فوتو: اقوردا
مەملەكەت باسشىسى قازاقستان قىتاي حالىق رەسپۋبليكاسىمەن اراداعى ماڭگى ءارى جان-جاقتى ستراتەگيالىق سەرىكتەستىكتى بەلسەندى تۇردە دامىتۋعا ايرىقشا ماڭىز ارتاتىنىن اتاپ ءوتتى. وسى ورايدا پرەزيدەنت 2013 جىلى قحر توراعاسى سي تسزينپين العاش رەت استانادا ۇسىنعان ء«بىر بەلدەۋ, ءبىر جول» باستاماسى تابىستى ىسكە اسىرىلىپ جاتقانىنا نازار اۋداردى.
قاسىم-جومارت توقاەۆ ەكى ەلدىڭ ساۋدا-ەكونوميكالىق بايلانىستارىنىڭ قارقىنىنا جوعارى باعا بەرىپ, بۇگىندە قىتاي قازاقستاننىڭ ەڭ ءىرى ساۋدا سەرىكتەسى سانالاتىنىن, تاۋار اينالىمى جىل سايىن رەكوردتىق مەجەنى باعىندىرىپ وتىرعانىن ايتتى.
اڭگىمەلەسۋ بارىسىندا ينۆەستيتسيالىق ىقپالداستىققا باسا ءمان بەرىلدى. مەملەكەت باسشىسىنىڭ ايتۋىنشا, قازاقستان شەتەلدەن ينۆەستيتسيا تارتۋعا جاعداي جاساپ, بىرلەسكەن ستراتەگيالىق جوبالارعا جان-جاقتى قولداۋ كورسەتەدى.
پرەزيدەنت الەم جاساندى ينتەللەكتىنىڭ بەلسەندى دامۋ كەزەڭىنە قادام باسقانىن اتاپ ءوتتى. بۇل باعىتتا قىتاي كوش باستاپ تۇر. مەملەكەت باسشىسى قىتاي تاراپىمەن اتالعان سالادا ىنتىماقتاستىقتى دامىتۋعا نيەت ءبىلدىردى.
تساي گۋانشەن قوناقجايلىق تانىتقانى ءۇشىن مەملەكەت باسشىسىنا العىس ايتتى. ول قازاقستاننىڭ ەڭ الدىمەن, قارجى سەكتورىنداعى ينۆەستورلار ءۇشىن تارتىمدى ءارى سەنىمدى ينۆەستيتسيالىق يۋريسديكتسياسىن جوعارى باعالادى. كورپوراتسيا باسشىسىنىڭ ايتۋىنشا, بۇعان پرەزيدەنت قاسىم-جومارت توقاەۆ پەن توراعا سي تسزينپين تاراپىنان كورسەتىلگەن جۇيەلى قولداۋ وڭ سەپتىگىن تيگىزىپ وتىر.
كەزدەسۋ بارىسىندا قارجى, ەنەرگەتيكا, تسيفرلاندىرۋ, مەديتسينا, اۋىل شارۋاشىلىعى جانە قۇرىلىس سالالارىنداعى ىقپالداستىقتىڭ پەرسپەكتيۆتى باعىتتارى قاراستىرىلدى.
ايتا كەتەيىك, بۇگىن مەملەكەت باسشىسى ەڭبەك جانە حالىقتى الەۋمەتتىك قورعاۋ ءمينيسترىن دە قابىلدادى.
