ساباق بەرۋ – تەك اقپارات ۇسىنۋ ەمەس, وقۋشىنىڭ قىزىعۋشىلىعىن وياتۋ جانە العان ءبىلىمىن ومىردە قولدانا الۋىنا جاعداي جاساۋ. مەن ءوز جۇمىسىمدا كوپ ءادىس ءتاسىلدى قولدانامىن, سونىڭ ءبىرى – ء«تىرى سۋرەتتەر» دەپ اتالادى. بۇل بالانىڭ اقپاراتتى قابىلداۋىن مەيلىنشە جەڭىلدەتەدى. ويلانا كەلە, ۆيزۋالدى كۇردەلى ەرەجەلەردى جاتتاعانشا ولاردى كەيىپكەرلەرگە اينالدىرعان ءجون دەپ شەشتىم. تيىسىنشە, بۇل ۇتىمدى شەشىم بولدى. بالالار مۇنداي تاسىلگە لەزدە قىزىعۋشىلىق تانىتىپ, ولاردىڭ كىتاپتاعى تاپسىرمانى قابىلداۋى, ءسىڭىرۋى, سوعان ساي پايىم ايتا ءبىلۋ داعدىلارى قالىپتاستى.
سونىمەن قاتار دىبىستاردى جۋان جانە جىڭىشكە دەگەنشە, «الىپتار» مەن «ەرگەجەيلىلەر» پاتشالىعى رەتىندە سيپاتتاۋ دا ءوز-ءوزىن اقتاعان ءادىس بولدى دەر ەدىم. قازىر وسىنداي ەرەكشە تاسىلدەردى باسشىلىققا الا وتىرىپ, ساباقتارىمدى مەيلىنشە قىزىقتى ەتىپ وتكىزىپ ءجۇرمىن.
راس, قازىر ءبىلىم بەرۋ پاراديگماسى تۇبەگەيلى وزگەردى. بۇرىن ءبىلىم بەرۋدىڭ باستى ماقساتى – «كوپ اقپاراتتى جاتتاتۋ» بولسا, قازىرگى باستى شارت – «سول اقپاراتتى تاۋىپ, تالداپ جانە ومىردە قولدانا الۋ». ەسكى جۇيەدە وقۋشىلار قاتە ءۇشىن جازالاناتىن (تومەن باعا). جاڭا جۇيە بويىنشا قاتە – وقۋ ۇدەرىسىنىڭ ماڭىزدى بولىگى. وقۋشى قاتەلەسۋ ارقىلى ىزدەنۋدى ۇيرەنەدى. سوندىقتان باعالاۋ ەمەس, كەرى بايلانىس ء(فورماتيۆتى باعالاۋ) ماڭىزدىراق بولىپ وتىر.
مەن باستاۋىش سىنىپتىڭ مۇعالىمى ماماندىعىن بەكەر تاڭداعان جوقپىن. شىنايى قىزىعۋشىلىق پەن قۇلشىنىس وسى باعىتقا قاراي جەتەلەپ الىپ كەلدى. باسقا ماماندىقتاردا ناتيجەنى جىلدار بويى كۇتۋ كەرەك بولسا, باستاۋىش سىنىپتا بالانىڭ كەشە عانا ءارىپ تانىماي, بۇگىن العاشقى ءسوزىن وقىعانىن كورۋ – ەرەكشە باقىت. بالانىڭ كوزىندەگى ء«تۇسىندىم» دەگەن ۇشقىندى كورۋ – مەن ءۇشىن ەڭ ۇلكەن مارتەبە. مەنىڭ تاڭداۋىم – بالانىڭ بالالىق شاعىن قىزىقتى ەتۋ جانە وعان ومىرلىك ۇلكەن جولعا جولداما بەرۋ. وسى تۇرعىدان العاندا ۇستازدىق قىزمەتتى ماماندىق ەمەس, ميسسيا دەپ اتار ەدىم.
اقمارال بورتىباەۆا,
الماتى قالاسىنداعى №141 جالپى ءبىلىم بەرەتىن مەكتەپتىڭ باستاۋىش سىنىپ مۇعالىمى
