ءبىرىنشى ورىن ەلەنا رىباكيناعا بۇيىردى. وعان ەشكىمنىڭ داۋ ايتا الماسى انىق. كۇنى كەشە عانا ول مەلبۋرندە وتكەن اۋستراليانىڭ اشىق بىرىنشىلىگىندە توپ جارىپ, «ۇلكەن دۋلىعا» ساناتىنداعى تۋرنيرلەردەگى ەكىنشى تيتۋلىنا قول جەتكىزدى. جارىس بارىسىندا رىباكينا الەمنىڭ ءبىرىنشى جانە ەكىنشى راكەتكالارى ارينا سوبولەنكو مەن يگا شۆەنتەككە شاڭ قاپتىردى. ءبىر كەرەمەتى, جەرلەسىمىز جەتى كەزدەسۋدىڭ التاۋىن ەكى سەتتە اياقتادى.
ءدال سول ءتۋرنيردىڭ فينالىنا جەتكەن اننا دانيلينا ەكىنشى ورىندى ەنشىلەدى. ول سەربيالىق الەكساندرا كرۋنيچمەن جۇپتاسىپ ونەر كورسەتتى. دانيلينا مەن كرۋنيچ تەك بەلگيالىق ەليسە مەرتەنس پەن قىتايلىق چجان شۋايدان ايلاسىن اسىرا المادى.
ءۇشىنشى جانە ءتورتىنشى ساتىعا كاراتەشىلەر بەللا ساماشەۆا مەن سوفيا بەرۋلتسەۆا جايعاستى. قوس سپورتشىمىز تۇركيانىڭ ىستانب ۇلىندا جالاۋى جەلبىرەگەن پرەمەر-ليگادا التىننان القا تاقتى.
بەسىنشى ورىندى زاڭعار نۇرلان ۇلى ەنشىلەدى. قازاقتىڭ اسا دارىندى تەننيسشىسى جاستار اراسىنداعى Australian open دوداسىنىڭ جارتىلاي فينالىندا كۇش سىناستى. التىنشى ساتىعا تەمىرلان اناربەكوۆ تۇراقتادى. الماتىنىڭ «قايراتى» ۋەفا چەمپيوندار ليگاسىنىڭ جالپى كەزەڭىندە سوڭعى ورىندا قالىپ قويسا دا, قازاق كيپەرىنىڭ ويىنى كوپشىلىكتىڭ كوڭىلىنەن شىقتى. ءوزىنىڭ اسقان شەبەرلىگىنىڭ ارقاسىندا تەمىرلان اتالعان جارىستىڭ ەڭ ۇزدىك قاقپاشىلارىنىڭ تىزىمىندە ۇزدىك ۇشتىكتىڭ قاتارىنان كورىندى.
