اتالعان دەرەكتەر قازاقستانداعى جاساندى ينتەللەكت نارىعىنا ارنالعان العاشقى كەشەندى تالداۋ – «Kazakhstan AI Country Report» ەسەبىندە ۇسىنىلدى. ەسەپكە سايكەس, ەلىمىز تسيفرلاندىرۋ كەزەڭىنەن ءوتىپ, جاساندى ينتەللەكتىنى جۇيەلى ءارى اۋقىمدى تۇردە ەنگىزۋ كەزەڭىنە قادام باسىپ وتىر. جي ەلدىڭ ەكونوميكالىق ءوسىمىن جەدەلدەتەتىن جانە حالىقارالىق باسەكەگە قابىلەتتىلىگىن ارتتىراتىن ماڭىزدى فاكتور رەتىندە قاراستىرىلادى.
زەرتتەۋ اۆتورلارىنىڭ باعالاۋىنشا, جاساندى ينتەللەكت تەحنولوگيالارىن ەنگىزۋ ورتا مەرزىمدى پەرسپەكتيۆادا جۇمىس ورىندارىنىڭ جارتىسىنان استامىندا ەڭبەك ونىمدىلىگىن ارتتىرىپ, ەلىمىزدىڭ جالپى ىشكى ءونىمىنىڭ جىل سايىن قوسىمشا 0,5–2 پايىزعا ءوسۋىن قامتاماسىز ەتە الادى. ەسەپتە كورسەتىلگەندەي, وتاندىق جي-ستارتاپتاردىڭ باسىم بولىگى قولدانبالى B2B-شەشىمدەرگە باعىتتالعان. ولار ىشكى نارىقپەن قاتار, حالىقارالىق نارىقتاردا دا بەلسەندى جۇمىس ىستەيدى. جوبالاردىڭ ەڭ جوعارى شوعىرلانۋى «Enterprise AI», بيزنەس-پروتسەستەردى اۆتوماتتاندىرۋ, يندۋستريا 4.0, «MarTech», «EdTech», «MedTech» باعىتتارىندا بايقالادى.
2025 جىل جاساندى ينتەللەكت ەكوجۇيەسى ءۇشىن بەتبۇرىس كەزەڭى بولدى. وسى جىلى ەلىمىزدە نارىق باعالاۋى 1 ملرد اقش دوللارىنان اساتىن العاشقى جەكە تەحنولوگيالىق كومپانيا – «Higgsfield AI» پايدا بولدى. سونىمەن قاتار, «Bridge جانە «Series A» كەزەڭدەرىندە ەلىمىز ءۇشىن ەڭ ءىرى ينۆەستيتسيالىق مامىلەلەر تىركەلدى. بۇل وتاندىق كاسىپكەرلەر نەگىزىن قالاعان جاساندى ينتەللەكت كومپانيالارىنىڭ حالىقارالىق ءىرى ينۆەستورلاردان كاپيتال تارتۋ مۇمكىندىگى جوعارى ەكەنىن كورسەتتى.
