«BB Nura» ورتالىعى وبلىس تۇرعىندارىنا نەفرولوگيالىق كومەكتىڭ تولىق تسيكلىن كورسەتەدى. مۇندا تاۋلىك بويى جۇمىس ىستەيتىن 24 توسەكتىك ستاتسيونار, 40 ورىندىق امبۋلاتوريالىق دياليز ءبولىمى, سونداي-اق ەرەسەكتەر مەن بالالارعا ارنالعان كونسۋلتاتسيالىق-دياگنوستيكالىق قىزمەتتەر قاراستىرىلعان. ورتالىق سوزىلمالى بۇيرەك اۋرۋىنا شالدىققان پاتسيەنتتەرگە تاۋلىك بويى, كۇندىزگى ستاتسيونار جاعدايىندا كەشەندى مەديتسينالىق كومەك كورسەتەدى.
«ورتالىق بۇيرەك اۋرۋىنا شالدىققان ناۋقاستارعا وتە ىڭعايلى. ولار وسىندا نەفرولوگتىڭ كونسۋلتاتسياسىن الىپ, قاجەت بولعان جاعدايدا تاۋلىكتىك ستاتسيونارعا جاتىپ, ەم قابىلدايدى. قازىر اباي وبلىسىندا 137 ادام بۇيرەك الماستىرۋ ەمىن الىپ جاتىر. ونىڭ ىشىندە 100 ادام سەمەيدە ەمدەلۋدە. اۋرۋدىڭ الدىن الۋعا بار كۇش-جىگەرىمىزدى جۇمسايمىز», دەيدى نەفرولوگيالىق ورتالىقتىڭ وڭىرلىك ديرەكتورى ينديرا ازىمباەۆا.
اياگوز, ءۇرجار اۋداندارىندا ورتالىقتىڭ بولىمشەلەرى جۇمىس ىستەيدى. جاقىن ارادا بورودۋليحا اۋدانىندا تاعى ءبىر فيليالى اشىلماقشى.
وبلىس اكىمى بەرىك ءۋالي سەمەي قالاسىنداعى «BB Nura» نەفرولوگيالىق ورتالىعىنا ارنايى بارىپ, مەديتسينالىق مەكەمەنىڭ قىزمەتىمەن تانىستى, دارىگەرلەرمەن سويلەستى.
«وبلىسىمىزدا مەديتسينالىق نىسانداردىڭ سانى كوبەيىپ كەلەدى. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وڭىردە 60-تان استام العاشقى مەديتسينالىق-سانيتارلىق كومەك نىسانى سالىندى. سولاردىڭ قاتارىن «BB Nura» نەفرولوگيالىق ورتالىعى تولىقتىرىپ وتىر. مەديتسينالىق مەكەمە زاماناۋي تالاپتارعا ساي سالىنعان. سوڭعى ۇلگىدەگى دياگنوستيكالىق, ەمدەۋ قۇرالدارى قولدانىلادى, بۇل تۇرعىندارعا ساپالى, ءتيىمدى قىزمەت كورسەتۋگە مۇمكىندىك بەرەدى. وسىنداي ورتالىقتاردىڭ ىسكە قوسىلۋى وڭىردەگى دەنساۋلىق ساقتاۋ جۇيەسىن نىعايتىپ, ادامداردىڭ ءومىر ساپاسىن جاقسارتۋعا سەپتىگىن تيگىزەدى. بۇل باعىتتاعى جۇمىس الداعى ۋاقىتتا دا جالعاسىن تابادى», دەدى وبلىس اكىمى.
اكىم ءمالىم ەتكەندەي, مەملەكەت باسشىسىنىڭ تاپسىرماسىنا سايكەس سەمەيدە 300 ورىندىق وبلىستىق كوپسالالى كلينيكالىق اۋرۋحانا سالۋعا جوبالىق-سمەتالىق قۇجاتتاما ازىرلەنىپ جاتىر. وبلىستا دەنساۋلىق ساقتاۋ سالاسىنىڭ ينفراقۇرىلىمىن نىعايتۋ باعىتىندا جۇيەلى جۇمىس جۇرگىزىلىپ كەلەدى. ارنايى مەملەكەتتىك قوردان بولىنگەن قاراجات ەسەبىنەن سەمەي قالاسىندا 100 ورىندىق پسيحونەۆرولوگيالىق مەديتسينالىق-الەۋمەتتىك مەكەمە قۇرىلىسى اياقتالدى. ءۇرجار اۋدانىندا تەرى كورونارلىق ارالاسۋ ورتالىعىنا قوسىمشا عيماراتتىڭ, اياگوز اۋدانىندا ماگنيتتى-رەزونانستىق توموگرافقا ارنالعان عيماراتتىڭ قۇرىلىسى جۇرگىزىلىپ جاتىر. بىلتىر انا مەن بالا دەنساۋلىعىن قولداۋ ماقساتىندا «سالاماتتى انا» پانسيوناتى اشىلدى.
اباي وبلىسى
