تسيفرلىق كودەكسكە سايكەس, بيومەتريالىق دەرەكتەردى مىندەتتى تۇردە قولدانۋ تەك زاڭدا تىكەلەي كورسەتىلگەن جاعدايلاردا عانا مۇمكىن. ەگەر مۇنداي مىندەت زاڭ دەڭگەيىندە بەكىتىلمەسە, بيومەتريالىق دەرەكتەردى جيناۋ مەن پايدالانۋ تەك ازاماتتىڭ ەرىكتى كەلىسىمىمەن جۇزەگە اسۋعا ءتيىس. سەبەبى بيومەتريالىق اقپارات جەكە دەرەكتەردىڭ ەرەكشە ساناتىنا جاتادى جانە ونى قولدانۋ كەزىندە كەلىسىمگە قاتىستى بارلىق زاڭدى راسىمدەر تولىق ساقتالۋى قاجەت.
ءماجىلىس دەپۋتاتى ەكاتەرينا سمىشلياەۆانىڭ سوزىنشە, قازىرگى تاجىريبەدە بيومەتريالىق دەرەكتەردىڭ ازاماتتىڭ كەلىسىمىنسىز نەمەسە زڭدا كوزدەلمەگەن جاعدايدا ءماجبۇرلى تۇردە قولدانىلىپ جاتقان مىسالدارى كەزدەسەدى.
«جاڭا كودەكس ءدال وسىنداي ولقىلىقتاردى جويۋعا باعىتتالعان. ەگەر بيومەتريالىق يدەنتيفيكاتسيانى پايدالانۋ زاڭمەن مىندەتتەلسە, ول تەك مەملەكەتتىك بيومەتريالىق جۇيەلەر ارقىلى جۇزەگە اسىرىلادى. بۇگىندە مۇنداي جۇيەلەر ۇلتتىق بانكتىڭ بانك جانە قارجى سەكتورىنا ارنالعان بيومەتريالىق جۇيەسى مەن تسيفرلىق ۇكىمەت اياسىندا جۇمىس ىستەيتىن ۋاكىلەتتى مەملەكەتتىك ورگاننىڭ بيومەتريالىق پلاتفورماسى ارقىلى قامتاماسىز ەتىلەدى. بۇل جاعدايدا بيومەتريالىق دەرەكتەردىڭ قاۋىپسىزدىگىنە مەملەكەت تىكەلەي جاۋاپ بەرەدى. ال زاڭمەن مىندەتتەلمەگەن بارلىق وزگە جاعدايلاردا بيومەتريانى قولدانۋ تولىقتاي ەرىكتى سيپاتتا بولادى», دەيدى دەپۋتات.
