيما ساتتى. باعدارلاما ىسكە قوسىلعالى ساتىلعان التىن قۇيمالاردىڭ جالپى سانى – 263 479, ال ولاردىڭ جالپى سالماعى – 9 ت.
حالىق اراسىندا سۇرانىسقا يە التىن قۇيمانىڭ سالماعى – 10 گ. ساتىلعان كولەمنەن ونىڭ جالپى ۇلەسى 26% – 67 833 دانا. ودان كەيىنگىسى 5 گرامدىق قۇيما, ساتىلعانى – 57 847 دانا (22%), 100 گرامدىق قۇيمادان – 53 289 دانا (20%), 20 گرامدىقتان – 49 154 دانا (19%) جانە 50 گرامدىق قۇيمادان – 35 356 دانا (13%).
ءاربىر التىن قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروتەكست جانە بەدەرلى جيەگى بار) جانە مەحانيكالىق زاقىمدانۋدان قورعايتىن ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعانىش قورابى ساپا سەرتيفيكاتى بولىپ تا سانالادى. سوندىقتان ۇلتتىق بانك التىن قۇيمانى ۇقىپتى ساقتاپ, قورابىن بۇلدىرمەۋگە كەڭەس بەرەدى.
التىن قۇيما – سەنىمدى ينۆەستيتسيا قۇرالى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ ورىندارى كليەنتكە اقشانى سول كۇنى تولەي وتىرىپ, التىن قۇيمالاردى كەرى ساتىپ الا الادى.
