تالقىلاۋعا مينيسترلىكتەر مەن مۇددەلى مەملەكەتتىك ورگانداردىڭ وكىلدەرى, سونداي-اق بەينەبايلانىس ارقىلى قوسىلعان ءوڭىر اكىمدىكتەرى قاتىستى.
وتىرىس بارىسىندا فورمالدى ارەكەت ەتۋدەن باس تارتىپ, الدىن الا جانە ناقتى باعىتتالعان پروفيلاكتيكالىق جۇمىسقا كوشۋ قاجەتتىگىنە ەرەكشە نازار اۋدارىلدى. بىرقاتار وڭىرلەردە باسقارۋ ءتارتىبى مەن ۆەدومستۆوارالىق ۇيلەستىرۋدى تۇبەگەيلى كۇشەيتۋدى تالاپ ەتەتىن جاعدايلاردىڭ ساقتالىپ وتىرعانى اتاپ ءوتىلدى. مىسال رەتىندە قوعامدىق قاۋىپسىزدىككە قاتىستى رەزونانستى وقيعالار, سونداي-اق جەرگىلىكتى دەڭگەيدەگى جەكەلەگەن بيۋدجەتتىك شەشىمدەردىڭ تيىمدىلىگىنە بايلانىستى ماسەلەلەر ايتىلدى.
سونىمەن قاتار بالالاردى قولداۋ شارالارىن العاش رەت بىرىڭعاي كەشەندى فورماتتا بىرىكتىرگەن «قازاقستان بالالارى» باعدارلاماسىنىڭ ىسكە اسىرىلۋ بارىسى دا تالقىلاندى.
ء«بىز سانعا ەمەس, ساپاعا جۇمىس ىستەۋىمىز كەرەك – ءار بالا بويىنشا ناقتى ناتيجەگە قول جەتكىزۋ ماڭىزدى. كوميسسيا فورمالدى ورگان بولىپ قالماۋى ءتيىس. ءاربىر جاعداي جەكە قارالىپ, ءتيىستى سۇيەمەلدەۋ بەلگىلەنىپ, قابىلدانعان شارالاردىڭ ءىس جۇزىندەگى ناتيجەسى مىندەتتى تۇردە تەكسەرىلۋى قاجەت. ءبىز ءۇشىن بالا بولاشاعى بارىنەن ماڭىزدى», دەپ اتاپ ءوتتى ايدا بالاەۆا.
جيىن قورىتىندىسى بويىنشا پرەمەر-ءمينيستردىڭ ورىنباسارى بىرقاتار ناقتى تاپسىرما بەردى. اتاپ ايتقاندا, ءبىر اپتا ىشىندە وڭىرلىك كوميسسيالاردىڭ قۇرامىن جاڭارتىپ, ولاردى ساراپشىلار قاۋىمداستىعى, اتا-انالار ۇيىمدارى, ۇكىمەتتىك ەمەس ۇيىمدار مەن قوعامدىق كەڭەستەر وكىلدەرى ەسەبىنەن كەڭەيتۋ, سونداي-اق «قازاقستان بالالارى» باعدارلاماسىن ىسكە اسىرۋ اياسىندا وڭىرلەرگە رەسپۋبليكالىق قۇجات نەگىزىندە, جەرگىلىكتى ەرەكشەلىكتەردى ەسكەرە وتىرىپ, ءوز جوسپارلارىن بەكىتۋ تاپسىرىلدى.
