العاشقى پروديۋسەرلىك جوباسىن تانىستىرۋ بارىسىندا ديماش قۇدايبەرگەن تىڭدارماندارىنا العىسىن ءبىلدىردى.
«قۇرمەتتى دوستار! بۇگىن سىزدەردى وسىندا كورىپ وتىرعانىما ەرەكشە قۋانىشتىمىن. وسى ماڭىزدى ساتتە جانىمنان تابىلعان ارقايسىڭىزعا شىن جۇرەكتەن العىس ايتامىن. بۇگىن – ايرىقشا كۇن, سەبەبى ءدال بۇگىن «Voice Beyond Horizon» جوباسىنىڭ الەمدىك پرەمەراسى وتەدى. مەن ءۇشىن پرەمەرانى ءدال وزدەرىڭىزبەن بىرگە وتكىزۋ – ۇلكەن مارتەبە», دەدى ول
dimashnews.com سايتىنىڭ مالىمەتىنشە, كورەرمەندەر ديماش پەن ونىڭ كومانداسىمەن بىرگە شوۋدىڭ العاشقى ءبولىمىن اسا قىزىعۋشىلىقپەن تاماشالاپ, جوبانىڭ العاشقى تۇسىرىلىمدەرى وتكەن تۇركىستان ءوڭىرىنىڭ كوركەم تابيعاتىنا كۋا بولدى.
ەپيزود اياقتالعاننان كەيىن زالدا ۇزاق ۋاقىت بويى تولاستاماعان قوشەمەت پەن زور ىقىلاس كورەرمەندەردىڭ پرەمەرانى جوعارى دەڭگەيدە قابىلداعاندىعىنىڭ جانە ديماش قۇدايبەرگەندى ءىرى جوبانىڭ اتقارۋشى پروديۋسەرى رەتىندەگى العاشقى ءرولىن ءساتتى الىپ شىققاندىعىنىڭ دالەلى بولدى.
كەزدەسۋ اياسىندا شوۋمەن قاتار شاعىن كونتسەرتتىك باعدارلاما ۇيىمداستىرىلدى. قوبىزشى ولجاس قۇرمانبەك «Gladiator» جانە «Loreen – Tattoo» كومپوزيتسيالارىن ورىندادى.
دومبىراشىلار تەمىرلان ولجاباي مەن ەرنات ناۋرىز «الەم» جانە «باستاۋ» كۇيلەرىن ورىنداسا, مانسۇر قۇدايبەرگەن «When I’ve got you» شىعارماسىنىڭ اسپاپتىق نۇسقاسىن ۇسىندى.
كەشتىڭ ەرەكشە توسىنسىيى رەتىندە ديماش قۇدايبەرگەننىڭ «عاشىقتىق» انىنە تۇسىرىلگەن جاڭا mood-بەينەبايانىنىڭ تۇساۋكەسەرى كورسەتىلدى. رەسمي پرەمەراسى جۋىق ارادا كورەرمەنگە جول تارتادى.
ايتا كەتەيىك, 5 اقپاندا قىتايدىڭ تانىمال Hunan TV تەلەارناسىندا حالىقارالىق مۋزىكالىق Voice Beyond Horizon جوباسىنىڭ رەسمي پرەمەراسى ءوتتى.
