ءوڭىردىڭ دەنساۋلىق ساقتاۋ سالاسىندا بىرقاتار ماڭىزدى كورسەتكىشتەر بويىنشا وڭ ديناميكا بايقالادى. ماسەلەن, تۋبەركۋلەزدەن بولاتىن ءولىم-ءجىتىم 7,1%-عا تومەندەگەن. سونىمەن قاتار شەشىمىن كۇتكەن ماسەلەلەر دە بار. اتاپ ايتقاندا, ينتەرۆەنتسيالىق كومەكتىڭ قولجەتىمدىلىگىن ارتتىرۋ, سكرينينگتىك تەكسەرۋلەردىڭ ساپاسىن جاقسارتۋ جانە كادرلىق الەۋەتتى نىعايتۋ باعىتىندا ناقتى شارالار قابىلداۋ قاجەت.
وبلىستىڭ ءبىلىم بەرۋ جۇيەسىن دامىتۋ بويىنشا دا جۇيەلى جۇمىس جۇرگىزىلۋدە. وڭىردەگى 30 كوللەدجدە 593 كاسىپورىننىڭ قاتىسۋىمەن دۋالدى وقىتۋ جۇيەسى ءساتتى ەنگىزىلگەن. مەكتەپتەردە تسيفرلاندىرۋ مەن جاساندى ينتەللەكت تەحنولوگيالارى بەلسەندى تۇردە قولدانىلىپ كەلەدى. سونىمەن قاتار ارنايى پەداگوگ كادرلارىنىڭ تاپشىلىعىن جويۋعا باعىتتالعان جۇمىستار اتقارىلۋدا.
قوستاناي وبلىسىنداعى جوعارى ءبىلىم بەرۋ سالاسى دا تۇراقتى وڭ ءوسىمدى كورسەتىپ وتىر. كەيىنگى ءۇش جىلدا ستۋدەنتتەر سانى 15,3%-عا ارتقان. حالىقارالىق قوس ديپلومدى ءبىلىم بەرۋ باعدارلامالارى كەڭەيىپ, كادرلاردى پراكتيكاعا بەيىمدەپ دايارلاۋ كۇشەيتىلۋدە. «KIA» كومپانياسىمەن ىنتىماقتاستىقتىڭ ناتيجەلىلىگى دە ايقىن. «اۆتوموبيل ونەركاسىبىنىڭ ينجينيرينگى» باعدارلاماسى اياسىندا وقىعان 22 ستۋدەنتتىڭ 17-ءسى بۇگىندە تۇراقتى جۇمىسپەن قامتىلعان.
سونىمەن قاتار ازاماتتاردى تۇراقتى جۇمىس ورىندارىنا ورنالاستىرۋ دەڭگەيىنىڭ تومەندىگى نەگىزگى تۇيتكىلدەردىڭ ءبىرى رەتىندە اتالدى. وبلىس اكىمدىگىنە وسى باعىتتا جۇمىستى كۇشەيتۋ تاپسىرىلدى.
وڭىردە بۇگىندە 580 مادەنيەت جانە ارحيۆ مەكەمەسى جۇمىس ىستەيدى. كەيىنگى ءۇش جىلدا 31 نىسان جوندەۋدەن ءوتىپ, 5 جاڭا مادەنيەت مەكەمەسى سالىنعان. دەگەنمەن مادەني ينفراقۇرىلىمدى جاڭعىرتۋعا دەگەن قاجەتتىلىك ءالى دە جوعارى دەڭگەيدە قالىپ وتىر.
تۋريزم سالاسىندا قوستاناي وبلىسىنىڭ الەۋەتى زور بولعانىمەن, تۋريستىك ينفراقۇرىلىمدى دامىتۋ ماسەلەلەرى دە وزەكتى. سونداي-اق ينكليۋزيۆتى سپورتتى دامىتۋعا دا ەرەكشە نازار اۋدارۋ قاجەتتىگى اتاپ ءوتىلدى.
كەڭەس قورىتىندىسى بويىنشا پرەمەر-ءمينيستردىڭ ورىنباسارى بىرقاتار ناقتى تاپسىرمالار بەردى. اتاپ ايتقاندا, پروفيلاكتيكالىق جانە اقپاراتتىق-ءتۇسىندىرۋ جۇمىستارىن كۇشەيتۋ, كادرلىق الەۋەتتى دامىتۋ, سونداي-اق الەۋمەتتىك سالانىڭ نەگىزگى باعىتتارى بويىنشا كەشەندى شارالاردى ىسكە اسىرۋ تاپسىرىلدى.
