پرەزيدەنت كوميسسيا جۇمىسى ەلىمىزدىڭ قوعامدىق-ساياسي ومىرىنە تىڭ سەرپىن بەرەتىنىن ايتتى.
«حالىقتان كەلىپ تۇسكەن ۇسىنىستاردى جۇيەلەپ, جيناقتاۋ ءۇشىن كونستيتۋتسيالىق كوميسسيا قۇرىلدى. ونىڭ قۇرامىنا بارلىق ايماقتىڭ وكىلدەرى مەن ءتۇرلى ساناتتاعى ازاماتتار, حالىق قالاۋلىلارى, ورتالىق اتقارۋشى ورگانداردىڭ باسشىلارى, قۇقىقتانۋشى عالىمدار, ءتىل ماماندارى جانە بەلسەندى جاستار كىردى. قوعام وكىلدەرىن قامتۋ اۋقىمى, كاسىبيلىك مەن ازاماتتىق جاۋاپكەرشىلىك تۇرعىسىنان العاندا, مۇنداي كوميسسيا ەلىمىزدە بۇرىن-سوڭدى بولماعان دەپ سەنىممەن ايتۋعا بولادى.
كوميسسيا مۇشەلەرى كونستيتۋتسيالىق رەفورماعا قاتىستى ءار ماسەلەنى ەگجەي-تەگجەيلى قاراپ, جان-جاقتى تالقىلاپ, اۋقىمدى جۇمىس اتقارىپ جاتىر», دەدى مەملەكەت باسشىسى.
ەستەرىڭىزگە سالا كەتەيىك, وسىعان دەيىن كوميسسيانىڭ 5 وتىرىسى ءوتتى. ونىڭ ءبارى الەۋمەتتىك جەلىدە تىكەلەي ەفيردەن كورسەتىلىپ, اقپارات قۇرالدارى ارقىلى كەڭىنەن تاراتىلدى.
«مەن تالقىلاۋ بارىسىن مۇقيات قاداعالاپ وتىرمىن. وسى ورايدا, اتا زاڭىمىزعا قاتىستى كوپتەگەن پروگرەسسيۆتى, يننوۆاتسيالىق ۇسىنىس بەرىلدى دەپ سەنىممەن ايتا الامىن.
تۇپتەپ كەلگەندە مۇنىڭ ءبارى ەلىمىزدىڭ اتا زاڭىنا نەگىز بولادى. بۇل الەمدە قالىپتاسقان قازىرگى كۇردەلى كەزەڭدە ءبىرتۇتاس قازاقستان حالقىنا باعىت سىلتەيتىن ماڭىزدى قۇجاتقا اينالادى دەپ سەنەمىن», دەدى پرەزيدەنت.
مەملەكەت باسشىسى ەگەر بولاشاقتا كونستيتۋتسياعا قانداي دا ءبىر وزگەرىستەر, ءتىپتى, شاعىن وزگەرىستەر ەنگىزۋ كەرەك بولىپ جاتسا, ونداي قادامدى تەك رەفەرەندۋم ارقىلى عانا جاساۋعا بولادى دەگەن ويىن ءبىلدىردى.
پرەزيدەنت سىن ساعاتتا بەلسەندى جۇمىس ىستەيتىن ەرىكتىلەردىڭ جۇمىسىن جوعارى باعالادى
«كونستيتۋتسيا, بۇل – كەز كەلگەن ەلدىڭ ەڭ باستى جول كورسەتەتىن قۇجاتى, تەمىرقازىعى. كونستيتۋتسيانى ءبارىمىز ءبىلۋىمىز كەرەك, باعالاۋىمىز قاجەت.
سوندىقتان ەگەر بولاشاقتا كونستيتۋتسياعا قانداي دا ءبىر وزگەرىستەر, ءتىپتى, شاعىن وزگەرىستەر ەنگىزۋ كەرەك بولىپ جاتسا, ونداي قادامدى تەك رەفەرەندۋم ارقىلى عانا جاساۋعا بولادى دەگەن ويدامىن. بۇل دا حالقىمىزدىڭ ازاماتتىق قۇقىعىن كۇشەيتۋدىڭ ماڭىزدى ءتاسىلى دەپ سەنەمىن.
تاعى ءبىر ايتا كەتەتىن ماڭىزدى جايت: كوميسسيا كونستيتۋتسياعا قاتىستى ۇسىنىستىڭ ءبارىن مۇقيات سارالاپ شىقتى. مۇقيات ويلاستىرىلعان تۇزەتۋلەر كونستيتۋتسيانىڭ بارلىق نەگىزگى بولىمدەرى مەن باپتارىن, پرەامبۋلاسىن تۇگەل قامتيتىن بولادى», دەدى مەملەكەت باسشىسى.
پرەزيدەنت ۆولونتەردىڭ تسيفرلى پاسپورتىن جاساۋ تۋرالى ۇسىنىسقا قولداۋ ءبىلدىردى
